ଓଡ଼ଗାଁ,୯ା୩(ସ୍ବ.ପ୍ର.): କିଛିଦିନର ବ୍ୟବଧାନ ପରେ ଓଡଗାଁ ଏନ୍ଏସି ସମେତ ନିକଟ ବଜାରକୁ ପୁଣି ଥରେ ଗୁଟ୍ଖା ଓ ପଲିଥିନ ଫେରିଥିବା ନେଇ ଚର୍ଚ୍ଚା ହେଉଛି। ପଲିଥିନ ପୂର୍ବପରି ବ୍ୟବହାର ହେଉଥିବା ବେଳେ ଦୋକାନ ବଜାର ଏପରି କି ଶିକ୍ଷାନୁଷ୍ଠାନ ଓ ସରକାରୀ ଅଫିସ ନିକଟରେ ଖୁଲମଖୁଲା ଗୁଟ୍ଖା ବିକ୍ରି ଚାଲିଛି। ସରକାରୀ ସ୍ତରରେ ଗୁଟ୍ଖା ବିକ୍ରି ଓ ପ୍ରସ୍ତୁତ ଉପରେ ନିଷେଧାଦେଶ ଜାରି କରାଯାଇଛି। ଏହାସହ ଗାନ୍ଧୀ ଜୟନ୍ତୀଠାରୁ ଏକକ ବ୍ୟବହୃତ ପ୍ଲାଷ୍ଟିକ, ପଲିଥିନ ବିକ୍ରି ଓ ବ୍ୟବହାରକୁ ସରକାର ନିଷିଦ୍ଧ ଘୋଷଣା କରିବା ସହିତ ପଲିଥିନ ମୁକ୍ତ ଅଭିଯାନର ଅୟମାରମ୍ଭ କରିଥିଲେ। ଏହା ପରେ ଏନ୍ଏସି ଓ ପୋଲିସ ତରଫରୁ ସ୍ଥାନୀୟ ବଜାରରେ ଚଢାଉ କରାଯାଇ ବହୁ ପରିୁମାଣର ପଲିଥିନ ଜବତ କରିବା ସହିତ ସେମାନଙ୍କୁ ଚେତାବନୀ ସଦୃଶ ପ୍ରାଥମିକ ସ୍ତରରେ ଆର୍ଥିକ ଦଣ୍ଡ ବିଧାନ କରାଯାଇଥିଲା। ହେଲେ କିଛିଦିନର ବ୍ୟବଧାନ ପରେ ପ୍ରଶାସନ ଏ ନେଇ କୋହଳ ମନୋଭାବ ଗ୍ରହଣ କରିଥିବାରୁ ସ୍ଥାନୀୟ ବଜାରରେ ବ୍ୟବସାୟୀ ପୁଣି ଥରେ ପଲିଥିନ ପ୍ରଚଳନ କରୁଥିବା ଦେଖାଯାଇଛି । ଏପରି କି ସ୍ଥାନୀୟ ରଘୁନାଥ ମନ୍ଦିର ଲକ୍ଷ୍ମୀବଜାରରେ ପ୍ରଚୁର ପରିମାଣର ଗୁଟ୍ଖା ଓ ପଲିଥିନ ମହଜୁଦ ରହିଥିବା ଚର୍ଚ୍ଚା ହେଉଛି । ରବିବାର ସ୍ଥାନୀୟ ବଜାରରୁ ଜଣେ ବ୍ୟବସାୟୀ ବେଆଇନ ଘୋଷଣା କରାଯାଇଥିବା ଏକବସ୍ତା ଗୁଟ୍ଖା ନେଉଥିବା ବେଳେ ହନୁମାନ ଛକରେ ବାଇକ୍ରୁ ଖସି ପଡିଥିଲା। ଘଟଣାସ୍ଥଳରେ ମୁତୟନ ଥିବା ପୋଲିସ ସମସ୍ତ ଗୁଟ୍ଖା ଜବତ କରିବା ସହିତ ସମ୍ପୃକ୍ତ ବ୍ୟବସାୟୀଙ୍କୁ ପଚରାଉଚୁରା କରିଥିଲା। ପୋଲିସ ଉକ୍ତ ଗୋଦାମ ସମ୍ପର୍କରେ ସୁରାକ ପାଇଥିବା ଜଣାଯାଇଛି । ଏ ନେଇ ଉପଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ପ୍ରକାଶ କରିଛି। ଅନ୍ୟପକ୍ଷେ ସ୍ଥାନୀୟ ଏନ୍ଏସିର ନିର୍ବାହୀ ଅଧିକାରୀ ଭାବେ ଯୁଗ୍ମ ଦାୟିତ୍ୱ ବହନ କରିଥିବା ନୟାଗଡ ପୌରାଞ୍ଚଳ ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ଅନୁରୂପ ଭାବେ ଆଗାମୀ ଦିନରେ ଚଢାଉକୁ ଜୋରଦାର କରିବାକୁ ସୂଚନା ଦେଇଛନ୍ତି।
