ପାରାଦୀପ,୮।୪(ସ୍ବ.ପ୍ର.): ପାରାଦୀପ ଆଦର୍ଶ ଥାନା ଅନ୍ତର୍ଗତ ସବ୍ଷ୍ଟେଶନ ଛକର ଓଭରବ୍ରିଜ୍ ଗଡ଼ାଣିରେ ଶୁକ୍ରବାର ପୂର୍ବାହ୍ନରେ ଦୁର୍ଘଟଣା ଘଟିଛି। ଏକ ହାଇୱା ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତକଙ୍କ ପରିବାରକୁ କ୍ଷତିପୂରଣ ଦେବାକୁ ଦାବିକରି ସ୍ଥାନୀୟ ଲୋକେ ସାରେ ପାରାଦୀପର ଅଠରବାଙ୍କୀ ଗେଟ୍ ଆଗରେ ମୃତଦେହ ରଖି ଅବରୋଧ କରିଥିଲେ। ପ୍ରାୟ ୨ ଘଣ୍ଟା ପରେ ଏହା ପ୍ରତ୍ୟାହୃତ ହୋଇଛି। ମୃତକ ହେଲେ ଅଠରବାଙ୍କୀ ତଳ ଲକ୍ପଡ଼ା ବାସିନ୍ଦା ଅମରେଶ ପ୍ରଧାନ(୩୧)। ସେ ସବ୍ଷ୍ଟେଶନ ଛକରେ ଏକ ଦୋକାନରେ ସେଲ୍ସମ୍ୟାନ୍ ଭାବେ କାମ କରନ୍ତି। ସକାଳେ ସ୍କୁଟି ଯୋଗେ ଅଠରବାଙ୍କୀ ଅଭିମୁଖେ ଯିବାବେଳେ ଓଭରବ୍ରିଜ୍ ଗଡ଼ାଣିଠାରେ ଏକ ହାଇୱା ତାଙ୍କୁ ପଛପଟୁ ଧକ୍କା ଦେଇଥିଲା। ଫଳରେ ସେ ଗୁରୁତର ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପ୍ରଥମେ ବିଜୁ ମେମୋରିଆଲ ହସ୍ପିଟାଲ ଓ ପରେ କଟକ ବଡ଼ ଡାକ୍ତରଖାନା ସ୍ଥାନାନ୍ତର କରିଥିଲେ। ସେଠାରେ ଡାକ୍ତର ଅମରେଶଙ୍କୁ ମୃତ ଘୋଷଣା କରିଛନ୍ତି। ଅପରାହ୍ନରେ ମୃତଦେହ ପହଞ୍ଚତ୍ବା ପରେ ଉତ୍ତ୍ୟକ୍ତ ଲୋକେ ଅଠରବାଙ୍କୀ ଗେଟ୍ ଅବରୋଧ କରିଥିଲେ। ଖବର ପାଇ ଆଦର୍ଶ ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରି ରାସ୍ତା ଅବରୋଧ ହଟାଇଛି। ରିପୋର୍ଟ ଲେଖାହେବା ପର୍ଯ୍ୟନ୍ତ ମୃତଦେହ ରାସ୍ତାକଡ଼ରେ ଆମ୍ବୁଲାନ୍ସ ଭିତରେ ରଖାଯାଇଛି। ଗାଡ଼ି ମାଲିକ, ସଂଘ କର୍ମକର୍ତ୍ତା ଓ ଲୋକଙ୍କ ମଧ୍ୟରେ ଏନେଇ ଆଲୋଚନା ଜାରି ରହିଛି। ଅପରପକ୍ଷେ ପୋଲିସ ସମ୍ପୃକ୍ତ ହାଇୱାକୁ ଜବତ କରିଛି। କିନ୍ତୁ ଚାଳକ ଫେରାର ହୋଇଯାଇଛନ୍ତି। ଏନେଇ ଥାନାରେ ମାମଲା (ନଂ.୧୪୬/୨୩) ରୁଜୁ ହୋଇଛି।
