ଅହମ୍ମଦାବାଦ, ୧୪ା୭ (ପି.ଟି.)-ଏଠାରେ ଚାଲିଥିବା ଇଣ୍ଟରକଣ୍ଟିନେଣ୍ଟାଲ କପ୍ ଫୁଟ୍ବଲ ଟୁର୍ନାମେଣ୍ଟରେ ଉତ୍ତର କୋରିଆ ନିକଟରୁ ଭାରତ ୨-୫ ଗୋଲରେ ପରାସ୍ତ ହୋଇଛି। ପ୍ରତିଯୋଗିତାରେ ଦଳର ଏହା କ୍ରମାଗତ ଦ୍ୱିତୀୟ ପରାଜୟ। ଶନିବାର ଖେଳାଯାଇଥିବା ଏହି ମ୍ୟାଚରେ ଉତ୍ତର କୋରିଆ ତରଫରୁ ଜଙ୍ଗ୍ ଇଲ୍ ଗ୍ବାନ (୮ମ ଓ ୨୯ତମ), ରି ଉନ୍ ଚୋଲ୍ (୬୩ତମ) ଓ ରି ଜିନ୍ (୯୦+୨) ଗୋଲ ସ୍କୋର କରିଥିବାବେଳେ ଭାରତ ପକ୍ଷରୁ ଲାଲିଆନଜୁଆଲା ଛାଙ୍ଗ୍ଟେ (୫୧ତମ) ଏବଂ ଅଧିନୟକ ସୁନୀଲ ଛେତ୍ରୀ (୬୧ତମ) ଗୋଟିଏ ଲେଖାଏଁ ଗୋଲ ଦେଇଥିଲେ। ଏହି ପରାଜୟ ଦ୍ୱାରା ଭାରତ ପଏଣ୍ଟ ଟେବୁଲର ସର୍ବନିମ୍ନ ସ୍ଥାନରେ ରହିବା ସହ ଫାଇନାଲ ଖେଳିବା ଆଶା କ୍ଷୀଣ ହୋଇଯାଇଛି। ତାଜିକ୍ସ୍ତାନ ଦୁଇଟି ବିଜୟରୁ ୬ ପଏଣ୍ଟ ଲାଭ କରି ପଏଣ୍ଟ ଟେବୁଲର ଶୀର୍ଷରେ ରହିଥିବାବେଳେ ସିରିଆ ଓ ଉତ୍ତର କେରିଆ ପ୍ରତ୍ୟେକ ୩ ପଏଣ୍ଟ ଲେଖାଏଁ ପାଇଛନ୍ତି। ଗତଥରର ଚାମ୍ପିୟନ ଭାରତକୁ ଫାଇନାଲ ଖେଳିବାକୁ ହେଲେ ଗୋଟିଏ ରାସ୍ତା ରହିଛି। ଜୁଲାଇ ୧୫ରେ ତାଜିକ୍ସ୍ତାନ ବିପକ୍ଷ ମ୍ୟାଚରେ ଉତ୍ତର କୋରିଆ ଯଦି ପରାଜୟ ବରଣ କରେ ଏବଂ ଘରୋଇ ଦଳ ଜୁଲାଇ ୧୬ରେ ସିରିଆ ବିପକ୍ଷ ମ୍ୟାଚ ବୃହତ୍ ବ୍ୟବଧାନରେ ବିଜୟ ଲାଭ କରେ ତେବେ ଯାଇ ସମ୍ଭବ ହେବ। କିନ୍ତୁ ଦଳର ବର୍ତ୍ତମାନ ଫର୍ମକୁ ଦେଖିଲେ ତାହା ସମ୍ଭବ ହେଲା ଭଳି ମନେ ହେଉନାହିଁ।
