ହରାରେ,୨୪।୧: ଅନ୍ତର୍ଜାତୀୟ କ୍ରିକେଟ୍ରେ ସ୍ପଟ୍ ଫିକ୍ସିଂ କରିବା ପାଇଁ ଜଣେ ଭାରତୀୟ ବ୍ୟବସାୟୀ ୧୫ ହଜାର ଡଲାର (୧୧ ଲକ୍ଷରୁ ଊର୍ଦ୍ଧ୍ୱ) ଦେଇଥିଲେ। କିନ୍ତୁ ଏ ସମ୍ପର୍କରେ ଉଚିତ ସମୟରେ ଆଇସିସିକୁ ଜଣାଇବାରେ ବିଫଳ ହୋଇଥିଲେ ବୋଲି ସ୍ବୀକାର କରିଛନ୍ତି ଜିମ୍ବାଓ୍ବେର ପୂର୍ବତନ ଅଧିନାୟକ ବ୍ରେଣ୍ଡନ ଟେଲର। ଏଥିଲାଗି ତାଙ୍କୁ ଆଇସିସି କିଛି ବର୍ଷ ପାଇଁ ବାସନ୍ଦ କରିପାରେ ବୋଲି ଟୁଇଟ୍ କରି ପୂର୍ବତନ ଉଇକେଟକିପର ବ୍ୟାଟର ସୂଚନା ଦେଇଛନ୍ତି।
ଟୁଇଟରରେ ଜାରି କରିଥିବା ବିବୃତିରେ ଟେଲର କହିଛନ୍ତି, ୨୦୧୯ ଅକ୍ଟୋବରରେ ଜଣେ ଭାରତୀୟ ବ୍ୟବସାୟୀଙ୍କଠାରୁ ଟଙ୍କା ନେବା ପାଇଁ ମୋତେ ବାଧ୍ୟ କରାଯାଇଥିଲା। ନିଜ ସୁରକ୍ଷା ଚିନ୍ତା କାରଣରୁ ଏ ସମ୍ପର୍କରେ ଆଇସିସିର ଦୁର୍ନୀତି ନିବାରଣ ବିଭାଗକୁ ଜଣାଇବା ପାଇଁ ମୋତେ ୪ ମାସ ଲାଗିଥିଲା।
“ ଜଣେ ଭାରତୀୟ ବ୍ୟବସାୟଙ୍କ ଅନୁରୋଧ କ୍ରମେ ଭାରତରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇଥିଲି। ସନ୍ଧ୍ୟାରେ ଆମେ ଡ୍ରିଙ୍କ୍ସ ନେଇଥିଲୁ। ସେମାନେ ମୋତେ କୋକେନ ଯାଚିଥିଲେ, ଯାହାକୁ ସେମାନେ ସେବନ କରୁଥିଲେ। ମୁଁ ମୂର୍ଖ ଭାବେ ତାକୁ ଗ୍ରହଣ କରିଥିଲି। ତା’ ପର ଦିନ ସକାଳେ ସେହି ବ୍ୟକ୍ତି ମୋ ରୁମକୁ ଆସି ମୋତେ ଗତ ରାତିର ଭିଡିଓ ଦେଖାଇଥିଲେ। ସେଥିରେ ମୁଁ କୋକେନ ନେଉଥିଲି। ଯଦି ମୁଁ ସେମାନଙ୍କ ପାଇଁ ଅନ୍ତର୍ଜାତୀୟ କ୍ରିକେଟରେ ସ୍ପଟ୍ ଫିକ୍ସିଂ ନ କରେ, ତେବେ ସେ ଉକ୍ତ ଭିଡିଓକୁ ସର୍ବସାଧାରଣରେ ପ୍ରକାଶ କରିବାକୁ ଧମକ ଦେଇଥିଲେ। ମୋତେ ୧୫ ହଜାର ଡଲାର ମିଳିଥିଲା। କାମ ଶେଷ ହେଲା ପରେ ଆହୁରି ୨୦ ହଜାର ଡଲାର ମିଳିବ ବୋଲି ପ୍ରତିଶ୍ରୁତି ଦେଇଥିଲେ। ହେଲେ ମୁଁ ଜଣାଇ ଦେବାକୁ ଚାହେଁ, କୌଣସି ମ୍ୟାଚ୍ ଫିକ୍ସିଂରେ ମୋର ସମ୍ପୃକ୍ତି ନାହିଁ। ମୁଁ କିଛି ବି ହୋଇପାରେ, କିନ୍ତୁ ମୁଁ ଠକ ନୁହେଁ” ବୋଲି ଟେଲର କହିଛନ୍ତି।
ତେବେ ଆଇସିସି ଓ ଜିମ୍ବାଓ୍ବେ କ୍ରିକେଟ ପକ୍ଷରୁ ଏ ସମ୍ପର୍କରେ କୌଣସି ବିବୃତି ଜାରି ହୋଇନାହିଁ। ଉଲ୍ଲେଖଯୋଗ୍ୟ, ଗତ ବର୍ଷ ସେପ୍ଟେମ୍ବରରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଥିବା ୩୫ ବର୍ଷୀୟ ଟେଲର ଜିମ୍ବାଓ୍ବେ ପାଇଁ ୩୪ ଟେଷ୍ଟ, ୨୦୫ ଦିନିକିଆ ଓ ୪୫ ଟି୨୦ ମ୍ୟାଚ୍ ଖେଳିଥିଲେ।
