ଭାରତୀୟ ନାରୀଙ୍କର ଶାଢି ପ୍ରତି ଥାଏ ଅହେତୁକ ଦୁର୍ବଳତା। ସେଥିପାଇଁ ତ ଆଲମାରୀ ଭର୍ତ୍ତି ଶାଢି ଥିଲେ ହେଁ ନୂଆ ଶାଢି ଦେଖୁ ଦେଖୁ ଲୋଭ ବଢିଯାଏ। ଆଉ କିଣିବାକୁ ମନ ବଳାଏ। ହେଲେ ଏମିତି ଏକ ଶାଢି ଅଛି ଯାହା ଦେଖିବାକୁ ଏତେ ସୁନ୍ଦର ଯେ, କିଣିବାକୁ ମନ ଆଉଟୁ ପାଉଟୁ ହେବ। ହେଲେ ତାକୁ କିଣି ହେବନି। କାରଣ ଏହା ହେଉଛି ପୃଥିବୀର ସବୁଠାରୁ ଦାମୀ ଶାଢି, ଯାହାର ନାଁ ‘ବିବାହ ପଟୁ’। ଏହା ଏକ ଚେନ୍ନାଇ ସିଲ୍କ ଶାଢି। ନବରତ୍ନ ପଥର ଯେମିତିକି ସୁନା, ହୀରା, ଇମେରାଲ୍ଡ, ରୁବି, ୟେଲୋ ସାଫାୟର୍, ସାଫାୟର, ଟୋପାଜ୍, ମୋତି, କୋରାଲ ଆଦି ଏଥିରେ ଖଚ୍ଚିତ ହୋଇଛି। ସୁନା, ପ୍ଲାଟିନମ୍, ରୁପାର ତାରରେ ଏଥିରେ ଏମ୍ବ୍ରୋଏଡାରୀ କାମ ହୋଇଛି। ଏହାବାଦ ଏଥିରେ ପ୍ରସିଦ୍ଧ ଚିତ୍ରକର ରବି ବର୍ମାଙ୍କର ୧୧ଟି ପେଣ୍ଟିଂକୁ ବୁଣି କରାଯାଇଛି। ଉକ୍ତ ଶାଢିର ଡିଜାଇନ୍ ଚେନ୍ନାଇ ସିଲ୍କସ୍ର ନିର୍ଦ୍ଦେଶକ କରିଛନ୍ତି। କାଞ୍ଚତ୍ପୁରମ୍ ଚେନ୍ନାଇ ସିଲ୍କ ମିଲ୍ର ୩୬ଜଣ କାରିଗର ୧୨ ମାସରେ ଏହାକୁ ତିଆରି କରିଥିଲେ। ଏହାର ଓଜନ ୮ କି.ଗ୍ରା.ଓ ମୂଲ୍ୟ ୪୦ ଲକ୍ଷ ଟଙ୍କା। ଏହି ଶାଢି ପ୍ରଥମେ ବାଙ୍ଗାଲୋରର ଜଣେ ବ୍ୟବସାୟୀ ବିବାହର ୧୦ମ ବାର୍ଷିକୀ ଅବସରରେ ପତ୍ନୀଙ୍କୁ ଉପହାର ଦେବା ପାଇଁ କିଣିଥିଲେ। ଏହାପରେ କୁଏତର ଜଣେ ଧନୀକ ବ୍ୟବସାୟୀ ବି ଏହି ଶାଢି ତିଆରି କରିବା ଲାଗି ଅନୁରୋଧ କରିଥିଲେ। ଉକ୍ତ ଶାଢିର ଓଜନ ଅଧିକ ହୋଇଥିଲେ ହେଁ ପିନ୍ଧିବା ପରେ ଓଜନ ଏତେଟା ଜଣାପଡ଼େନା। ଆଉ ଏହା ଏତେ ସୁନ୍ଦର ଦେଖାଯାଏ ଯେ, ଓଜନ କଥା ମନକୁ ଆସେନା।
