ଲକ୍ଷ୍ନୌ,୧୧।୩ : ଉତ୍ତରପ୍ରଦେଶର ଯୋଗୀ ଆଦିତ୍ୟନାଥ ସରକାର ରାଜ୍ୟର ଜନସାଧାରଣଙ୍କ ପାଇଁ ମୋକ୍ଷ ଯୋଜନା କରିଛନ୍ତି। ଏହା ଅର୍ନ୍ତଗତ ବାରାଣସୀର ମଣିକର୍ଣ୍ଣିକା ଘାଟରେ ଅସ୍ଥି ବ୍ୟାଙ୍କ ପ୍ରତିଷ୍ଠା ହେବ। ମଣିକର୍ଣ୍ଣିକା ଘାଟ ଭାରତର ସବୁଠାରୁ ବଡ ଏବଂ ପବିତ୍ର ଶ୍ମଶାନ ଭାବରେ ପରିଗଣିତ ହୁଏ। ଏହି ଘାଟରେ ସ୍ଥାପିତ ହେବାକୁ ଥିବା ଅସ୍ଥି ବ୍ୟାଙ୍କରେ ଅସ୍ଥି ସଂରକ୍ଷିତ ରଖାଯିବ। ଶ୍ରଦ୍ଧାଳୁ ଏହାକୁ ପରେ ବିସର୍ଜନ କରିପାରିବେ। ଏହି ବ୍ୟାଙ୍କ ମାଧ୍ୟମରେ ଲୋକଙ୍କୁ ନିଜ ପ୍ରିୟଜନଙ୍କ ଶେଷ ରୀତିନୀତି କରିବା ପାଇଁ ସୁବିଧା ମିଳିବ।
ଏନେଇ ବାରାଣସୀର ମ୍ୟୁନିସିପାଲିଟି କର୍ପୋରେଶନର ମ୍ୟୁନିସିପାଲିଟି ସ୍ବାସ୍ଥ୍ୟ ଅଧିକାରୀ ଏମ୍ପି ସିଂ କହିଛନ୍ତି ଯେ ଅସ୍ଥିବ୍ୟାଙ୍କ ହେଉଛି ସାମ୍ପ୍ରତିକ ସମୟର ଆବଶ୍ୟକତା। ଆମେ ମଣିକର୍ଣ୍ଣିକା ଘାଟରେ ଏକ ବୃହତ ଅସ୍ଥି ବ୍ୟାଙ୍କ ନିର୍ମାଣ କରିବାକୁ ଯାଉଛୁ। ଯେଉଁଠାରେ ବିସର୍ଜନ ପୂର୍ବରୁ ଅସ୍ଥିକୁ ସଂରକ୍ଷଣ କରାଯାଇପାରିବ। ନାଗରିକ ସଂସ୍ଥା ଏନେଇ ଏକ ପ୍ରସ୍ତାବ ପଠାଇଛନ୍ତି। ଯୋଗୀ ସରକାର ଏହି ପ୍ରସ୍ତାବକୁ ଅନୁମୋଦନ କରିଛନ୍ତି। ଏହି ସମଗ୍ର ପ୍ରକଳ୍ପକୁ ସରକାର ସବୁଜ ସଙ୍କେତ ଦେଇଛନ୍ତି, ଯେଉଁ କାରଣରୁ ଆସନ୍ତା ଆର୍ଥିକ ବର୍ଷ ସୁଦ୍ଧା ଏହା ଆରମ୍ଭ ହେବାର ସମ୍ଭାବନା ରହିଛି।
ମଣିକର୍ଣ୍ଣିକା ଘାଟରେ ଶବଦାହ କରୁୁଥିବା ବିକାଶ ଗୁପ୍ତା କହିଛନ୍ତି ଯେ ଏହି ବ୍ୟାଙ୍କରେ ମୃତ ବ୍ୟକ୍ତିଙ୍କ ଅସ୍ଥି ପାଉଁଶ ଓ ଅବଶିଷ୍ଟାଂଶ ସଂରକ୍ଷିତ ରହିବ। ମଣିକର୍ଣ୍ଣିକା ଘାଟରେ ପ୍ରତିଦିନ ହାରାହାରି ୯୦ ରୁ ୧୨୦ ମୃତଦେହ ଦାହ କରାଯାଇଥାଏ। ପ୍ରାୟତଃ ଅନ୍ୟ ଦୂର ସ୍ଥାନରୁ ଏଠାକୁ ଆସୁଥିବା ମୃତକଙ୍କ ପରିବାର ସଦସ୍ୟଙ୍କ ପାଇଁ ଅସ୍ଥି ପାଉଁଶ ସଂଗ୍ରହ କରିବା ଲାଗି ଦୀର୍ଘ ସମୟ ଅପେକ୍ଷା କରିବା କଷ୍ଟକର ହୋଇଥାଏ ।
ଏଭଳି ପରିସ୍ଥିତିରେ ଅନେକ ଥର ସମ୍ପର୍କୀୟମାନେ ଅସ୍ଥି ସଂଗ୍ରହ ନ କରି ଚାଲିଯାଆନ୍ତି। ଅବଶ୍ୟ, ବ୍ୟାଙ୍କ ପ୍ରତିଷ୍ଠା ହେବା ପରେ ଅବଶିଷ୍ଟ ଅସ୍ଥିପାଉଁଶକୁ ସଂରକ୍ଷଣ କରାଯାଇ ବିସର୍ଜନ କରି ବୁଡ଼ ପକାଇବା ପାଇଁ ପରିବାର ସଦସ୍ୟଙ୍କୁ ହସ୍ତାନ୍ତର କରାଯାଇପାରିବ ।
