ଅନୁଗୋଳ ଅଫିସ, ୬।୬: ଡାକ୍ତର, କର୍ମଚାରୀଙ୍କ ଉପସ୍ଥାନ ଜାଣିବା ପାଇଁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଲଗାଯାଇଥିବା ବାୟୋମେଟ୍ରିକ ଆଟେଣ୍ଡାନ୍ସ ଡିଭାଇସ ଅଚଳ ହୋଇପଡ଼ିଛି। ଏହା କେତେଜଣ ଡାକ୍ତର ଓ କର୍ମଚାରୀଙ୍କୁ ବେଶ୍ ସୁହାଉଥିବା ଏବେ ମେଡିକାଲ ପରିସରରେ ଚର୍ଚ୍ଚା ହେଉଛି। ଏପରି କି ଏଠାରେ କମ୍ ସମୟ କାମ କରି ନର୍ସିଂହୋମକୁ ଅଧିକ ସମୟ ଦେବା ସମ୍ପୃକ୍ତ ଡାକ୍ତରମାନଙ୍କ ପାଇଁ ସହଜ ହୋଇଯାଇଥିବା କୁହାଯାଉଛି। ତେବେ ଏହାର ପ୍ରଭାବ ସିଧାସଳଖ ରୋଗୀ ସେବା ଉପରେ ପଡ଼ୁଥିଲେ ମଧ୍ୟ କର୍ତ୍ତୃପକ୍ଷ ଚୁପ୍ ବସିଥିବାରୁ ଏ ନେଇ ଅସନ୍ତୋଷ ସୃଷ୍ଟି ହୋଇଛି।
ଅନୁଗୋଳ ଡାକ୍ତରଖାନାରେ ଖାଲି ପଡ଼ିଥିବା ଡାକ୍ତର ପଦବୀ ପୂରଣ ହେଉନାହିଁ। ତେଣୁ କାର୍ଯ୍ୟରତ ବିଭିନ୍ନ ବିଭାଗର ଡାକ୍ତରଙ୍କ ନିକଟକୁ ଅଧିକ ସଂଖ୍ୟକ ରୋଗୀ ଆସୁଛନ୍ତି। ଏପରି ସ୍ଥିତିରେ ଡାକ୍ତରମାନେ ନିୟମ ମୁତାବକ ୮ ଘଣ୍ଟା କାର୍ଯ୍ୟ କରିବା କଥା। କିନ୍ତୁ କେତେଜଣ ଡାକ୍ତର ଏଥିରେ ଖିଲାପ କରୁଛନ୍ତି। ସେମାନେ ମାତ୍ର ୩/୪ ଘଣ୍ଟା ଡ୍ୟୁଟି କରି ଅନ୍ୟତ୍ର ଚାଲିଯାଉଥିବା ବେଳେ ରୋଗୀମାନଙ୍କୁ ମଧ୍ୟ ନିଜେ କାର୍ଯ୍ୟ କରୁଥିବା କ୍ଲିନିକ, ନର୍ସିଂହୋମ, ଡାଇଗ୍ନୋଷ୍ଟିକ ସେଣ୍ଟର, ଘରୋଇ ମେଡିକାଲକୁ ପଠାଇ ଦେଉଛନ୍ତି। ଫଳରେ ମାଗଣାରେ ଚିକିତ୍ସିତ ହେବାକୁ ଆସିଥିବା ରୋଗୀଙ୍କୁ ବାହାରେ ହଜାର ହଜାର ଟଙ୍କା ଖର୍ଚ୍ଚ କରିବାକୁ ପଡ଼ୁଛି। ସମ୍ପୃକ୍ତ ଡାକ୍ତରମାନଙ୍କ ଏପରି ଡବଲ ବେନିଫିଟ ଯୋଗୁ ସରକାରୀ ଡାକ୍ତରଖାନାରେ ରୋଗୀସେବା ବ୍ୟାହତ ହେଉଛି। ସରକାର ଏପରି ଡାକ୍ତରମାନଙ୍କୁ ଯେତେ ତାଗିଦ କଲେ ମଧ୍ୟ ସେମାନେ ସୁଧୁରୁ ନ ଥିବାରୁ ରୋଗୀସେବା ବାଧାପ୍ରାପ୍ତ ହେଉଛି। କେତେଜଣ ରୋଗୀଙ୍କ ସମ୍ପର୍କୀୟ କହିଛନ୍ତି, ଡାକ୍ତର ଯେଉଁ ସମୟରେ ୱାର୍ଡ ପରିକ୍ରମା କରିବା କଥା ତାହା ହେଉନାହିଁ। ଫଳରେ ନର୍ସ ଓ ଅନ୍ୟ ସ୍ବାସ୍ଥ୍ୟକର୍ମୀଙ୍କ ଉପରେ ଇନ୍ଡୋର ରୋଗୀଙ୍କୁ ନିର୍ଭର କରିବାକୁ ପଡ଼ୁଛି। ଜରୁରୀ ବେଳେ ୱାର୍ଡରେ ଡାକ୍ତରଙ୍କ ଆବଶ୍ୟକତା ପଡ଼ିଲେ ମଧ୍ୟ ଦେଖା ମିଳୁନାହିଁ।
ଏ ସମ୍ପର୍କରେ ଅନୁଗୋଳ ସିଡିଏମ୍ଓ ଦାୟିତ୍ୱରେ ଥିବା ଡାକ୍ତର ପ୍ରତାପ କୁମାର ବେହେରା କହିଛନ୍ତି, ଏଠାରେ କାର୍ଯ୍ୟରେ ଯୋଗଦେବା ପୂର୍ବରୁ ମେଶିନ ଅଚଳ ହୋଇଯାଇଥିଲା। ତଥାପି ଘଟଣାର ଅନୁଧ୍ୟାନ କରାଯିବ। ପ୍ରକୃତରେ ମେଶିନ ଅଚଳ କି ଏହାକୁ ଉଦ୍ଦେଶ୍ୟମୂଳକ ଭାବେ ଖରାପ କରାଯାଇଛି ତାହା ଜଣାପଡ଼ିବା ପରେ ପ୍ରତିକାର ବ୍ୟବସ୍ଥା କରାଯିବ ବୋଲି ବେହେରା ପ୍ରକାଶ କରିଛନ୍ତି।
