ଦିବ୍ୟାଙ୍ଗ ବି ଚାଷରେ ପାରଙ୍ଗମ ହୋଇପାରନ୍ତି ଯାହା ପ୍ରମାଣ କରିଛନ୍ତି କର୍ନାଟକର ଜେ. ରାମକୃଷ୍ଣ। ମାଣ୍ଡ୍ୟ ଅଞ୍ଚଳର ରାମକୃଷ୍ଣଙ୍କୁ ୨ ବର୍ଷ ବୟସ ହୋଇଥିବାବେଳେ ସେ ପୋଲିଓ ଆକ୍ରାନ୍ତ ହୋଇଥିଲେ। ପରେ ଶିକ୍ଷା ଲାଭ କରି କର୍ନାଟକ ପ୍ରାଥମିକ ଶିକ୍ଷା ବିଭାଗରେ ସେ ଚାକିରି କରିଥିଲେ। ଚାକିରି ଛାଡି ଛତୁଚାଷକୁ ଗ୍ରହଣ କରିବା ତାଙ୍କ ପାଇଁ ଏକ ଆହ୍ବାନ ଥିଲା। ତେବେ ସେ ସବୁ ବାଧା ଟାଳି ଦେଇ ଛତୁଚାଷରୁ ପ୍ରଚୁର ଲାଭ କରିବା ସହ ବିଭିନ୍ନ ପୁରସ୍କାର ପାଇପାରିଛନ୍ତି। କେବଳ ଏତିକି ନୁହେଁ, ସେ ଇନ୍ଷ୍ଟିଚ୍ୟୁଟ ଅଫ୍ ମସ୍ରୁମ ସାଇନ୍ସ ପ୍ରତିଷ୍ଠାନ ଗଢି ଛତୁ ଚାଷୀମାନଙ୍କୁ ଶିକ୍ଷା ଦେଉଛନ୍ତି। ଏଠାରେ ରାମକୃଷ୍ଣ ଶୁଖିଲା ଛତୁ ଗୁଣ୍ଡରୁ ପାମ୍ପଡ଼, ବିସ୍କୁଟ୍, ରସମ୍ ଗୁଣ୍ଡ ଆଦି ୨୦ଟି ଉପତ୍ାଦ ପ୍ରସ୍ତୁତ କରି ବିକ୍ରି କରୁଛନ୍ତି। ଏହା ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ ଓ ଶ୍ରମ ବିକାଶ ବିଭାଗ ଦ୍ୱାରା ସ୍ବୀକୃତି ଲାଭ କରିଛି। ଏହି ପ୍ରତିଷ୍ଠାନରେ ଛତୁଚାଷ ଲାଗି କିଟ୍ ତିଆରି କରାଯାଇ ଚାଷୀମାନଙ୍କୁ ଯୋଗାଇ ଦିଆଯାଉଛି। ଏହାଦ୍ୱାରା ମାଣ୍ଡ୍ୟ, ଟୁମାକୁରା, ମହୀଶୂର ଏବଂ ଅନ୍ୟ ଜିଲାରେ ୩୦୦ରୁ ଊର୍ଦ୍ଧ୍ୱ ଚାଷୀ ଏହି ସଂସ୍ଥା ଅଧୀନରେ ଚାଷ ଆରମ୍ଭ କରିଛନ୍ତି। ରାମକୃଷ୍ଣ ତାଙ୍କ ଗାଁ ତଥା ଆଖପାଖ ଗାଁରେ ବି ୩୦୦ ଚାଷୀଙ୍କୁ ଛତୁଚାଷ କରିବା ଲାଗି ସାହାଯ୍ୟ କରୁଛନ୍ତି। ଆସନ୍ତା କିଛି ବର୍ଷ ମଧ୍ୟରେ ଛତୁଚାଷ କୌଶଳକୁ ସେ ୫ ହଜାର ଚାଷୀଙ୍କ ନିକଟରେ ପହଞ୍ଚାଇବା ଲାଗି ଲକ୍ଷ୍ୟ ରଖିଛନ୍ତି।
