ଥୁଆମୂଳ ରାମପୁର,୧୭।୮ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ପାଡେପଦର ପଞ୍ଚାୟତ ଭାଟିଫାସ ଗ୍ରାମର ଦାଦନ ଶ୍ରମିକ ସ୍ବର୍ଗତ ସିବା ମାଝୀଙ୍କ ଅକାଳ ବିୟୋଗ ପରେ ରାସ୍ତା ଅଭାବରୁ ୮ କିଲୋମିଟର ଖଟିଆରେ ଶବ ବୋହିବା ଘଟଣା ସାରା ଓଡ଼ିଶାକୁ ମର୍ମାହତ କରିଛି। ସ୍ବାଧୀନତାର ଦୀର୍ଘ ବର୍ଷ ପରେ ମଧ୍ୟ ଗ୍ରାମକୁ ପକ୍କା ରାସ୍ତାଟିଏ ନଥିବାରୁ ‘ୟୁଭିଏ – ୟୁଥ ୟୁନାଇଟେଡ ଫର୍ ଦି ଭିଜନ ଅଫ ଆମ୍ବେଦକର (ଯୁବ ଶକ୍ତି ଥୁଆମୂଳ ରାମପୁର)’ ପକ୍ଷରୁ ତୀବ୍ର ନିନ୍ଦା କରାଯାଇଛି।
ଖବର ପାଇ ୟୁଭିଏର ଏକ ପ୍ରତିନିଧି ଦଳ ଶୋକସନ୍ତପ୍ତ ପରିବାର ନିକଟରେ ପହଞ୍ଚି ସମବେଦନା ଜଣାଇବା ସହ ନିଜସ୍ବ ଖର୍ଚ୍ଚରେ ରାସନ ସାମଗ୍ରୀ, ଆବଶ୍ୟକୀୟ ଜିନିଷ ଓ ଆର୍ଥିକ ସହାୟତା ପ୍ରଦାନ କରିଛନ୍ତି। ପରିବାରକୁ ତୁରନ୍ତ ଆଧାର କାର୍ଡ, ରାସନ କାର୍ଡ, ସରକାରୀ ଜମି ପଟ୍ଟା, ଆବାସ ଗୃହ, ଭତ୍ତା, ଶ୍ରମ ବିଭାଗୀୟ ସହାୟତା ଏବଂ ଭାଟିଫାସ ଗ୍ରାମକୁ ସ୍ଥାୟୀ ପକ୍କା ରାସ୍ତା ନିର୍ମାଣ ପାଇଁ ପ୍ରଶାସନ ନିକଟରେ ଦାବି କରାଯାଇଛି। ପ୍ରଶାସନ ଅବହେଳା କଲେ ରାଜରାସ୍ତାକୁ ଓହ୍ଲାଇବାକୁ ସଂଗଠନ ଚେତାବନୀ ଦେଇଛି।
ଅନ୍ୟପଟେ, ୟୁଭିଏ ପ୍ରତିନିଧି ଦଳ ବିଭିନ୍ନ ଶିକ୍ଷାନୁଷ୍ଠାନ ଗସ୍ତ କରି ଶିକ୍ଷାଗତ ସମସ୍ୟାର ଅନୁଧ୍ୟାନ କରିଥିଲେ। ମାଁ ମାଣିକେଶରୀ ପଞ୍ଚାୟତ ସମିତି ଉଚ୍ଚ ମାଧ୍ୟମିକ ବିଦ୍ୟାଳୟରେ ସରକାରୀ ନିର୍ଦ୍ଦେଶ ସତ୍ତ୍ୱେ ପୁନଃ ନାମଲେଖା ନାମରେ ଫି’ ଆଦାୟ ହେଉଥିବା ଅଭିଯୋଗ ପାଇ ସଂଗଠନ ପକ୍ଷରୁ ସ୍ମାରକପତ୍ର ଦିଆଯାଇଥିଲା। କଲେଜ କର୍ତ୍ତୃପକ୍ଷ ଟଙ୍କା ଆଦାୟ ସୱୀକାର କରିବା ସହ ତାହା ଛାତ୍ରଛାତ୍ରୀଙ୍କୁ ଫେରସ୍ତ କରିବାକୁ ପ୍ରତିଶ୍ରୁତି ଦେଇଛନ୍ତି। ଏହାପରେ ୟୁଭିଏ ଟିମ ବଡ଼ଛତ୍ରଙ୍ଗ ଉଚ୍ଚ ବିଦ୍ୟାଳୟ ଓ ମହୁଲପାଟଣା ଉଚ୍ଚ ବିଦ୍ୟାଳୟ ପରିଦର୍ଶନ କରିଥିଲେ। ବଡ଼ଛତ୍ରଙ୍ଗ ଉଚ୍ଚ ବିଦ୍ୟାଳୟରେ ୨୫୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀଙ୍କ ପାଇଁ ମାତ୍ର ୩ ଜଣ ଶିକ୍ଷକ ଥିବାବେଳେ କାନ୍ଥ ଓ ଛାତରୁ ପାଣି ଝରୁଛି, ପାନୀୟ ଜଳର ସୁବିଧା ନାହିଁ ଏବଂ ଶ୍ରେଣୀଗୃହ ଅଭାବରୁ ଏକାଧିକ ଶ୍ରେଣୀର ପିଲା ଏକାଠି ବସି ପାଠ ପଢୁଛନ୍ତି।
ସେହିପରି ମହୁଲପାଟଣା ବିଦ୍ୟାଳୟ ଉଚ୍ଚ ମାଧ୍ୟମିକ ବିଦ୍ୟାଳୟ ଭାବେ ଉନ୍ନୀତ ହୋଇଥିଲେ ସୁଦ୍ଧା ଭିତ୍ତିଭୂମି ଅଭାବରୁ ଦୁଇଟି ପାଳି ଓ ବାରଣ୍ଡାରେ ପାଠପଢ଼ା ଚାଲିଛି। ଏଥିସହ ପ୍ରଧାନଶିକ୍ଷକ, କରାଣୀ ଓ ଶିକ୍ଷକ ପଦବୀ ଖାଲି ପଡ଼ିଥିବାରୁ ୟୁଭିଏ ଉଦ୍ବେଗ ପ୍ରକାଶ କରିଛି।
ଏଥିସହିତ ୟୁଭିଏ ଦଳ ‘ସିଜେପି’ର ‘ସ୍କୁଲ ଠିକ କର’ ଡାକରାକୁ ସମର୍ଥନ ଜଣାଇଛି। ଆଗାମୀ ଦିନରେ ଥୁଆମୂଳ ରାମପୁରର ସମସ୍ତ ସ୍କୁଲ ପରିଦର୍ଶନ କରି ସମସ୍ତ ସମସ୍ୟାର ସମାଧାନ ପାଇଁ ସରକାରଙ୍କୁ ଲିଖିତ ଦାବିପତ୍ର ଦିଆଯିବ ଏବଂ ଆବଶ୍ୟକ ପଡ଼ିଲେ ରାଜରାସ୍ତାକୁ ଓହ୍ଲାଇବାକୁ ସଂଗଠନ ଚେତାବନୀ ଦେଇଛି। ଏହି ଗସ୍ତ ସମୟରେ ସଂଗଠନର ସଦସ୍ୟ , ହିତେଶ କୁମାର ନାଏକ, ଗମୟରଞ୍ଜନ ନାଏକ, ତପନ ନାଏକ, ହରସ ନାଏକ, ତସ୍ମିନ କୁମାର ନାଏକ, ଜିତେନ୍ଦ୍ର ବାଗ, ସମୀର କୁମାର ନାଏକ, ସୁବାସ ନାଏକ ଏବଂ ସମୀର କୁମାର ନାଏକ ଉପସ୍ଥିତ ଥିଲେ। ଅସହାୟ, ଶୋଷିତ ଓ ଛାତ୍ରସମାଜର ସେବାରେ ୟୁଭିଏ ସଦାସର୍ବଦା ନିସ୍ବାର୍ଥପର ଭାବେ ଛିଡ଼ା ରହିବ।
Dharitri – Odisha’s No.1 Odia Daily
