ଅମାନ,୧୧।୩(ପି.ଟି.)- ଅଲିମ୍ପିକ୍ ଯୋଗ୍ୟତା ହାସଲକାରୀ ବକ୍ସର ବିକାଶ କ୍ରିଷ୍ଣନ (୬୯ କେଜି)ଙ୍କୁ ଏସିଆ/ଓସେନିଆ କ୍ୱାଲିଫାୟର୍ସରେ ରୌପ୍ୟ ପଦକରେ ସନ୍ତୁଷ୍ଟ ହେବାକୁ ପଡ଼ିଛି। ଆଖିଜନିତ ଆହତ ସମସ୍ୟା ଯୋଗୁ ସେ ୬୯ କେଜି ଓଜନ ବର୍ଗର ଫାଇନାଲରୁ ଓହରି ଯାଇଛନ୍ତି। ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପିୟନ କ୍ରିଷ୍ଣନ ଜୋର୍ଡାନର ଜେୟାଦ ଇଶାହଙ୍କୁ ଭେଟିଥାନ୍ତେ। ଆଖି ନିକଟରେ ଆଘାତ ଲାଗିଥିବାରୁ ସେ ପ୍ରତିଦ୍ୱନ୍ଦ୍ୱିତା କରିବେ ନାହିଁ। ଡାକ୍ତରଙ୍କ ପରାମର୍ଶ ପରେ ସେ ଫାଇନାଲରୁ ଓହରିବାକୁ ନିଷ୍ପତ୍ତି ନେଇଛନ୍ତି ବୋଲି ସୂତ୍ରରୁ ଜଣାପଡ଼ିଛି। ସେ ସେମିଫାଇନାଲରେ ଦ୍ୱିତୀୟ ସିଡ୍ କାଜାଖସ୍ଥାନର ଆବଲାଇଖାନ ଝୁସୁପଭଙ୍କୁ ହରାଇଥିଲେ। ଏହି ମ୍ୟାଚ୍ର ଦ୍ୱିତୀୟ ରାଉଣ୍ଡରେ ତାଙ୍କ ବାମ ଆଖିର ତଳ ଭାଗରେ ଆଘାତ ଲାଗିଥିଲା। ଏହାସତ୍ତ୍ୱେ ସେ ମ୍ୟାଚ୍କୁ ଜିତି ଫାଇନାଲରେ ପ୍ରବେଶ କରିଥିଲେ। ତାଙ୍କ ବ୍ୟତୀତ ୬ ଜଣ ଭାରତୀୟ ବକ୍ସର ଚଳିତ କ୍ୱାଲିଫାୟର୍ସ ସେମିଫାଇନାଲରେ ସ୍ଥାନ ପାଇ ଟୋକିଓ ଅଲିମ୍ପିକ୍ସ ଟିକେଟ୍ ହାସଲ କରିଛନ୍ତି।
