ପୁରୀ ଅଫିସ,୨୧।୮: ପୁରୀ ଜିଲାର କୌଣସି ସର୍ବସାଧାରଣ ସ୍ଥାନରେ ଏଥର ଗଣେଶ ପୂଜା ହେବ ନାହିଁ। କରୋନା ସଂକ୍ରମଣ ବୃଦ୍ଧି ହାରକୁ ଦୃଷ୍ଟିରେ ରଖି ଜିଲା ପ୍ରଶାସନ ଏହି ନିଷ୍ପତ୍ତି ନେଇଛି। କୌଣସି ଯୁବକ ସଂଘ, ଅନୁଷ୍ଠାନ, କ୍ଲବ କିମ୍ବା ବ୍ୟକ୍ତିବିଶେଷ ସାର୍ବଜନୀନ ସ୍ଥାନରେ ଗଣେଶ ପୂଜା କରିପାରିବେ ନାହିଁ ବୋଲି ପ୍ରଶାସନ ପକ୍ଷରୁ ବିଜ୍ଞପ୍ତି ଜାରି କରାଯାଇଛି। ଏହି କଟକଣା ସହରାଞ୍ଚଳ ଓ ଗ୍ରାମାଞ୍ଚଳ ସବୁଠି ଲାଗୁ ହେବ। ଏହାର ଉଲ୍ଲଂଘନ କଲେ ସମ୍ପୃକ୍ତ ଅନୁଷ୍ଠାନ, କ୍ଲବ, ବ୍ୟକ୍ତିବିଶେଷଙ୍କ ବିରୋଧରେ ବିପର୍ଯ୍ୟୟ ପରିଚାଳନା ଆଇନ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। କିନ୍ତୁ ନିଜ ଘରେ ଗଣେଶ ପୂଜା ଉତ୍ସବ ପାଳନ କରାଯିବା ଉପରେ କୌଣସି କଟକଣା ନାହିଁ ବୋଲି ପ୍ରଶାସନ ସ୍ପଷ୍ଟ କରିଛି। ଅନ୍ୟପକ୍ଷରେ ଦିନକ ପରେ ଗଣେଶ ପୂଜା ଥିବାବେଳେ ପ୍ରଶାସନର ଏଭଳି ବିଳମ୍ବ ନିଷ୍ପତ୍ତିକୁ ନେଇ ମୂର୍ତ୍ତି କାରିଗରଙ୍କଠାରୁ ଆରମ୍ଭ କରି ବିଭିନ୍ନ କ୍ଲବର ସଦସ୍ୟ ଅସନ୍ତୋଷ ବ୍ୟକ୍ତ କରିଛନ୍ତି।
ଏ ନେଇ ମୂର୍ତ୍ତି କାରିଗର ବଳରାମ ସାହୁ କହିଛନ୍ତି, କରୋନା ପାଇଁ ପ୍ରଶାସନର ଏହି ନିଷ୍ପତ୍ତିକୁ ଆମେ ଅବମାନନା କରୁନାହୁଁ। କିନ୍ତୁ ୧୫/୨୦ ଦିନ ପୂର୍ବରୁ ବନ୍ଦ ନିଷ୍ପତ୍ତି ନିଆଯାଇଥିଲେ ଆଜି କାରିଗରମାନେ ଶହ ଶହ ସଂଖ୍ୟାରେ ମୂର୍ତ୍ତି ଗଢି ନ ଥାନ୍ତେ। ଅନେକ କ୍ଲବ ପକ୍ଷରୁ ଅର୍ଡର ଦିଆଯାଇଥିବାରୁ ସେମାନେ ମୂର୍ତ୍ତି ନିର୍ମାଣ ଶେଷ କରିଥିଲେ। ଦିନକ ପରେ ପୂଜା ଥିବାବେଳେ କାରିଗରମାନେ ଏବେ କରିବେ କ’ଣ? କ୍ଲବ ପକ୍ଷରୁ କିଏ ୧୦୦/୨୦୦ ଟଙ୍କା ଆଡଭାନ୍ସ ଦେଇଛନ୍ତି। ହେଲେ ଗୋଟିଏ ଗୋଟିଏ ମୂର୍ତ୍ତିର ଦାମ୍ ୫ ହଜାରଠାରୁ ଆରମ୍ଭ କରି ୧୫ ହଜାର ଟଙ୍କା ପର୍ଯ୍ୟନ୍ତ ରହିଛି। ବର୍ତ୍ତମାନ ସେମାନେ ନେବେ ନାହିଁ। କାରିଗର ଏଥିରେ ଖର୍ଚ୍ଚ କରିଥିବା ଟଙ୍କା ଏବଂ ପାରିଶ୍ରମିକ କେମିତି ପାଇବ ବୋଲି ସେ ପ୍ରଶ୍ନ କରିଛନ୍ତି। ସେହିପରି ଦରଜି ପୋଖରୀ ଛକ ପୂଜା କମିଟି ସମ୍ପାଦକ ଗୁରୁଦତ୍ତ ସ୍ବାଇଁ କହିଛନ୍ତି, ଯଦି ପ୍ରଶାସନ ପୂର୍ବରୁ ଏହି ନିଷ୍ପତ୍ତି ନେଇଥାନ୍ତା ତେବେ ଆମେ କାରିଗରଙ୍କୁ ମୂର୍ତ୍ତି ତିଆରି କରିବାକୁ ଅର୍ଡର ଦେଇ ନ ଥାନ୍ତୁ। ପୂଜା ପାଇଁ ଆମେ ସବୁ ପ୍ରସ୍ତୁତି ସାରିଥିଲୁ। ତଥାପି କରୋନା ପାଇଁ ପ୍ରଶାସନ ନିଷ୍ପତ୍ତି ଆମକୁ ମାନିବାକୁ ପଡ଼ିବ।
