Posted inଖେଳ

ଆଂଶିକାଙ୍କ ଉପରେ ନଜର ରଖିଛନ୍ତି ଅନୁରାଧା

ଭୁବନେଶ୍ୱର, ୧୪।୪(କ୍ରୀଡ଼ା ପ୍ରତିନିଧି)-
ଓଡ଼ିଶାର ଉଦୀୟମାନ ଆଥଲେଟ୍‌ ଆଂଶିକା ରାଉତରାୟ। ପାଠପଢ଼ା ସହ ଶଟ୍‌ପୁଟ୍‌କୁ କ୍ୟାରିୟର କରୁଥିବା ଆଂଶିକାଙ୍କ ଉପରେ ଏବେ ମା’ ଅଲିମ୍ପିଆନ ଅନୁରାଧା ବିଶ୍ୱାଳଙ୍କ ତୀକ୍ଷ୍‌ଣ ନଜର। କାରଣ ସାଇ ଇଣ୍ଟରନ୍ୟାଶନାଲ ସ୍କୁଲରେ ପଢ଼ୁଥିବା ଆଂଶିକା ପଢ଼ା ସହ ସର୍ବଦା ଶଟ୍‌ପୁଟ ଅଭ୍ୟାସ ଏବଂ ଜୁନିୟର ସ୍ତରରେ କିଛି ନା କିଛି ପ୍ରତିଯୋଗିତା ପାଇଁ ବ୍ୟସ୍ତ ରହିଥାନ୍ତି। ମାତ୍ର ଏବେ କରୋନା ଭାଇରସ୍‌ ସଂକ୍ରମଣ କାରଣରୁ ସବୁକିଛି ବନ୍ଦ। ସମ୍ପୂର୍ଣ୍ଣ ଦେଶ ଲକ୍‌ଡାଉନ୍‌ରେ ଥିବାରୁ ବାହାରକୁ ବାହାରିବା ସମ୍ଭବ ନୁହେଁ। ଏହାର ଗୁରୁତ୍ୱକୁ ଆଂଶିକା ଯେତିକି ବୁଝିଛନ୍ତି ତା’ଠାରୁ ଅଧିକ ବୁଝିଛନ୍ତି ହର୍ଡଲ୍ସ କୁଇନ୍‌ ଅନୁରାଧା। ଘରେ ବାନ୍ଧି ହୋଇ ରହିବା କାରଣରୁ ଆଂଶିକାଙ୍କ ପିଲାମନ ବିଚଳିତ ହେବା ସମ୍ଭାବନା ରହିଛି। ତେଣୁ ସେ ସକାଳୁ ସନ୍ଧ୍ୟା ପର୍ଯ୍ୟନ୍ତ ନିଜ ପାଇଁ ଏବଂ ଆଂଶିକାଙ୍କ ପାଇଁ ରୁଟିନ୍‌ ପ୍ରସ୍ତୁତ କରିଛନ୍ତି। ଫଳରେ ବର୍ତ୍ତମାନ ପର୍ଯ୍ୟନ୍ତ ସବୁକିଛି ଠିକ୍‌ ଚାଲିଛି ବୋଲି ପ୍ରକାଶ କରିଛନ୍ତି ଅନୁରାଧା ।
”ନାଲ୍‌କୋ କଲୋନୀରେ ଆମ କ୍ବାର୍ଟର ନିକଟରେ ଏକ ଛୋଟ ପଡ଼ିଆ ରହିଛି। ସେଠାରେ ସକାଳେ ଆଂଶିକାଙ୍କୁ ନେଇ ଫିଟ୍‌ନେସ ଟ୍ରେନିଂ କରାଉଛି। କାରଣ ତାଙ୍କ ପାଇଁ ବର୍ତ୍ତମାନ ପରିସ୍ଥିତିରେ ଫିଟ୍‌ନେସ ବଜାୟ ରଖିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେହି ପଡ଼ିଆରେ ୱାର୍ମଅପ୍‌, ୱେଟ୍‌ ଟ୍ରେନିଂ, ହର୍ଡଲ୍ସ ଜମ୍ପ, ଶଟ୍‌ପୁଟ ଫ୍ରଣ୍ଟ ଥ୍ରୋ, ବ୍ୟାକ୍‌ ଥ୍ରୋ, ଡିସ୍‌କସ୍‌ ଏକ୍ସରସାଇଜ୍‌ ଆଦି କରାଯାଉଛି। ଏହା ବ୍ୟତୀତ ଏଣ୍ଡୁରାନ୍ସ ପାୱାର ବଢ଼ାଇବା ପାଇଁ କ୍ରମାଗତ ରନିଂ କରାଉଛି। ପାଗ ଦେଖି କାର୍ଯ୍ୟସୂଚୀରେ ପରିବର୍ତ୍ତନ କରିବାକୁ ପଡ଼ୁଛି। ଦର୍ଶମ ସିବିଏସଇ ବୋର୍ଡ ପରୀକ୍ଷା ସରିଯାଇଥିବାରୁ ଏବେ ହଠାତ୍‌ ପାଠ ଚିନ୍ତା ବେଶି ନାହିଁ। ପଢ଼ାରୁ ଚିନ୍ତାମୁକ୍ତ ଥିବାରୁ ଏ ଦିଗରେ ସେ ବେଶି ଧ୍ୟାନ ଦେଇ ପାରୁଛନ୍ତି। ଏହା ବ୍ୟତୀତ ଯୋଗ ଏବଂ ପ୍ରାଣାୟମ ମଧ୍ୟ ଆମେ କରାଉଛୁ। ମନ ଶାନ୍ତ ଥିଲେ ଜଣେ ନିଶ୍ଚିତ ଭଲକଥା ଚିନ୍ତା କରିପାରିବ। ଆମେ ତା’ ଉପରେ ମଧ୍ୟ ଗୁରୁତ୍ୱ ଦେଉଛୁ।ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି ଅଭ୍ୟାସ ପରେ ହେଉ କିମ୍ବା ପ୍ରତିଟି କାର୍ଯ୍ୟକଳାପ ପରେ ପିଲାମାନେ ଯେପରି ହାତ ଧୁଅନ୍ତି ତା’ ଉପରେ ଗୁରୁତ୍ୱ ଦେଉଛୁ। ସେମାନଙ୍କୁ ଏହା ବାରମ୍ବାର ମଧ୍ୟ ଶିଖାଉଛୁ। ମୋଟାମୋଟି କହିବାକୁ ଗଲେ ଆଂଶିକାଙ୍କ ମନରେ ଯେପରି ଅନ୍ୟ କିଛି କଥା ନ ପଶିବ ସେଥିପ୍ରତି ଆମେ ଧ୍ୟାନ ଦେଉଛୁ। ଗଛ ଲଗାଇବା ଏବଂ ଲାଗିଥିବା ଗଛରେ ପାଣିଦେବା ଆଦି କାର୍ଯ୍ୟରେ ତାଙ୍କୁ ନିୟୋଜିତ କରୁଛୁ। ମୋ ସମୟରେ ମୁଁ ପାଇଥିବା ବିଭିନ୍ନ ସଫଳତାର ପେପର କଟିଂ ରହିଛି। ଏବେ ସମୟ ମିଳୁଥିବାରୁ ସେଗୁଡ଼ିକୁ ଆଂଶିକାଙ୍କୁ ଦେଖାଉଛି। ସେ ସେଥିରୁ ପ୍ରେରଣା ପାଉଛନ୍ତି ଏବଂ ଉତ୍ସାହିତ ମଧ୍ୟ ହେଉଛନ୍ତି। ”ମୋ ମା’ ଏପରି ସମ୍ମାନ ପାଇଥିଲେ, ମୁଁ ମଧ୍ୟ ଏପରି କିଛି ରାଜ୍ୟ କିମ୍ବା ଦେଶ ପାଇଁ କରିବି“ ବୋଲି ତାଙ୍କ ମନରେ ଭାବନା ଆସୁଛି। ଯାହାକି ବହୁତ ଭଲ କଥା ବୋଲି ଅନୁରାଧା ପ୍ରକାଶ କରିଛନ୍ତି। ଏ ସବୁ କାର୍ଯ୍ୟ ସହ ଛୋଟ ପୁଅକୁ ଭିଡିଓ ଗେମ୍‌ ଖେଳାଇବା, ପେଣ୍ଟିଂ ଶିଖାଇବାରେ ସମୟ ଯାଉଛି। ପୁରୁଣା ମ୍ୟୁଜିକ୍‌ ଶୁଣିବାରେ ମୁଁ ରୁଚି ରଖେ। ରୋଷେଇ ହେଉ କିମ୍ବା ଅନ୍ୟ ଯେଉଁ କାର୍ଯ୍ୟ ମ୍ୟୁଜିକ୍‌ ବାଜୁଥିଲେ ମତେ ଭଲ ଲାଗେ। ବିଶେଷ କରି ୮୦ଦଶକର ମ୍ୟୁଜିକ୍‌ ଶୁଣି ମୁଁ ଆନନ୍ଦ ପାଇଥାଏ। ଏହା ବ୍ୟତୀତ ସମୟ ମିଳିଲେ ପରିବାରର ସଦସ୍ୟମାନେ ବସି କ୍ୟାରମ ଖେଳିଥାଉ ବୋଲି ସେ କହିଛନ୍ତି।
ଅନୁରାଧାଙ୍କ କହିବା ଅନୁସାରେ ସକାଳେ ନିତ୍ୟକର୍ମ ଶେଷ କରି ସେ କିଛି ସମୟ ଶାରୀରିକ ବ୍ୟାୟାମ କରିଥାନ୍ତି । ଆଂଶିକାଙ୍କୁ ମଧ୍ୟ ଏଥିରେ ସାମିଲ କରିଥାନ୍ତି। ଏହାପରେ ଅନ୍ୟାନ୍ୟ କାର୍ଯ୍ୟ ସାରିବା ସହ ଫୁଲ ତୋଳିି ସାଇବାବାଙ୍କୁ ପୂଜା କରିଥାନ୍ତି। ବିଶ୍ୱରୁ ଏହି ରୋଗ କିପରି ଶିଘ୍ର ଅପସରିଯାଉ ବୋଲି ପ୍ରାର୍ଥନା କରିଥାନ୍ତି। କାରଣ ତାଙ୍କ ମତରେ ଜୀବନଠାରୁ ଆଉ କିଛି ମୂଲ୍ୟବାନ ନାହିଁ। ତା’ପରେ ସେ ଇ-ପେପର ପଢ଼ି