ନୂଆଦିଲ୍ଲୀ,୯।୪: କରୋନା ଯୋଗୁ ଦେଶର ଅଣ ସଙ୍ଗଠିତ କ୍ଷେତ୍ରରେ କାର୍ଯ୍ୟରତ ପ୍ରାୟ ୪୦ କୋଟି ଶ୍ରମିକଙ୍କ ସ୍ଥିତି ବିଗିଡିବାର ଆଶଙ୍କା କରାଯାଉଛି। ଜାତିସଂଘ ପକ୍ଷରୁ ଏକ ରିପୋର୍ଟରେ କୁହାଯାଇଛି ଯେ, ଏହି କ୍ଷେତ୍ରରେ କାର୍ଯ୍ୟରତ ଶ୍ରମିକଙ୍କ ମଧ୍ୟରୁ ଗରିବୀ ହାର ବଢିଯିବାର ସ୍ଥିତି ଏବେ ଦେଖାଯାଇଛି। ଚଳିତ ବର୍ଷ ସଙ୍ଗଠିତ କ୍ଷେତ୍ରରେ କାମ କରୁଥିବା ପ୍ରାୟ ୧୯.୫ କୋଟି ଲୋକଙ୍କ ଚାକିରି ଉପରେ ଏବେ କଳାବାଦଲ ଛାଇ ରହିଥିବା ରିପୋର୍ଟରେ କୁହାଯାଇଛି। କରୋନା ଯୋଗୁ ବିଶ୍ୱର ଅର୍ଥ ବ୍ୟବସ୍ଥାର ସ୍ଥିତି ଏବେ ସମ୍ପୂର୍ଣ୍ଣ ବିଗିଡି ଯାଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ଏହା ସବୁଠାରୁ ଖରାପ ସମୟ ବୋଲି ରିପୋର୍ଟରେ ଉଲ୍ଲେଖ ରହିଛି।
ଅନ୍ତର୍ଜାତୀୟ ଶ୍ରମ ସଙ୍ଗଠନର ମହାନିର୍ଦ୍ଦେଶକ ଗାୟ ରାଇଡର କହିଛନ୍ତି ଯେ, ସାରା ବିଶ୍ୱର ଅର୍ଥ ବ୍ୟବସ୍ଥାଗୁଡିକ ଏବେ ଚ୍ୟାଲେଞ୍ଜିଂ ସ୍ଥିତି ଦେଇ ଗତି କରୁଛନ୍ତି। ବିକଶିତ ଏବଂ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥାଗୁଡିକର ସ୍ଥିତି ଏବେ ସମାନ ରହିଛି। ଏଭଳି ସ୍ଥିତିରେ ରାଷ୍ଟ୍ରଗୁଡିକୁ ଏକତ୍ର ହୋଇ ଲଢିବାର ଆବଶ୍ୟକତା ରହିଛି। ଅଣସଙ୍ଗଠିତ କ୍ଷେତ୍ରରେ ସାରା ବିଶ୍ୱରେ ବୃହତ୍ ସଂଖ୍ୟକ ଲୋକ କାମ କରୁଛନ୍ତି। ଭାରତ, ନାଇଜେରିଆ, ବ୍ରାଜିଲ ଭଳି ଦେଶଗୁଡିକରେ ଲକ୍ଡାଉନ ଯୋଗୁ ଦିନ ମଜୁରିଆ ବର୍ଗର ଲୋକଙ୍କସ୍ଥିତି ଏବେ ବିଗିଡିଛି। ଭାରତର ଅଣସଙ୍ଗଠିତ କ୍ଷେତ୍ରଗୁଡିକରେ ଅଧିକାଂଶ ଲୋକ କାମ କରୁଛନ୍ତି। ଏହା ଦ୍ୱାରା ପ୍ରାୟ ୪୦ କୋଟି ଲୋକଙ୍କ ସ୍ଥିତି ସଙ୍କଟାପନ୍ନ ହେବ ବୋଲି କୁହାଯାଇଛି। ଗତ ୭୫ ବର୍ଷ ମଧ୍ୟରେ ବିଶ୍ୱ ସମୁଦାୟ ଲାଗି ଏହା ସବୁଠାରୁ ବଢ ଚ୍ୟାଲେଞ୍ଜ ଭାବେ ଉଭା ହୋଇଛି। ଏହି ସମୟରେ ସବୁଠାରୁ ବଡ ଧରଣର ନିଯୁକ୍ତି ହ୍ରାସ ଆରବ ଦେଶଗୁଡିକରେ ହେବା ନେଇ ଆକଳନ କରାଯାଇଛି। ଏହାବାଦ ୟୁରୋପ ଏବଂ ଏସିଆ ପ୍ରଶାନ୍ତ ମହାସାଗରିୟ ଦେଶଗୁଡିକର ସ୍ଥିତି ମଧ୍ୟ ବିଗିଡିବ ବୋଲି ରିପୋର୍ଟରେ କୁହାଯାଇଛି।
