ହିଞ୍ଜିଳିକାଟୁ,୨୬ା୩(ଦ୍ୱିତୀକୃଷ୍ଣ ପଣ୍ଡା): ଗଞ୍ଜାମ ଜିଲା ହିଞ୍ଜିଳିକାଟୁ ବସ୍ଷ୍ଟାଣ୍ଡ ପରିସରରେ ବସ୍ ଚାଳକମାନଙ୍କ ମନଇଛା ଗାଡ଼ି ରଖିବା ଓ ଯାତ୍ରୀ ଉଠାଇବା ପ୍ରତିଯୋଗିତା କାରଣରୁ ବୁଧବାର ଗୋଡ଼ ଉପରେ ବସ୍ଚକା ମାଡ଼ି ଯିବାରୁ ଜଣେ ଗୁରୁତର ହୋଇଛନ୍ତି। ଅନ୍ୟପକ୍ଷରେ ବସ୍ ଚାଳକ ଓ କର୍ମଚାରୀମାନଙ୍କୁ ନିୟନ୍ତ୍ରିତ କରିବା ନେଇ ପୋଲିସର ବିଫଳତାରୁ ଜନ ଅସନ୍ତୋଷ ପ୍ରକାଶ ପାଇଛି। ବୁଧବାର ଏହି ଘଟଣା ପରେ ବସ୍ଷ୍ଟାଣ୍ଡ ପରିସରରେ ଅସନ୍ତୋଷ ଲୋକମାନଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଛି।
ପ୍ରକାଶ ଯେ, ଧରାକୋଟ ଥାନା ଜଗନ୍ନାଥପୁର ଶାସନ ଗ୍ରାମର ସୂର୍ଯ୍ୟ ନାରାୟଣ ମୁନି ଏକ ଘରୋଇ ବସ୍ରେ (ଓଡି୩୨ଇ ୩୧୫୫) ଉଠୁଥିବା ବେଳେ ଅନ୍ୟ ଏକ ବସ୍ ପଛପଟୁ ଆସୁଥିବା ଦେଖି ପ୍ରଥମ ବସ୍ ଚାଳକ ଗାଡ଼ିକୁ ଆଗକୁ ନେଇଯାଇଥିଲେ। ଫଳରେ ଭାରସାମ୍ୟ ହରାଇ ସୂର୍ଯ୍ୟ ନାରାୟଣ ତଳେ ପଡି ଯାଇଥିଲେ। ତାଙ୍କର ଗୋଡ଼ ଉପରେ ବସରେ ପଛ ଚକ ବଢ଼ିଯାଇଥିଲା। ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ଖବର ପାଇ ହିଞ୍ଜିଳି ପୁଲିସ ଘଟଣା ସ୍ଥଳରେ ପହଞ୍ଚି ଦୂର୍ଘଟଣାଗ୍ରସ୍ତ ଯାତ୍ରୀବାହୀ ବସକୁ ଜବତ କରିବା ସହ ଚାଳକଙ୍କୁ ଅଟକ ରଖି ଘଟଣାର ତଦନ୍ତ ଚଳାଇଛି। ଅନ୍ୟ ପକ୍ଷରେ କିଛି ଘରୋଇ ବସ ହିଞ୍ଜିଳିକାଟୁ ବସଷ୍ଟାଣ୍ଡ ଉପରୁ ଗାଡ଼ିକୁ ନେଇ ନିକଟସ୍ଥ ଜାତୀୟ ରାଜପଥ- ୫୯ ଉପରେ ରାସ୍ତା ଅବରୋଧ ଦୀର୍ଘ ସମୟଧରି ଠିଆ କରାଉଛନ୍ତି। ଉକ୍ତ ରାସ୍ତାରେ ହୋଟେଲ ଓ ଅନ୍ୟାନ୍ୟ ବ୍ୟବସାୟ ପ୍ରତିଷ୍ଠାନ କାରଣରୁ ଜନଗହଳି ଲାଗିରହୁଛି। ଯାତ୍ରୀ ଉଠାଇବା ପ୍ରତିଯୋଗିତା ଓ ପଛ ଗାଡ଼ିକୁ ଆଗକୁ ନ ଯିବାକୁ ରାସ୍ତା ଅବରୋଧ କାରଣରୁ ବହୁ ସମୟରେ ସମସ୍ୟା ସୃଷ୍ଟି ହେବା ସହ ଦୁର୍ଘଟଣା ଘଟୁଛି। ଅନ୍ୟପକ୍ଷରେ ଗାଡ଼ି ଚାଳକ ଓ କର୍ମଚାରୀଙ୍କୁ ନିୟନ୍ତ୍ରିତ କରିବା ପାଇଁ ପୋଲିସ ନୀରବ ରହୁଛି। ଜନ ଅସନ୍ତୋଷ ପ୍ରକାଶ ପାଉଥିଲେ ମଧ୍ୟ ପୋଲିସର ଟ୍ରାଫିକ ସୁଧାରିବାରେ ସକ୍ଷମ ହେଉନାହିଁ। ଗତ କିଛିଦିନ ଧରି ହିଞ୍ଜିଳିକାଟୁ ବସଷ୍ଟାଣ୍ଡ ପରିସରରେ କିଛି ବସ ଚାଳକ ଓ କର୍ମଚାରୀଙ୍କ ମନମୁଖୀ ନେଇ ବିଭିନ୍ନ ସାମାଜିକ ଗଣମାଧ୍ୟମରେ ମଧ୍ୟ ଲୋକମାନେ ଅସନ୍ତୋଷ ପ୍ରକାଶ ପାଇଛି। ଉଚ୍ଚ କର୍ତ୍ତୃପକ୍ଷ ତୁରନ୍ତ ହସ୍ତକ୍ଷେପ ପାଇଁ ଦାବି ହୋଇଛି।
