ମୁମ୍ବାଇ: ବଲିଉଡ୍ର ଆଇଡିଆଲ୍ କପୁଲ ଭାବେ ବେଶ୍ ଜଣାଶୁଣା କରିନା କପୁର ଖାଁ ଓ ଶୈଫ ଅଲ୍ଲି ଖାଁ। ଏମାନଙ୍କ ଯୋଡିକୁ ନେଇ ଅନେକ ସମୟରେ ଚର୍ଚ୍ଚା ହୋଇଥାଏ। ନିକଟରେ ନିଜର ରିଲେଶନକୁ ନେଇ ଖୋଲା ଖୋଲି କଥା ହୋଇଛନ୍ତି ଶୈଫ। କରିନାଙ୍କ ରେଡିଓ ଶୋ’ ସିଜନ -୨ରେ ଶୈଫ କରିନାଙ୍କ ସହ କରିଥିବା ଡେଟିଂକୁ ନେଇ କଥା ହୋଇଛନ୍ତି। ଶୈଫ କହିଛନ୍ତି ଯେତେବେଳେ ସେ କରିନାଙ୍କୁ ଡେଟିଂ କରୁଥିଲେ ସେତେବେଳେ ବଲିଉଡ୍ର ନାୟିକା ରାଣୀ ମୁଖାର୍ଜୀ ତାଙ୍କୁ କହିଥିଲେ କେବେବି ତୁମେ ଦୁହେଁ କେହି କାହାଠାରୁ କମ୍ ବୋଲି ଭାବିବ ନାହିଁ। ଏହାପରେ ଶୈଫ ତାଙ୍କ ମାତାପିତାଙ୍କ ସମ୍ପର୍କକୁ ନେଇ କଥା ହୋଇଥିଲେ। ସେ କହିଥିଲେ ତାଙ୍କ ମା’ ଶର୍ମିଳା ଟାଗୋର ଓ ପିତା ମନସୁର ଅଲ୍ଲି ଖାଁ ପଟୌଦିଙ୍କ ସମ୍ପର୍କ ପରେ ଏବେ ବିରାଟ କୋହଲି ଓ ଅନୁଷ୍କା ଶର୍ମାଙ୍କ ଯୋଡି ତାଙ୍କୁ ବେଶ୍ ପସନ୍ଦ ଆସେ। ଏମାନେ ତାଙ୍କ ମାତାପିତାଙ୍କ ଭଳି ଜଣେ କ୍ରିକେଟର ହୋଇଥିବା ବେଳେ ଅନ୍ୟଜଣେ କଳାକାର ଆଉ ଏମାନଙ୍କ ଯୋଡି ମଧ୍ୟ ଖୁବ୍ ଭଲ। ଶୈଫ କୁହନ୍ତି ତାଙ୍କ ମାତାପିତା ଅଲଗା ଅଲଗା ପ୍ରଫେଶନର ହୋଇ ମଧ୍ୟ ଜଣଙ୍କ ପାଇଁ କେତେବେଳେ ଅନ୍ୟ ଜଣଙ୍କ କାମରେ ବାଧା ସୃଷ୍ଟି ହେବା ସେ କେବେ ଦେଖି ନାହାନ୍ତି।
