ଭାରତରେ ଏବେ ବର୍ଜ୍ୟ ସମସ୍ୟା ବୃଦ୍ଧି ପାଉଥିବାବେଳେ ତାହାର ସମାଧାନ ଲାଗି ଯେଉଁ କେତେଜଣ ଆଗକୁ ଆସିଛନ୍ତି ସେମାନଙ୍କ ମଧ୍ୟରେ ଦିଲ୍ଲୀର ମାଧୁରୀ ବାହେଲାଡ଼ିଙ୍କ ପ୍ରୟାସ ପ୍ରଶଂସନୀୟ। ମାଧୁରୀ ବର୍ଜ୍ୟ କାଚ ବୋତଲ ପୁନଃବ୍ୟବହାର କରି ସେଥିରେ ଆକର୍ଷଣୀୟ ଘର ସାଜସଜ୍ଜା ଓ ଅନ୍ୟ ଉପଯୋଗୀ ଜିନିଷ ପ୍ରସ୍ତୁତ କରୁଛନ୍ତି। ସେ ଏକ ମିଡିଆ ସଂସ୍ଥାରେ କାମ କରୁଥିଲେ। ସେଠାରେ ଅମିତ ସିଂଙ୍କ ସହ ତାଙ୍କର ସାକ୍ଷାତ ହେବା ପରେ ଏଭଳି କାର୍ଯ୍ୟ କରିବାକୁ ନିଷ୍ପତ୍ତି ନେଇଥିଲେ। ସେମାନେ ୨୦୧୩ରେ ‘କବି ପୋଏଟ୍ରି ଆର୍ଟ ପ୍ରୋଜେକ୍ଟ’ ପ୍ରତିଷ୍ଠା କରି ଏହି କାର୍ଯ୍ୟ ଜାରି ରଖିଛନ୍ତି। ଫେସ୍ବୁକ କ୍ୟାମ୍ପେନରେ ତାଙ୍କ ଦ୍ୱାରା ପ୍ରସ୍ତୁତ ଜିନିଷଗୁଡ଼ିକ ଅଧିକ ଗ୍ରହଣୀୟ ହୋଇପାରିଛିି। ସେମାନଙ୍କ ଗ୍ରାହକ ସଂଖ୍ୟା ଏବେ ୮୦,୦୦୦ରୁ ଊର୍ଦ୍ଧ୍ୱରେ ପହଞ୍ଚିସାରିଲାଣି। ପ୍ରାୟ ୧୦୦ କର୍ପୋରେଟ ହାଉସରେ ସେମାନଙ୍କ ଦ୍ୱାରା ପ୍ରସ୍ତୁତ ସାମଗ୍ରୀ ଶୋଭାପାଉଛି। ଅଦରକାରୀ କାଚ ବୋତଲ ସହ ସେମାନେ ଅନ୍ୟ ବର୍ଜ୍ୟର ପୁନଃ ଉପଯୋଗ ମଧ୍ୟ କରୁଛନ୍ତି। ଏହି କାର୍ଯ୍ୟ କରି ଏବେ ସୁଦ୍ଧା ସେମାନେ ୧୪୦ ଟନ୍ ଅଣ-ବିଘଟନ ଯୋଗ୍ୟ ବର୍ଜ୍ୟର ଉପଯୋଗ କରିସାରିଲେଣି।
