ନୂଆଦିଲ୍ଲୀ: ଦିନେ କି ଦୁଇ ଦିନ ନୁହେଁ ୬୫ ବର୍ଷ ହେଲାଣି ସେ ସ୍ନାନ କରିନାହାନ୍ତି। ସେତିକି ନୁହେଁ, ପରିଷ୍କାର ପରିଚ୍ଛନ୍ନତାକୁ ସେ ଘୃଣା କରନ୍ତି। ରନ୍ଧା ଖାଦ୍ୟ ବଦଳରେ ସେ ପଚାଶଢା ଖାଦ୍ୟ ଖାଇବାକୁ ଭଲପାନ୍ତି। ସେଥିପାଇଁ ତ ଏବେ ତାଙ୍କୁ ବିଶ୍ୱର ସବୁଠୁ ଅସନା ମଣିଷ ବୋଲି କୁହାଯାଉଛି। ବିଶ୍ୱାସ ହେଉ ନ ଥିଲେ ବି ଏଭଳି ଜଣେ ବ୍ୟକ୍ତି ହେଉଛନ୍ତି ଇରାନର ଅମଉ ହାଜି।
ଅମଉ ହାଜିଙ୍କ ବୟସ ଏବେ ୮୩ ବର୍ଷ, କିନ୍ତୁ ସେ ସମ୍ପୂର୍ଣ୍ଣ ସୁସ୍ଥ। ମାତ୍ର ଅମଉଙ୍କର ଅପରିଷ୍କାର ଲାଇଫ୍ଷ୍ଟାଇଲ୍କୁ ନେଇ ଏବେ ସାରା ବିଶ୍ୱରେ ଚର୍ଚ୍ଚା। ବିଶ୍ୱର ସବୁଠୁ ଅସନା ଅପରିଷ୍କାର ବ୍ୟକ୍ତିଭାବେ ସେ ଏବେ ରେକର୍ଡ କରିଛନ୍ତି। କାହିଁକି ନା ୬୫ ବର୍ଷ ହେଲାଣି ସେ ସ୍ନାନ କରି ନାହାନ୍ତି। ସ୍ନାନ କଲେ ତାଙ୍କ ଦେହ ଖରାପ ହୋଇଯିବ ବୋଲି ସେ କହନ୍ତି। ଖାଦ୍ୟ ଜିନିଷକୁ ସେ କେବେ ପରିଷ୍କାର ରଖନ୍ତି ନାହିଁ। ଅଧିକାଂଶ ସମୟରେ ସେ ମୃତ ପଶୁପକ୍ଷୀଙ୍କ ପଚା ଶରୀରର ମାଂସ ଖାଇବାକୁ ପସନ୍ଦ କରନ୍ତି। ଏଭଳି ଖାଦ୍ୟ ତାଙ୍କ ପାଖରେ ଉପଲବ୍ଧ ନ ହେଲେ ସେ ଘରେ ଥିବା ପଚା ଶଢା ପନିପରିବା ଓ ଶାଗ ଖାଇଥାନ୍ତି। କିନ୍ତୁ ଘରେ ତିଆରି ହେଉଥିବା ସ୍ବାଦିଷ୍ଟ ଭୋଜନ ସେ କେବେ ହେଲେ ଖାଆନ୍ତି ନାହିଁ। ଅମଉଙ୍କର ନିଜର କୌଣସି ଘର ନାହିଁ। ଗାଁ ବାହାରେ ଏକ ଗାତ ଖୋଳି ସେ ମାଟିରେ ଶୋଇବାକୁ ପସନ୍ଦ କରନ୍ତି। କୌଣସି ପ୍ରକାରର ଖରାପ ଅପରିଷ୍କାର ଜିନିଷ ପାଇଁ ତାଙ୍କର କେବେ ହେଲେ ଇନଫେକ୍ସନ୍ ହୁଏନି। ବରଂ ଏହି ଅପରିଷ୍କାର ଗୁଣ ଯୋଗୁଁ ସେ ଏତେ ବର୍ଷ ପର୍ଯ୍ୟନ୍ତ ସୁସ୍ଥ ଏବଂ ହୃଷ୍ଟପୁଷ୍ଟ ଅଛନ୍ତି ବୋଲି କହନ୍ତି। ଅମଉଙ୍କର ସିଗାରେଟ୍ ପିଇବାର ଅଭ୍ୟାସ ଅଛି, କିନ୍ତୁ ସିଗାରେଟ୍ ବି ଅସନା ଢଙ୍ଗରେ ସେ ପିଇଥାନ୍ତି। ଗାଁ ଲୋକେ ତାଙ୍କୁ ଦେଇଥିବା ସିଗାରେଟ୍ ସରିଯିବା ପରେ ସେ ଚିଲମରେ ବିଭିନ୍ନ ପଶୁପକ୍ଷୀଙ୍କ ମଳକୁ ଶୁଖାଇ ତାକୁ ସିଗାରେଟ୍ ଭଳି ପିଅନ୍ତି। ଦୁନିଆର ସବୁ ସୁଖସୁବିଧାକୁ ତ୍ୟାଗ କରି ଅମଉ ତାଙ୍କ ଷ୍ଟାଇଲରେ ଜୀବନକୁ ବେଶ୍ ଉପଭୋଗ କରନ୍ତି ବୋଲି କହନ୍ତି।
