ନ୍ୟୁୟର୍କ,୩୦ା୯(ଆଇଏଏନ୍ଏସ୍): ଜାତିସଂଘ ସାଧାରଣ ସଭା (ୟୁଏନ୍ଜିଏ)ରେ କଶ୍ମୀର ପ୍ରସଙ୍ଗକୁ ନେଇ ଭାରତ ବିରୋଧୀ ଅଭିଯାନରେ ଚାଇନା ଓ ତୁର୍କୀ ସହ ମାଲେସିଆ ଯୋଗଦେଇଛି। କଶ୍ମୀରକୁ ଭାରତ ଆକ୍ରମଣ ଓ ଦଖଲ କରିଛି ବୋଲି ମାଲେସିଆ ପ୍ରଧାନମନ୍ତ୍ରୀ ମାହାଥିର ମହମ୍ମଦ ଅଭିଯୋଗ ଆଣିଛନ୍ତି।
ୟୁଏନ୍ଜିଏର ୭୪ତମ ଅଧିବେଶନରେ ମାହାଥିର ଅଭିଭାଷଣ ଦେଇ କହିଥିଲେ, ଜାତିସଂଘ ସଂକଳ୍ପନାମା ସତ୍ତ୍ୱେ ଭାରତ କଶ୍ମୀରକୁ ଆକ୍ରମଣ କରି ଦଖଲରେ ରଖିଛି। ଏହି କାର୍ଯ୍ୟାନୁଷ୍ଠାନ ପାଇଁ କାରଣ ଥାଇପାରେ। କିନ୍ତୁ ଏହା ଏକ ଭୁଲ ପଦକ୍ଷେପ। ଶାନ୍ତିପୂର୍ଣ୍ଣ ଉପାୟରେ ଏହି ସମସ୍ୟାର ସମାଧାନ ଜରୁରୀ। ପାକିସ୍ତାନ ସହ ମିଶି ଭାରତ ଏହାର ସମାଧାନ କରିବା ଉଚିତ। ଜାତିସଂଘକୁ ଅଣଦେଖା କରିବା ଏହାର ଆଇନକୁ ଅସମ୍ମାନ ବୋଲି ସେ କହିଥିଲେ। ମାଲେସିଆ ଗଣମାଧ୍ୟମ ଅନୁସାରେ ଗତ ୫ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମାହାଥିରଙ୍କ ମଧ୍ୟରେ ସାକ୍ଷାତ ବେଳେ କଶ୍ମୀର ମୁଖ୍ୟ ପ୍ରସଙ୍ଗ ଥିଲା।
