ବ୍ରିସ୍ବେନ,୨୨।୧୧- ପୂରା ଫର୍ମରେ ଥିବା ଓପନର ଡେଭିଡ୍ ଓ୍ବାନରଙ୍କ ୧୫୧ ରନ୍ର ଅପରାଜିତ ଇନିଂସ ବଳରେ ଏଠାରେ ପାକିସ୍ତାନ ବିପକ୍ଷରେ ଚାଲିଥିବା ପ୍ରଥମ ଟେଷ୍ଟର ପ୍ରଥମ ଇନିଂସରେ ଅଷ୍ଟ୍ରେଲିଆ ଇନିଂସ ଅଗ୍ରଣୀ ହାସଲ କରିଛି। ମ୍ୟାଚ୍ର ପ୍ରଥମ ଦିନ ଭ୍ରମଣକାରୀ ପାକିସ୍ତାନ ୨୪୦ ରନ୍ରେ ଅଲଆଉଟ୍ ହୋଇଥିଲା। ଦ୍ୱିତୀୟ ଦିନ ଶେଷ ପର୍ଯ୍ୟନ୍ତ ବ୍ୟାଟିଂ କରି ଅଷ୍ଟ୍ରେଲିଆ ୧ ଉଇକେଟ ହରାଇ ୩୧୨ ରନ୍ କରିଛି। ଫଳରେ ଘରୋଇ ଦଳ ପ୍ରଥମ ଇନିଂସରେ ୭୨ ରନ୍ର ଅଗ୍ରଣୀ ହାସଲ କରିଛି।
ଶନିବାର ଘରୋଇ ଦଳ ତା’ର ପ୍ରଥମ ଇନିଂସ ବ୍ୟାଟିଂ ଆରମ୍ଭ କରିଥିଲା। ଅଷ୍ଟ୍ରେଲିଆର ଡେଭିଡ୍ ଓ୍ବାର୍ନର ଓ ଜୋ ବନର୍ସଙ୍କ ଓପନିଂ ଯୋଡ଼ି ପ୍ରଥମ ଉଇକେଟ ପାଇଁ ୨୨୨ ରନ୍ କରିଥିଲେ। ପାକିସ୍ତାନ ଦଳର ଲମ୍ବା ପ୍ରତିକ୍ଷା ପରେ ୬୧ତମ ଓଭରରେ ମିଳିଥିଲା ପ୍ରଥମ ସଫଳତା। ଶତକ ଆଡ଼କୁ ଅଗ୍ରସର ହେଉଥିବା ବନର୍ସ(୯୭) ପାକିସ୍ତାନ ଲେଗ୍ ସ୍ପିନର ୟାସିର ଶାହଙ୍କ ବଲ ବୁଝି ନ ପାରି ବୋଲ୍ଡ ହୋଇଥିଲେ। ଆଉଟ୍ ହେବା ବେଳକୁ ସେ ଶତକରୁ ମାତ୍ର ୩ ରନ୍ ଦୂରରେ ଥିଲେ। ଏଥିପୂର୍ବରୁ କ୍ୟାରିୟରର ୨୨ତମ ଶତକ ପୂରଣ କରିଥିଲେ ଓ୍ବାର୍ନର। ଗତ ୧୮ ଇନିଂସରେ ଏହା ତାଙ୍କର ପ୍ରଥମ ଶତକ। ଏହିଠାରୁ ଓ୍ବାର୍ନର ଓ ମାର୍ନୁସ ଲାବୁସାନେଙ୍କ ଯୋଡ଼ି ଆଉ ପାକିସ୍ତାନ ବୋଲରଙ୍କୁ ଉଇକେଟ ନେବାର ସୁଯୋଗ ଦେଇ ନ ଥିଲେ। ଦ୍ୱିତୀୟ ଉଇକେଟ ଲାଗି ଉଭୟ ବ୍ୟାଟ୍ସମ୍ୟାନ ୯୦ ରନ୍ର ଅପରାଜିତ ଭାଗୀଦାରି କରିଛନ୍ତି। ମ୍ୟାଚ୍ରେ ଆଉ ୩ ଦିନ ବାକିଥିବାବେଳେ ଅଷ୍ଟ୍ରେଲିଆ ହାତରେ ୯ ଉଇକେଟ ରଖି ୭୨ ରନ୍ର ଇନିଂସ ଅଗ୍ରଣୀ ହାସଲ କରିଛି। ଷ୍ଟମ୍ପ ଅପସାରଣ ବେଳକୁ ଓ୍ବାର୍ନର ୧୫୧ ଓ ଲାବୁସାନେ ୫୫ ରନ୍ କରି ଅପରାଜିତ ଅଛନ୍ତି।
