ପ୍ରେମୀଯୁଗଳ ପରସ୍ପରକୁ ଯେତେବେଳେ ପ୍ରପୋଜ କରନ୍ତି, ସେହି ମୁହୂର୍ତ୍ତକୁ ସ୍ମରଣୀୟ କରିବା ପାଇଁ ଅନେକ ପନ୍ଥା ଆପଣାନ୍ତି। କିଛି ଲୋକ ଏହାକୁ ସ୍ମରଣୀୟ କରିବା ପାଇଁ ନିଜ ସାଙ୍ଗମାନଙ୍କ ସାହାଯ୍ୟ ମଧ୍ୟ ନେଇଥା’ନ୍ତି। କିନ୍ତୁ ଆମେରିକାର ଜଣେ ଯୁବକଙ୍କ ପ୍ରପୋଜ କରିବାର ଶୈଳୀ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଯୁବକ ଜଣକ ଏହି ମୁହୂର୍ତ୍ତକୁ ସ୍ମରଣୀୟ କରିବା ପାଇଁ ପୋଲିସ ବିଭାଗ ନିକଟକୁ ଯାଇ ଅନୁରୋଧ କରିଥିଲେ ଯେ, ସେ ତାଙ୍କ ପ୍ରେମିକାଙ୍କୁ ପ୍ରପୋଜ କରିବା ସମୟରେ ତାଙ୍କ ହାତରେ ହାତକଡି ପଡିଥିବା ସେ ଚାହୁଁଛନ୍ତି। ପୋଲିସ ଏଥିରେ ରାଜି ହୋଇଥିଲା ଏବଂ ତାଙ୍କୁ ଏକ ରେଷ୍ଟୁରାଣ୍ଟ ବାହାରେ ଗିରଫ କରାଯାଇଥିଲା। ଏହି ଖବର ତାଙ୍କ ଗର୍ଲଫ୍ରେଣ୍ଡଙ୍କୁ ଜଣାଦିଆଯାଇଥିଲା। ସେ ସେଠାରେ ପହଞ୍ଚିବା କ୍ଷଣି ଯୁବକ ଜଣଙ୍କ ଆଣ୍ଠୁମାଡି ପ୍ରେମିକାଙ୍କୁ ପ୍ରପୋଜ କରିଥିଲେ। ଏବଂ ସେ ମଧ୍ୟ ଏଥିରେ ସହମତି ପ୍ରକାଶ କରିଥିଲେ।
ତା’ପରେ ପ୍ରେମିକାଙ୍କୁ ପୂରା କାହାଣୀ ବଖାଣିଥିଲେ ପ୍ରେମିକ। ପରେ ଦୁହେଁ ପରସ୍ପରକୁ ଆଲିଙ୍ଗନ କରିବା ପରେ ଭାବପ୍ରବଣ ହୋଇପଡିଥିଲେ। ସେଠାରେ ଠିଆ ହୋଇଥିବା ପୋଲିସ କର୍ମଚାରୀମାନେ ମଧ୍ୟ ବହୁତ ଖୁସି ଥିଲେ। ଏହାର ଭିଡିଓ ଆମେରିକାର ହ୍ବିଟମ୍ୟାନ ପୋଲିସ ବିଭାଗ ନିଜ ଅଫିସିଆଲ ଫେସବୁକ ପେଜରେ ଶେୟାର କରିଛି। ଏହି ଘଟଣା ପରେ ପୋଲିସ ଟିମ ଏବଂ ପ୍ରେମୀଯୁଗଳ ଏକାଠି ଫଟୋ ଉଠାଇଥିଲେ।