ରାଜ୍ୟ ତଥା ଦେଶ ବିଦେଶର ଖବର ଉପରେ ନଜର ପକାଇ ଥାଆନ୍ତି। ପ୍ରତିକୂଳ ପରିସ୍ଥିତିରେ ମଧ୍ୟ ଖବର ପରିବେଷଣ ଜାରି ରଖୁଥିବାରୁ ଏହି ଅବସରରେ ଗଣମାଧ୍ୟମ ପ୍ରତିନିଧିଙ୍କୁ ସେ ସାଲ୍ୟୁଟ କରିଛନ୍ତି। ଏହା ବ୍ୟତୀତ ଏହି ଅବସରରେ ସେ ପୋଲିସ ଏବଂ ମେଡିକାଲ ଟିମ୍‌କୁ ସେ ଧନ୍ୟବାଦ ଜଣାଇଛନ୍ତି। ରୋଷେଇ କଥା କହିଲେ ଆମେ କ୍ରୀଡ଼ାବିତ୍‌ ପରିବାର ହୋଇଥିବାରୁ ନନ୍‌ଭେଜ୍‌କୁ ଅଧିକ ପସନ୍ଦ କରିିଥାଉ। ତେଣୁ ଚିଲି ଚିକେନ ମୋର ଅଧିକ ପସନ୍ଦ ଏବଂ ଏହି ରୋଷେଇକୁ ମୁଁ ଏବେ ଭଲଭାବେ ଶିଖିଯାଇଛି। ଚିକେନ ବିରିୟାନି ମଧ୍ୟ ପ୍ରସ୍ତୁତ କରୁଛି। ଏହା ବ୍ୟତୀତ ଭେଜ୍‌ ଆଇଟମ୍‌ରେ ପନିର କ୍ୟାପ୍ସିକମ୍‌କୁ ପସନ୍ଦ କରୁଛି। ମୁଖ୍ୟତଃ ପ୍ରୋଟିନ୍‌ଯୁକ୍ତ ଖାଦ୍ୟକୁ ଆମେ ଗୁରୁତ୍ୱ ଦେଉଛୁ । ରୋଷେଇ ଏବଂ ପ୍ରତିଟି କାର୍ଯ୍ୟରେ ମୋ ସ୍ବାମୀ ପରମାନନ୍ଦ ରାଉତରାୟ ମୋତେ ସାହାଯ୍ୟ କରୁଛନ୍ତି ।
କରୋନା ବିଶ୍ୱ ମହାମାରୀ ଘୋଷଣା ହୋଇଛି, ଅର୍ଥାତ୍‌ ଆମେ ଘରେ ଯେତେ ରହିବା ସେତେ ସୁରକ୍ଷିତ ରହିପାରିବା । ଏଥିପାଇଁ ବାରମ୍ବାର ସଚେତନ କରାଯାଉଛି। ତେଣୁ ଅନ୍ୟମାନଙ୍କ ପରି ଆମେ ମଧ୍ୟ ଗୋଟିଏ ସ୍ଥାନରେ ରହିଛୁ। ବ୍ୟସ୍ତ ବହୁଳ ଜୀବନ ଯୋଗୁ ଆମେ କେବେହେଲେ ପରିବାର ପ୍ରତି ଅଧିକ ସମୟ ଦେଇ ପାରୁନାହୁଁ। ମାତ୍ର ଏବେ ସେହି ସମୟ ଆସିଛି। ଏଥିରୁ ଫାଇଦା ମଧ୍ୟ ମିଳୁଛି। ଉଦାହରଣ ସ୍ବରୂପ ମୁଁ ନାଲ୍‌କୋରେ କାର୍ଯ୍ୟରତ ଥିବାରୁ ଖେଳ ଜୀବନ ପରେ ଅଫିସ କାର୍ଯ୍ୟରେ ବ୍ୟସ୍ତ ରହୁଥିଲି। ଫଳରେ ଆଜି ପର୍ଯ୍ୟନ୍ତ ଭଲ ରୋଷେଇ ମଧ୍ୟ ଶିଖିପାରି ନ ଥିଲି। ଏବେ ଘରେ ଶାଶୁ ଥିବାରୁ ମୁଁ ତାଙ୍କ ନିକଟରୁ କିଛି ରୋଷେଇ ଶିଖିଯାଇଛି। ଏବେ ସମସ୍ତେ ଘରେ ରହୁଥିବାରୁ ପରସ୍ପରକୁ ସାହାଯ୍ୟ କରୁଛନ୍ତି। ଏହା ବ୍ୟତୀତ ଦୂରଦର୍ଶନରେ ରାମାୟଣ ଓ ମହାଭାରତ ସିରିୟଲ ଦେଉଥିବାରୁ ପିଲାମାନେ ଶାଶୁଙ୍କ ନିକଟରେ ବସି ଏହାକୁ ଉପଭୋଗ କରିବା ସହ ବିଭିନ୍ନ କଥା ପଚାରି ବୁଝୁଛନ୍ତି ଏବଂ କିଛି ଶିଖୁଛନ୍ତି, ଯାହାକି ତାଙ୍କ ପାଇଁ ଭବିଷ୍ୟତରେ ନିଶ୍ଚିତ ଉପକାରରେ ଆସିବ ବୋଲି ମହିଳା ହର୍ଡଲ୍ସରେ ଜାତୀୟ ରେକର୍ଡଧାରିଣୀ ଅନୁରାଧା ପ୍ରକାଶ କରିଛନ୍ତି।


