ଜି.ଉଦୟଗିରି,୨୨।୪(ଡି.ଏନ୍.ଏ.): କନ୍ଧମାଳ ଜିଲା ଜି.ଉଦୟଗିରି ଏନ୍ଏସି ତରଫରୁ ବୁଧବାର ସଫେଇ କର୍ମଚାରୀମାନଙ୍କୁ ବ୍ୟକ୍ତିଗତ ସୁରକ୍ଷା ପୋଷାକ(ପିପିଇ) ଯୋଗାଇ ଦିଆଯାଇଛି। କରୋନା ଯୁଦ୍ଧରେ ଏମାନେ ମଧ୍ୟ ଆଗ ଧାଡ଼ିର ଯୋଦ୍ଧା। ସେମାନଙ୍କ ସୁରକ୍ଷା ପାଇଁ ଏହି ପୋଷାକ ଦିଆ ଯାଇଛି ବୋଲି ଜି. ଉଦୟଗିରି ଏନ୍ଏସି କାର୍ଯ୍ୟ ନିର୍ବାହୀ ଅଧିକାରୀ ସଞ୍ଜୀବ କୁମାର ମହାପାତ୍ର କହିଛନ୍ତି। ସମୁଦାୟ ୨୩ ଜଣ ମହିଳା ଓ ୨୨ ଜଣ ପୁରୁଷ ସଫେଇ କର୍ମଚାରୀଙ୍କୁ ଏହି ପୋଷାକ ଦିଆଯାଇଛି ବୋଲି ଏନ୍ଏସି ସ୍ବଚ୍ଛ ଭାରତ ସଂଯୋଜକ କମ୍ବୁନାଥ ପାଣିଗ୍ରାହୀ ଓ ଜନ ସ୍ବାସ୍ଥ୍ୟ ପରିଦର୍ଶକ ସୁରେନ ବିଷୋୟୀ କହିଛନ୍ତି । ପୋଷାକ ବଣ୍ଟନ ବେଳେ ଏନ୍ଏସିର ବରିଷ୍ଠ ସହାୟକ ସତ୍ୟପ୍ରକାଶ ମହାପାତ୍ର, ନରୋତ୍ତମ ସାହୁ, ଶିବ ସୁନ୍ଦର ଦାଶଙ୍କ ସମେତ ଅନେକ କର୍ମଚାରୀ ଉପସ୍ଥିତ ଥିଲେ।
