ନୂଆଦିଲ୍ଲୀ,୨୧ା୨: ଯୁବତୀଙ୍କ ବିବାହ ବୟସ ୧୮ରୁ ୨୧କୁ ବୃଦ୍ଧି କରିବା ନିମନ୍ତେ ସୁପ୍ରିମକୋର୍ଟରେ ହୋଇଥିବା ଆବେଦନ ଖାରଜ ହୋଇଯାଇଛି। ଯୁବତୀଙ୍କ ବିବାହ ପାଇଁ ବୟସ ସୀମା ସମ୍ବିଧାନରେ ନିର୍ଦ୍ଧାରିତ ହୋଇଛି। ଏହାର ପରିବର୍ତ୍ତନ କେବଳ ପାର୍ଲାମେଣ୍ଟରେ ହୋଇପାରିବ ବୋଲି ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼, ବିଚାରପତି ପି.ଏସ୍. ନରସିଂମା ଏବଂ ବିଚାରପତି ଜେ.ବି. ପଡିଓ୍ବାଲାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଆଇନରେ ଯୁବକଙ୍କ ବିବାହ ବୟସ ସୀମା ୨୧ ବର୍ଷ ଥିବାବେଳେ ଯୁବତୀଙ୍କ ବୟସ ୧୮ ରଖାଯାଇଛି। ଏହି ବୟସ ବିଭେଦ ସମ୍ବିଧାନର ଧାରା ୧୪, ୧୫ ଏବଂ ୨୧ର ବିରୁଦ୍ଧାଚରଣ କରୁଛି। ତେଣୁ ଯୁବତୀଙ୍କ ବିବାହ ବୟସ ସୀମାକୁ ଯୁବକଙ୍କ ଭଳି ୨୧ବର୍ଷ କରାଯିବା ଆବଶ୍ୟକ ବୋଲି ଆଇନଜୀବୀ ଅଶ୍ୱିନୀ ଉପାଧ୍ୟାୟ ସର୍ବୋଚ୍ଚ ଅଦାଲତଙ୍କ ନିକଟରେ ଆବେଦନ କରିଥିଲେ। ଆବେଦନର ଶୁଣାଣି କରି ଖଣ୍ଡପୀଠ କହିଛନ୍ତି ଯେ, କୌଣସି ଆଇନ ପରିବର୍ତ୍ତନ କରିବା ପାଇଁ ପାର୍ଲାମେଣ୍ଟକୁ କୋର୍ଟ ନିର୍ଦ୍ଦେଶ ଦେଇପାରିବେ ନାହିଁ। ଆଇନର ପରିବର୍ତ୍ତନ ପାର୍ଲାମେଣ୍ଟରେ ହୋଇପାରିବ। ଖଣ୍ଡପୀଠ ଆହୁରି କହିଛନ୍ତି ଯେ, ଯଦି ଆମେ ଯୁବତୀଙ୍କ ବୟସ ସୀମା ୧୮କୁ ଉଠାଇ ଦେବୁ, ତେବେ କୌଣସି ବୟସ ସୀମା ରହିବ ନାହିଁ ଏବଂ ଜଣେ ୫ବର୍ଷୀୟା ଶିଶୁ ମଧ୍ୟ ବିବାହଯୋଗ୍ୟା ହୋଇପାରିବେ। ତେଣୁ ସମ୍ବିଧାନରେ ଥିବା ଆଇନକୁ ପାର୍ଲାମେଣ୍ଟରେ ପରିବର୍ତ୍ତନ କରାଯାଇପାରିବ ବୋଲି ଖଣ୍ଡପୀଠ କହିଛନ୍ତି।
୨୦୨୧ରେ ଯୁବତୀମାନଙ୍କ ବିବାହ ବୟସକୁ ୨୧କୁ ବୃଦ୍ଧି କରିବାକୁ କେନ୍ଦ୍ର ସରକାର ପାର୍ଲାମେଣ୍ଟରେ ଏକ ବିଲ୍ ଆଗତ କରିଥିଲେ। ଉକ୍ତ ବିଲ୍ ପାର୍ଲାମେଣ୍ଟ ସଂସଦୀୟ ଷ୍ଟାଣ୍ଡିଂ କମିଟିକୁ ପଠାଯାଇଥିବାବେଳେ ଅଦ୍ୟାବଧି ବିଚାରାଧୀନ ରହିଛି। ଆବେଦନକାରୀଙ୍କ ଯୁକ୍ତି ହେଲା,ଯଦି ଅଦାଲତ ଯୁବତୀଙ୍କ ବିବାହ ବୟସ ୧୮କୁ ଉଠାଇ ଦେବେ, ତେବେ ତାହା ହିନ୍ଦୁ ବିବାହ ଆଇନର ଧାରା ୫ ଅନୁସାରେ ସ୍ବତଃଭାବେ ସମସ୍ତଙ୍କ ପାଇଁ ୨୧ ବର୍ଷ ହୋଇଯିବ। ହେଲେ ଆବେଦନକାରୀଙ୍କ ଏହି ଯୁକ୍ତିକୁ ଅଦାଲତ ଗ୍ରହଣ କରିପାରି ନ ଥିଲେ। ସମ୍ବିଧାନ ଧାରା ୩୨କୁ ଅଣଦେଖା ନ କରିବାକୁ ଖଣ୍ଡପୀଠ କହିଥିଲେ। କିଛି ପ୍ରସଙ୍ଗ ରହିଛି, ଯାହାକି ପାର୍ଲାମେଣ୍ଟରେ ହିଁ ନିଷ୍ପତ୍ତି ନିଆଯାଇଥାଏ। ଆମେ ଆଇନ ତିଆରି କରିପାରିବୁ ନାହିଁ। ଏପରି କି ଆମେ ସମ୍ବିଧାନର ଏକମାତ୍ର ତତ୍ତ୍ୱାବଧାରକ ନୋହୁଁ, ପାର୍ଲାମେଣ୍ଟର ମଧ୍ୟ ଦାୟିତ୍ୱ ରହିଛି। ଏହି ପ୍ରସଙ୍ଗରେ ଆବେଦନକାରୀ ଲ’ କମିଶନଙ୍କ ନିକଟରେ ଆବେଦନ କରିବାକୁ ଅନୁମତି ଲୋଡ଼ିବା ପ୍ରସଙ୍ଗରେ ଅଦାଲତ କହିଛନ୍ତି ଯେ, ଖଣ୍ଡପୀଠ କାହାକୁ ଲ’ କମିଶନଙ୍କ ଦ୍ୱାରସ୍ଥ ହେବାରୁ ବାରଣ କରିନାହାନ୍ତି। ତେଣୁ ଏଥିପାଇଁ କୌଣସି ଅନୁମତିର ଆବଶ୍ୟକତା ନାହିଁ ବୋଲି ଖଣ୍ଡପୀଠ କହିଛନ୍ତି।