Enter your email to get our daily news in your inbox.

All Right Reserved By Dharitri.Com

Posted inଖେଳ View All

ପରିବାର ସହ ପ୍ରଥମ ଆଇପିଏଲ ଫିଫ୍ଟିର ଉତ୍ସବ ପାଳିଲେ ଧ୍ରୁବ, ଭିଡିଓକୁ ମିଳୁଛି ଖୁବ ପ୍ରଶଂସା

ନୂଆଦିଲ୍ଲୀ,୨୮।୪: ଶନିବାର ଆଇପିଏଲ ୨୦୨୪ର ୪୪ ତମ ମ୍ୟାଚରେ ରାଜସ୍ଥାନ ରୟାଲ୍ସ ୱିକେଟ କିପର ବ୍ୟାଟ୍ସମ୍ୟାନ ଧ୍ରୁବ ଜୁରେଲ ଲକ୍ଷ୍ନୌ ସୁପରଜିଆଣ୍ଟସ ବିପକ୍ଷରେ ଆଇପିଏଲ କ୍ୟାରିୟରର...

ଲଜ୍ଜାଜନକ ରେକର୍ଡ ହାସଲ କଲେ ମୁମ୍ବାଇ ଇଣ୍ଡିଆନ୍ସର ଏହି କ୍ରିକେଟର୍‌

ନୂଆଦିଲ୍ଲୀ,୨୮।୪: ଆଇପିଏଲ ୨୦୨୪ରେ ୪୩ତମ ମ୍ୟାଚ ମୁମ୍ବାଇ ଇଣ୍ଡିଆନ୍ସ ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଖେଳାଯାଇଥିଲା। ଅରୁଣ ଜେଟଲୀ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ମୁମ୍ବାଇକୁ ୧୦...

ଭାରତକୁ ଓ୍ବାର୍ଲଡ କପ ଜିତାଇ ଥିବା ଏବେ ପାକିସ୍ତାନର କୋଚ, ପିସିବି ଦେଲା ଏହି ଦାୟିତ୍ୱ

ନୂଆଦିଲ୍ଲୀ,୨୮।୪: ଟି -୨୦ ବିଶ୍ୱକପ ୨୦୨୪ପୂର୍ବରୁ ପାକିସ୍ତାନ ଦଳ ତା’ର କୋଚ ବଦଳାଇଛି । ହ୍ବାଇଟ ବଲ ଫର୍ମାଟ (ଓ୍ବାନଡେ ଏବଂ ଟି ୨୦) ରେ...

