ଲାଉସାନେ, ୩ା୨ (ଏଏଫ୍ପି)-ଟୋକିଓ ଅଲିମ୍ପିକ୍ସ ୬ମାସରୁ କମ୍ ସମୟ ରହିଥିବା ବେଳେ କରୋନା ଭାଇରସ ପାଇଁ ଚାଇନାର ଷ୍ଟେଟ୍ ଆଣ୍ଟି ଡୋପିଂ ଏଜେନ୍ସି (ଚିନାଡା)କୁ ସାମୟିକ ଭାବେ ଡୋପ୍ ଟେଷ୍ଟିଂରୁ ସସ୍ପେଣ୍ଡ କରାଯାଇଛି। ଇଣ୍ଟରନ୍ୟାଶନାଲ ଟେଷ୍ଟିଂ ଏଜେନ୍ସି (ଆଇଟିଏ) ତରଫରୁ ସୋମବାର ଏ ବିଷୟରେ ସୂଚନା ଦିଆଯାଇଛି। ବର୍ତ୍ତମାନ ପରିସ୍ଥିତିରେ ଏହି ଦେଶରେ ଡୋପ୍ ଟେଷ୍ଟ ତୁଳନାରେ ସାର୍ବଜନିକ ସ୍ବାସ୍ଥ୍ୟ କାର୍ଯ୍ୟକଳାପ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଅଲିମ୍ପିକ୍ସ ଜୁଲାଇ ୨୪ରୁ ଆରମ୍ଭ ହେବ। ଚାଇନାରେ କରୋନା ଭାଇରସ ଜନିତ ସମସ୍ୟାର ଅବସାନ ଘଟିବା ମାତ୍ରେ ଚିନାଡା ଶୀଘ୍ର ପୂର୍ବଭଳି କାର୍ଯ୍ୟାରମ୍ଭ କରିବ ବୋଲି ଆଇଟିଏ ପ୍ରକାଶ କରିଛି। ଚାଇନିଜ କର୍ତ୍ତୃପକ୍ଷ ସୋମବାର ଦେଇଥିବା ସୂଚନା ଅନୁସାରେ କରୋନା ଭାଇରସ ସଦସ୍ୟ ୫୭ ଜଣଙ୍କ ମୃତ୍ୟୁ ଘଟିଛି। ଫଳରେ ଏହି ଭାଇରସରେ ମୃତ୍ୟୁ ସଂଖ୍ୟା ୩୬୦କୁ ବୃଦ୍ଧି ପାଇଛି। ଗତବର୍ଷ ଶେଷ ଭାଗରେ ଚାଇନାର କେନ୍ଦ୍ରାଞ୍ଚଳ ସହର ଉହାନରେ ପ୍ରଥମେ ଏହି ଭୂତାଣୁକୁ ଠାବ କରାଯାଇଥିଲା। ପଶୁଙ୍କ ଶରୀରରୁ ଆସିଥିବା କୁହାଯାଉଥିବା ଏହି ଭୂତାଣୁ ଇତିମଧ୍ୟରେ ୨୪ରୁ ଊର୍ଦ୍ଧ୍ୱ ଦେଶକୁ ବ୍ୟାପିଛି। କରୋନା ଭୂତାଣୁ ଆତଙ୍କ ଯୋଗୁ ଚାଇନାରେ ଅନେକ କ୍ରୀଡ଼ା ଇଭେଣ୍ଟକୁ ବାତିଲ କରାଯାଇଛି। ସମସ୍ତ ଘରୋଇ ଫୁଟ୍ବଲକୁ ସସ୍ପେଣ୍ଡ କରାଯାଇଛି। ବାତିଲ ଅବା ସ୍ଥଗିତ ରଖାଯାଇଥିବା ଇଭେଣ୍ଟଗୁଡ଼ିକ ମଧ୍ୟରେ ରହିଛି ଓ୍ବାଲର୍ଡ ଇନ୍ଡୋର ଆଥଲେଟିକ୍ସ ଚାମ୍ପିୟନଶିପ୍, ଟୋକିଓ ଅଲିମ୍ପିକ୍ସ ବକ୍ସିଂ ଓ ମହିଳା ବାସ୍କେଟବଲ କ୍ୱାଲିଫାୟର୍ସ ଏବଂ ସାଇକ୍ଲିଂର ଟୁର୍ ଅଫ୍ ହେନାନ୍। ଚାଇନା ଓପନ ସ୍ନୁକର, ଚାଇନା ମାଷ୍ଟର୍ସ ବ୍ୟାଡ୍ମିଣ୍ଟନ ଏବଂ ଏଲପିଜିଏ ବ୍ଲୁ ବେ’ ଗଲ୍ଫ ଟୁର୍ନାମେଣ୍ଟ। ମାର୍ଚ୍ଚ ୨୧ରେ ହେବାକୁଥିବା ଚାଇନିଜ୍ ଫୁର୍ମଲା ଇ’ ଗ୍ରାଁପ୍ରିର ଆୟୋଜନ ନ କରିବାକୁ ରବିବାର ନିଷ୍ପତ୍ତି ନିଆଯାଇଛି।
