ନୂଆଦିଲ୍ଲୀ,୧୯।୪ : ବର୍ଷର ପ୍ରଥମ ସୂର୍ଯ୍ୟ ପରାଗ ୨୦ ଏପ୍ରିଲ ଗୁରୁବାର ହେବ। ହିନ୍ଦୁ କ୍ୟାଲେଣ୍ଡର ଅନୁଯାୟୀ ଏହି ଚନ୍ଦ୍ରଗ୍ରହଣ ବୈଶାଖ ମାସର ଅମାବାସ୍ୟା ଦିନ ହେବ। ଜ୍ୟୋତିଷ ଶାସ୍ତ୍ର ଅନୁଯାୟୀ ସୂର୍ଯ୍ୟପରାଗର ବିଶେଷ ମହତ୍ତ୍ୱ ରହିଛି। ଜ୍ୟୋତିଷ ଶାସ୍ତ୍ର ଅନୁଯାୟୀ,୨୦୨୩ବର୍ଷର ଏହି ସୂର୍ଯ୍ୟ ପରାଗ ଅନୁଯାୟୀ ସୂର୍ଯ୍ୟ ନିଜର ଉଚ୍ଚ ରାଶି ମେଷରେ ରହିବେ।
ଭାରତୀୟ ସମୟ ଅନୁଯାୟୀ, ଏହି ସୂର୍ଯ୍ୟପରାଗ ସକାଳ ୭ଟା ୪ରୁ ଆରମ୍ଭ ହୋଇ ମଧ୍ୟାହ୍ନ ୧୨ଟା ୨୯ ପର୍ଯ୍ୟନ୍ତ ଚାଲିବ। ଏହି ସୂର୍ଯ୍ୟ ଗ୍ରହଣର ସମୁଦାୟ ଅବଧି ୫ ଘଣ୍ଟା ୨୪ ମିନିଟ ପାଇଁ ରହିବ ।
ଏହା ଭାରତକୁ ଦୃଶ୍ୟମାନ ହେବ ନାହିଁ। ଭାରତର ଲୋକମାନେ ସୂର୍ଯ୍ୟ ପରାଗର ଦୃଶ୍ୟ ଦେଖି ପାରିବେ ନାହିଁ। ଏହି ସୂର୍ଯ୍ୟ ପରାଗ ଅଷ୍ଟ୍ରେଲିଆ ସମେତ ଅନେକ ଦେଶରେ ଦେଖିବାକୁ ମିଳିବ। ଏହା ଚାଇନା, ଥାଇଲାଣ୍ଡ, ଆମେରିକା, ମାଲେସିଆ, ଜାପାନ, ନ୍ୟୁଜିଲାଣ୍ଡ, ଭାରତ ମହାସାଗରୀୟ ଅଞ୍ଚଳ, ପ୍ରଶାନ୍ତ ମହାସାଗରୀୟ ଅଞ୍ଚଳ ଆଦିଠାରେ ଦୃଶ୍ୟମାନ ହେବ।
ଭାରତରେ ଏହା ଦୃଶ୍ୟମାନ ନ ହେବା କାରଣରୁ କୌଣସି ସୂତକ ପାଳନ କରାଯିବ ନାହିଁ । ଶାସ୍ତ୍ର ଅନୁଯାୟୀ, ଯେଉଁଠାରେ ସୂର୍ଯ୍ୟ ପରାଗର ପ୍ରଭାବ ଥାଏ, ସେଠାରେ ସୂତକ ସମୟ ପାଳନ କରାଯାଇଥାଏ। ଏହି କାରଣରୁ ସୂତକ ଅବଧି ଭାରତରେ ପାଳନ ହେବ ନାହିଁ। ସୂର୍ଯ୍ୟ ପରାଗ ସମୟରେ ସୂତକ ଅବଧି ପରାଗର ୧୨ ଘଣ୍ଟା ପୂର୍ବରୁ ଆରମ୍ଭ ହୋଇ ପରାଗ ଶେଷ ପର୍ଯ୍ୟନ୍ତ ରହିଥାଏ। ଏପ୍ରିଲ ୨୦ ପରେ, ବର୍ଷର ଦ୍ୱିତୀୟ ସୂର୍ଯ୍ୟପରାଗ ଅକ୍ଟୋବର ୧୪ ରେ ଘଟିବ। ଏହା ମଧ୍ୟ ଭାରତକୁ ଦୃଶ୍ୟମାନ ହେବ ନାହିଁ।
ଏହି ପରାଗ ସ୍ବତନ୍ତ୍ର ହେବ। ଏହା ଏକ କଙ୍କଣାକୃତି ସୂର୍ଯ୍ୟ ପରାଗ ହେବ। ଜ୍ୟୋର୍ତିବିଜ୍ଞାନଙ୍କ ଅନୁଯାୟୀ, କଙ୍କଣାକୃତି ସୂର୍ଯ୍ୟ ପରାଗ ଏକ ପ୍ରକାର ହାଇବ୍ରିଡ ପରାଗ। ଯେଉଁଥିରେ ପରାଗ ଏକ କୁଣ୍ଡଳାକାର ଭାବରେ ଆରମ୍ଭ ହୁଏ, ତା’ପରେ ଧୀରେ ଧୀରେ ଏହା ଏକ ପୂର୍ଣ୍ଣ ସୂର୍ଯ୍ୟ ପରାଗରେ ପରିଣତ ହୁଏ ଏବଂ ତା’ପରେ ପୁଣି ଏକ କୁଣ୍ଡଳାକାର ପରାଗରେ ପରିଣତ ହୁଏ। ଏହାପୂର୍ବରୁ, ୨୦୧୩ରେ ଏହି ପ୍ରକାରର କଙ୍କଣାକୃତି ସୂର୍ଯ୍ୟ ପରାଗ ଦେଖିବାକୁ ମିଳିଥିଲା।