ପ୍ଲେ ଅଫ୍‌ ରେସ୍‌ ହେଉଛି ରୋଚକ: ଏପର୍ଯ୍ୟନ୍ତ ସମସ୍ତ ଦଳ ପାଇଁ ରାସ୍ତା ଖୋଲା

ନୂଆଦିଲ୍ଲୀ,୨୮।୪: ଆଇପିଏଲ ୨୦୨୪ରେ ପ୍ଲେ ଅଫ ପାଇଁ ଯୋଗ୍ୟତା ଅର୍ଜନ କରୁଥିବା ଦଳର ଚିତ୍ର ସ୍ପଷ୍ଟ ହୋଇନାହିଁ। ୧୬ ପଏଣ୍ଟ ସହ ଏକ ନମ୍ବରରେ ଥିବା...

ଟି-୨୦ ଓ୍ବାର୍ଲଡ କପ ପାଇଁ ଭାରତୀୟ ଟିମ ଚୟନ କଲେ ହରଭଜନ, ମୟଙ୍କ ଯାଦବଙ୍କୁ ସାମିଲ କରି ସମସ୍ତଙ୍କୁ ଚମକାଇ ଦେଲେ

ନୂଆଦିଲ୍ଲୀ,୨୮।୪: ଟି -୨୦ ବିଶ୍ୱକପ ୨୦୨୪ ପାଇଁ କାଉଣ୍ଟଡାଉନ ଆରମ୍ଭ ହୋଇଛି। ଏହି ମେଗା ଇଭେଣ୍ଟ ଜୁନ ୧ ରୁ ୱେଷ୍ଟଇଣ୍ଡିଜ ଏବଂ ଆମେରିକାରେ ଆରମ୍ଭ...

ଦିଲ୍ଲୀ ବିପକ୍ଷ ମ୍ୟାଚରେ ପରାଜୟ ପାଇଁ ତିଳକ ବର୍ମା ଦାୟୀ ବୋଲି କହିଲେ ହାର୍ଦ୍ଦିକ ପାଣ୍ଡ୍ୟା, ଉଠାଇଲେ ବଡ଼ ପ୍ରଶ୍ନ

ଭୁବନେଶ୍ୱର, ୨୭।୪: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ର ୧୭ ତମ ସିଜନ୍ ମୁମ୍ବାଇ ଇଣ୍ଡିଆନ୍ସ ପ୍ରଦର୍ଶନ ଏତେ ଭଲ ନାହିଁ। ୨୮ ଏପ୍ରିଲରେ ଦିଲ୍ଲୀ...

ରାଜସ୍ଥାନର ଅଷ୍ଟମ ବିଜୟ, ସଞ୍ଜୁ ସାମସନ୍‌ଙ୍କ ଅଧିନାୟକ ପାଳି

ନୂଆଦିଲ୍ଲୀ,୨୭ା୪: ଇଣ୍ଡିଆନ୍‌ ପ୍ରିମିୟର ଲିଗ୍‌ରେ ଶନିବାର ଲକ୍ଷ୍ନୌ ସୁପର ଜାଏଣ୍ଟ୍ସକୁ ୭ ଉଇକେଟରେ ହରାଇ ଅଷ୍ଟମ ବିଜୟ ହାସଲ କରିଛି ରାଜସ୍ଥାନ ରୟାଲ୍ସ। ଟସ୍‌ ହାରି...

ହାଇସ୍କୋରିଂ ମ୍ୟାଚ୍‌ରେ କ୍ୟାପିଟାଲ୍ସ ବିଜୟୀ

ନୂଆଦିଲ୍ଲୀ,୨୭ା୪: ଇଣ୍ଡିଆନ ପ୍ରିମିୟର ଲିଗ୍‌ରେ ଶନିବାର ଅନୁଷ୍ଠିତ ଡବଲ୍‌ ହେଡରର ହାଇସ୍କୋରିଂ ମ୍ୟାଚ୍‌ରେ ମୁମ୍ବାଇ ଇଣ୍ଡିଆନ୍ସକୁ ୧୦ ରନ୍‌ରେ ପରାସ୍ତ କରିଛି ଦିଲ୍ଲୀ କ୍ୟାପିଟାଲ୍ସ। ପ୍ରଥମେ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri