ଭୋଗରାଇ, ୧୦।୧(ଡି.ଏନ.ଏ.): ପଶ୍ଚିମବଙ୍ଗ ଦକ୍ଷିଣ ୨୪ ପ୍ରଗଣା ଜିଲା ସାଗରଦ୍ୱୀପରେ ଏବେଠୁ ଜମିଉଠିଛି ସାଗରମେଳା। ଏହି ମେଳାକୁ ଲକ୍ଷାଧିକ ପୁଣ୍ୟାର୍ଥୀ ଆଗମନରେ ସୂଚନା ମିଳିବା ପରେ ପ୍ରଶାସନ ତପତ୍ର ହୋଇପଡ଼ିଛି। କୋଲକାତା ଗଙ୍ଗା ନଦୀ ବାବୁଘାଟ, ଧର୍ମତଳା, ସିଆଲଦାଠାରେ ଗଙ୍ଗାସାଗରକୁ ଆଗତ ତୀର୍ଥଯାତ୍ରୀମାନେ ବିଭିନ୍ନ ସ୍ବେଚ୍ଛାସେବୀ କ୍ୟାମ୍ପରେ ଆଶ୍ରୟ ନେଇଛନ୍ତି। ରବିବାରଠାରୁ ସାଗରମେଳା ଆରମ୍ଭ ହୋଇଥିବା ବେଳେ ଗଙ୍ଗାସାଗର ପ୍ରବେଶ ପଥ କଚୁବେଡ଼ିଆ, ଚେମାଗଡ଼ି, ଲଟ୍ ନଂ.୮, କାକଦ୍ୱୀପ ଓ ନାମଖାନାରେ ପ୍ରତ୍ୟେକ ତୀର୍ଥଯାତ୍ରୀଙ୍କ ସ୍ବାସ୍ଥ୍ୟବସ୍ଥା ପରୀକ୍ଷା କରାଯାଉଛି। କଚୁବେଡ଼ିଆରୁ ଗଙ୍ଗାସାଗର ୨୯କି.ମି. ଓ ଚେମାଗଡ଼ିରୁ ଗଙ୍ଗାସାଗର ୧୦କି.ମି. ପର୍ଯ୍ୟନ୍ତ ତୀର୍ଥଯାତ୍ରୀଙ୍କ ସକାଶେ ରାସ୍ତାର ଉଭୟ ପାର୍ଶ୍ୱରେ ବ୍ୟାରିକେଡ୍ ସହିତ ଉଜ୍ୱଳ ଆଲୋକ ବ୍ୟବସ୍ଥା କରାଯାଉଛି। ଦୁଇଦିନ ମଧ୍ୟରେ ଗଙ୍ଗାସାଗରକୁ ୫୦ହଜାରରୁ ଊର୍ଦ୍ଧ୍ୱ ପୁଣ୍ୟାର୍ଥୀ ସମୁଦ୍ରସ୍ନାନ କରିବା ସହିତ ପ୍ରସିଦ୍ଧ କପିଳମୁନି ମନ୍ଦିରରେ ପୂଜାର୍ଚ୍ଚନା କରି ଘର ବାହୁଡ଼ା ହୋଇଥିବା ଜିଲା ଶାସକ ସୁମିତ ଗୁପ୍ତା ଧରିତ୍ରୀକୁ ସୂଚନା ଦେଇଛନ୍ତି। ଗଙ୍ଗାସାଗର ମେଳାରେ ବହୁ ଧର୍ମୀୟ ଅନୁଷ୍ଠାନରେ ସାଧୁ, ସନ୍ଥ ଓ ନାଗା ସନ୍ନ୍ୟାସୀମାନେ ଆସ୍ଥାନ ଜମାଇଛନ୍ତି। କଡ଼ା ନିରାପତ୍ତା ମଧ୍ୟରେ ତୀର୍ଥଯାତ୍ରୀଙ୍କ ସୁରକ୍ଷା, ସ୍ବାସ୍ଥ୍ୟ ଓ ବାସସ୍ଥାନ ଉପରେ ଗୁରୁତ୍ୱ ଦିଆଯାଇଛି। ଗଙ୍ଗାସାଗର ମେଳାକୁ ଆଗତ ତୀର୍ଥଯାତ୍ରୀଙ୍କ ସକାଶେ କଚୁବେଡ଼ିଆ, ଚେମାଗଡ଼ିରୁ ଶତାଧିକ ବସ୍ ଓ ଅନ୍ୟାନ ଯାତ୍ରୀବାହୀ ଗାଡ଼ି ଉପଲବ୍ଧ ହୋଇଛି। ମେଳାକୁ ପ୍ଲାଷ୍ଟିକମୁକ୍ତ, ସ୍ବଚ୍ଛ ଓ ସତେଜ ରଖାଯିବାକୁ ସ୍ବେଚ୍ଛାସେବୀ ଅନୁଷ୍ଠାନକୁ ନିର୍ଦ୍ଦେଶ ଦିଆଯାଇଛି। ମେଳାରେ କୌଣସି ଆମତ୍ୀୟସ୍ବଜନ ନିଖୋଜ ହେଲେ ସାଗରବନ୍ଧୁ ନାମିତ ସ୍ବେଚ୍ଛାସେବୀ ଅନୁଷ୍ଠାନ ନଜର ରଖିବା ସହିତ ସୂଚନା କେନ୍ଦ୍ରର ସହାୟତା ନେବାକୁ ପରାମର୍ଶ ଦିଆଯାଇଛି। ପଶ୍ଚିମବଙ୍ଗ ରାଜ୍ୟପାଳ ଓ ତାଙ୍କ ସ୍ତ୍ରୀ ଗଙ୍ଗାସାଗରରେ ଦୁଇଦିନ ଅବସ୍ଥାନ କରି କୋଲକାତା ଫେରିଥିବା ସୂଚନା ମିଳିଛି। ପୁରୀ ଗୋବର୍ଦ୍ଧନ ପୀଠର ଜଗତ୍ଗୁରୁ ଶଙ୍କରାଚାର୍ଯ୍ୟ ଶ୍ରୀମତ୍ ନିଶ୍ଚଳାନନ୍ଦ ସରସ୍ବତୀ ଗଙ୍ଗାସାଗରକୁ ଯାଉଥିବା ଆଦିତ୍ୟବାହିନୀ ପକ୍ଷରୁ କୁହାଯାଇଛି।
