ବ୍ରହ୍ମପୁର ଅଫିସ,୨୨ା୪-କରୋନା ସଂକ୍ରମଣକୁ ପ୍ରତିରୋଧ କରିବା ନେଇ ଅଗ୍ନିଶମ ବିଭାଗ ପକ୍ଷରୁ ସହରର ବିଭିନ୍ନ ଅଞ୍ଚଳରେ ବିଶୋଧନ ପ୍ରକ୍ରିୟା ଜାରି ରହିଛି। ବୁଧବାର ଆମ୍ବପୁଆ ଅଞ୍ଚଳରେ ଅଗ୍ନିଶମ ବିଭାଗ ପକ୍ଷରୁ ବିଶୋଧନ ବେଳେ ଅଞ୍ଚଳବାସୀ ଅଗ୍ନିଶମ ଅଧିକାରୀଙ୍କୁ ସମ୍ବର୍ଦ୍ଧିତ କରିଛନ୍ତି ା କରୋନା ଭଳି ଭୟଙ୍କର ମହାମାରୀ କବଳରୁ ସହରବାସୀଙ୍କୁ ରକ୍ଷା କରିବାକୁ ଅଗ୍ନିଶମ ବିଭାଗ ପକ୍ଷରୁ କରାଯାଉଥିବା ବିଶୋଧନ ପ୍ରକ୍ରିୟାକୁ ଅଞ୍ଚଳବାସୀ ପ୍ରଶଂସା କରିବା ସହ ଆମ୍ବପୁଆ ଅଞ୍ଚଳରେ ବିଶୋଧନ ପାଇଁ ପହଞ୍ଚିଥିବା ବ୍ରହ୍ମପୁର ସହକାରୀ ଅଗ୍ନିଶମ ଅଧିକାରୀ ସନାତନ ମହାପାତ୍ରଙ୍କ ସମେତ ସମସ୍ତ ଅଗ୍ନିଶମ କର୍ମଚାରୀଙ୍କୁ ଅଞ୍ଚଳବାସୀ ଫୁଲ, ଚନ୍ଦନ ଦେଇ ସମ୍ବର୍ଦ୍ଧିତ କରିଥିଲେ ା ବର୍ତ୍ତମାନ ସୁଦ୍ଧା ଅଗ୍ନିଶମ ବିଭାଗ ଦ୍ୱାରା ବ୍ରହ୍ମପୁର ଏମ୍କେସିଜି, ସିଟି ହସ୍ପିଟାଲ ସମେତ ଷ୍ଟେଟବ୍ୟାଙ୍କ, ଭେଣ୍ଡିଂଜୋନ, ଏଲଆଇସି, ଉପଜିଲାପାଳଙ୍କ କାର୍ଯ୍ୟାଳୟକୁ ବିଶୋଧନ କରାଯାଇଥିବା ବେଳେ ବୁଧବାର ଆମ୍ବପୁଆ ଛକ ଓ ଭେଣ୍ଡିଂଜୋନ୍, ବଜାର ଅଞ୍ଚଳ ସମେତ ଆଇସିଆଇସିଆଇ ବ୍ୟାଙ୍କ କାର୍ଯ୍ୟାଳୟ, ସମାଜ ଅଫିସ, କାନାଡା ବ୍ୟାଙ୍କ, ବ୍ରହ୍ମାନଗର ଏସ୍ବିଆଇ ଲାଇଫ୍ ଇନ୍ସ୍ୟୁରାନ୍ସ ଅଫିସକୁ ସୋଡିୟମ୍ ହାଇପୋକ୍ଲୋରାଇଡ ସଲ୍ୟୁସନ୍ ଦ୍ୱାରା ବିଶୋଧିତ କରାଯାଇଛି ା ଏବେ ସୁଦ୍ଧା ସହରରେ ୧ ଲକ୍ଷ ୨୦ ହଜାର ଲିଟର ସୋଡିୟମ ହାଇପୋକ୍ଲୋରାଇଡ୍ ସଲ୍ୟୁଶନ ବିଶୋଧନ ପାଇଁ ପ୍ରୟୋଗ କରାଯାଇଥିବା ଅଗ୍ନିଶମ ବିଭାଗ ପକ୍ଷରୁ କୁହାଯାଇଛି ା
