ଢେଙ୍କାନାଳ ଅଫିସ, ୭ା୬-ସମ୍ବଲପୁର-ଦେବଗଡ଼ ଜିଲା ମଧ୍ୟବର୍ତ୍ତୀ ବାମରା ବନଖଣ୍ଡରୁ ଉଦ୍ଧାର ହୋଇଥିବା ହାତୀ ଶାବକ କପିଳାସ ଏଲିଫ୍ୟାଣ୍ଟ ରେସକ୍ୟୁ ସେଣ୍ଟରର ନୂତନ ସଦସ୍ୟ ପାଲଟିଛି। ଏକ ସ୍ବତନ୍ତ୍ର ମିନିଟ୍ରକ୍ରେ ଶୁକ୍ରବାର ଅପରାହ୍ନରେ ହାତୀ ଛୁଆକୁ ଅଣାଯାଇଛି। ହାତୀର ଆନୁମାନିକ ବୟସ ଦେଢ଼ବର୍ଷ ହୋଇଥିବାବେଳେ ବନ କର୍ମଚାରୀମାନେ ଏହାର ନାମ ରଖିଛନ୍ତି ‘ହିରୋ’।
ବାମରା ବନଖଣ୍ଡ ଅଞ୍ଚଳରେ ରୋଗାକ୍ରାନ୍ତ ମାଈ ହାତୀର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା। ହାତୀକୁ ଚିକିତ୍ସା କରାଯାଉଥିବା ସମୟରେ ଉକ୍ତ ଶାବକ ମା’ର ପାଖେ ପାଖେ ରହିଥିଲା। ସୁରକ୍ଷା ଦୃଷ୍ଟିରୁ ତାକୁ ଜଙ୍ଗଲକୁ ଛଡ଼ାଯିବା ପରିବର୍ତ୍ତେ କପିଳାସ ଏଲିଫ୍ୟାଣ୍ଟ ରେସ୍କ୍ୟୁ ସେଣ୍ଟରରେ ଲାଳନ ପାଳନ କରାଯିବାକୁ ନିଷ୍ପତ୍ତି ନିଆଯାଇଥିଲା।
ଏ ସଂକ୍ରାନ୍ତରେ ଡିଏଫ୍ଓ ସୁଦର୍ଶନ ପାତ୍ର କୁହନ୍ତି, ଅସୁସ୍ଥ ମା’ ହାତୀର ମୃତ୍ୟୁ ପରେ ବାମରା ବନଖଣ୍ଡରୁ ହାତୀ ଶାବକର ରକ୍ଷଣାବେକ୍ଷଣ ପାଇଁ କପିଳାସ ଅଣାଯାଇଛି। ଏହାର ସ୍ବାସ୍ଥ୍ୟ ଉପରେ ନଜର ରଖାଯାଇଛି। ସୂଚନାଯୋଗ୍ୟ, କପିଳାସ ଜୁ’ରେ କାର୍ତ୍ତିକ, ଉମା, ଚନ୍ଦୁ ନାମକ ୩ଟି ହାତୀ ଆକର୍ଷଣର କେନ୍ଦ୍ରବିନ୍ଦୁ ସାଜିଛନ୍ତି। ‘ହିରୋ’ର ଆଗମନ ପରେ ଏହି ସଂଖ୍ୟା ୪ରେ ପହଞ୍ଚତ୍ଛି। ଚିଡ଼ିଆଖାନାରେ କିଛିଦିନ ତଳେ ସ୍ବାସ୍ଥ୍ୟଗତ କାରଣରୁ ହାତୀ ଶାବକ ‘ରାଜା’ର ମୃତ୍ୟୁ ଘଟିଥିଲା।
