ପାଟପୁର,୧୨ା୩- ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ପାଇକ ରାମଚନ୍ଦ୍ରପୁର ଗ୍ରାମର ମହିଳା ସରପଞ୍ଚ ଗୁରୁବାର ଅନାସ୍ଥା ଭୋଟରେ ପଦ ହରାଇଛନ୍ତି। ଅନୁଷ୍ଠିତ ଅନାସ୍ଥା ଭୋଟରେ ପଞ୍ଚାୟତର ମୋଟ ୧୮ ଜଣ ୱାର୍ଡ ସଭ୍ୟଙ୍କ ମଧ୍ୟରୁ ୧୩ଜଣ ଉପସ୍ଥିତ ରହି ସରପଞ୍ଚଙ୍କ ବିପକ୍ଷରେ ଯାଇଥିଲେ। ଅନ୍ୟ ୫ ଜଣ ୱାର୍ଡସଭ୍ୟ ଅନୁପସ୍ଥିତ ରହିଥିଲେ।
ସାନଖେମୁଣ୍ଡି ବ୍ଲକ ପି.ରାମଚନ୍ଦ୍ରପୁର ସରପଞ୍ଚଙ୍କ ପ୍ରତି ୱାର୍ଡସଭ୍ୟଙ୍କ ଅନାସ୍ଥାଭାବ ଓ ମନମୁଖୀ କାର୍ଯ୍ୟକଳାପରେ ଅତିଷ୍ଠ ହୋଇ କିଛିଦିନ ତଳେ ଓ୍ବାର୍ଡସଭ୍ୟମାନେ ବ୍ରହ୍ମପୁର ଉପ ଜିଲାପାଳ କାର୍ଯ୍ୟାଳୟରେ ପହଞ୍ଚତ୍ ଅନାସ୍ଥା ଭୋଟ ପାଇଁ ଦାବି କରିଥିଲେ। ଉପ ଜିଲାପାଳ ସିନ୍ଧେ ଦତ୍ତାତ୍ରେୟ ଭାଉ ସାହେବ ଅଭିଯୋଗ ଗ୍ରହଣ କି ଗୁରୁବାର ଅନାସ୍ଥା ଭୋଟ ପାଇଁ ଦିନ ଧାର୍ଯ୍ୟ କରିଥିଲେ। ଉପଜିଲାପାଳଙ୍କ ନିର୍ଦ୍ଦେଶକ୍ରମେ ଗୁରୁବାର ପଞ୍ଚାୟତରେ ଅନାସ୍ଥା ଭୋଟ ହୋଇଥିଲା। ଦିଗପହଣ୍ଡି ତହସିଲଦାର ଅଦ୍ୱୈତ୍ୟ ପ୍ରସାଦ ଉପସ୍ଥିତ ରହି ନିର୍ବାଚନ ପରିଚାଳନା କରିଥିଲେ। ସାନଖେମୁଣ୍ଡି ପଞ୍ଚାୟତ ସମ୍ପ୍ରସାରଣ ଅଧିକାରୀ ବୈଜୟନ୍ତୀ ମୁଣ୍ଡା ସଂଯୋଜନା କରିଥିଲେ। ପରିଚାଳନାଗତ ଶୃଙ୍ଖଳା ପାଇଁ ସାନଖେମୁଣ୍ଡି ତହସିଲଦାର ଅମିତ କୁମାର ନାୟକ ମାଜିଷ୍ଟ୍ରେଟ ଦାୟିତ୍ୱରେ ରହିଥିବା ବେଳେ ପାଟପୁର ପୋଲିସ ଉପସ୍ଥିତ ଥିଲା।
