ବେଙ୍ଗାଲୁରୁ, ୨୭ା୯: କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ ଗତବର୍ଷ ଦିଲ୍ଲୀ ସୀମାରେ କୃଷକମାନେ ଆନ୍ଦୋଳନ କରୁଥିବାବେଳେ ଅନେକ ଟୁଇଟର ଆକାଉଣ୍ଟକୁ ସମ୍ପୂର୍ଣ୍ଣ ଭାବେ ବନ୍ଦ କରିବାକୁ କେନ୍ଦ୍ର ଏହି ସୋସିଆଲ ମିଡିଆ ଜାଏଣ୍ଟକୁ ନିର୍ଦ୍ଦେଶ ଦେଇଥିଲା। ଏ ନେଇ ଟୁଇଟର ସୋମବାର କର୍ନାଟକ ହାଇକୋର୍ଟଙ୍କୁ ଜଣାଇଛି। ଟୁଇଟରର ନିୟମ ଅନୁସାରେ କେହି ୟୁଜର ବାରମ୍ବାର ଅପରାଧଭିତ୍ତିକ ପୋଷ୍ଟ ନ କଲେ ସେମାନଙ୍କ ଆକାଉଣ୍ଟକୁ ସମ୍ପୂର୍ଣ୍ଣ ଭାବେ ବ୍ଲକ କରାଯାଇପାରିବ ନାହିଁ। ଏପରି ସ୍ଥିତିରେ ୟୁଜର୍ସଙ୍କ ଗୋଟିଏ କଣ୍ଟେଣ୍ଟ ହଟାଯାଇ ଏ ନେଇ ସେମାନଙ୍କୁ ନୋଟିସ୍ ଜାରି କରାଯିବା କଥା ବୋଲି ଟୁଇଟର ଜଷ୍ଟିସ୍ କ୍ରିଷ୍ଣା ଏସ୍ ଦିକ୍ଷୀତଙ୍କ ଖଣ୍ଡପୀଠଙ୍କୁ କହିଛି।
ଫେବୃୟାରୀରୁ ୨୦୨୨ ଫେବୃୟାରୀ ମଧ୍ୟରେ ୧୦ ଟୁଇଟର ଆକାଉଣ୍ଟ ବ୍ଲକ କରିବା ପାଇଁ କେନ୍ଦ୍ର ସରକାର ନିର୍ଦ୍ଦେଶ ଦେବା ପ୍ରସଙ୍ଗରେ ଏହି ସୋସିଆଲ ମିଡିଆ ପ୍ଲାଟଫର୍ମ ପାଇଁ ଓକିଲାତି କରୁଥିବା ବରିଷ୍ଠ ଆଇନଜୀବୀ ଅରବିନ୍ଦ ଏସ୍ ଦତାର କହିଛନ୍ତି, ଆଇଟି ଆକ୍ଟର ଧାରା ୬୯ ଅନୁସାରେ କୌଣସି ଆକାଉଣ୍ଟକୁ ଏପରି ବ୍ଲକ କରାଯାଇପାରିବ ନାହିଁ। ଯଦି ଖବରକାଗଜ, ଟେଲିଭିଜନରେ କୃଷକ ଆନ୍ଦୋଳନ ଖବର ପରିବେଷଣ କରାଯାଇପାରିବ ତେବେ ଟୁଇଟରରେ ତାହା କାହିଁକି ହୋଇପାରିବ ନାହିଁ ବୋଲି ସେ ପ୍ରଶ୍ନ କରିଥିଲେ। ସରକାରଙ୍କୁ ସମାଲୋଚନା ଅଧିକାର ନାଗରିକମାନଙ୍କର ରହିଛି ବୋଲି ସେ କହିଥିଲେ। ଏହାର ପରବର୍ତ୍ତୀ ଶୁଣାଣି ଅକ୍ଟୋବର ୧୭ରେ ହେବ। ସୂଚନାଯୋଗ୍ୟ, ଆକାଉଣ୍ଟ ବ୍ଲକ କରିବା ନିର୍ଦ୍ଦେଶ ବିରୋଧରେ ଟୁଇଟର ହାଇକୋର୍ଟରେ ଏକ ପିଟିଶନ ଦାଖଲ କରିଥିଲା। ଏହା ଅସାମ୍ବିଧାନିକ ଏବଂ ଆଇଟି ଆଇନର ଉଲ୍ଲଘଂନ ବୋଲି ଟୁଇଟର ଦର୍ଶାଇଥିଲା। ତେବେ ସମୂହ ଏବଂ ଜାତୀୟ ସ୍ବାର୍ଥ ଉଦ୍ଦେଶ୍ୟରେ ଓ କୌଣସି ପ୍ରକାର ହିଂସାକାଣ୍ଡ ରୋକିବା ନିମନ୍ତେ କେତେକ ଆକାଉଣ୍ଟ ବ୍ଳକ୍ କରିବାକୁ ନିର୍ଦ୍ଦେଶ ଦିଆଯାଇଥିବା ପୂର୍ବରୁ କେନ୍ଦ୍ର କହିଥିଲା।
