ଥୁଆମୂଳ ରାମପୁର, ୦୬ ଜୁନ୍ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁରଠାରେ ସ୍ଥାନୀୟ ଅଗ୍ରଣୀ ଶିକ୍ଷାନୁଷ୍ଠାନ ‘ପରିବର୍ତ୍ତନ କ୍ଲାସେସ୍’ ଆନୁକୂଲ୍ୟରେ ବିଶ୍ୱ ପରିବେଶ ଦିବସ ସମାରୋହ ଅତ୍ୟନ୍ତ ଉତ୍ସାହର ସହ ପାଳିତ ହୋଇଯାଇଛି। ଏହି ଅବସରରେ ବ୍ୟାପକ ସଫେଇ ଅଭିଯାନ, ସଚେତନତା ଶୋଭାଯାତ୍ରା ଏବଂ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇଥିଲା।
ଶୁକ୍ରବାର ସକାଳେ ସ୍ଥାନୀୟ ମିନି ଷ୍ଟାଡିୟମଠାରୁ ଏକ ପରିବେଶ ସଚେତନତା ପଦଯାତ୍ରା ବାହାରିଥିଲା। ଏହି ପଦଯାତ୍ରା ସମଗ୍ର ସହର ପରିକ୍ରମା କରିବା ସହ ପ୍ରସିଦ୍ଧ ମା’ ମାଣିକେଶ୍ୱରୀ ମନ୍ଦିର ଦର୍ଶନ କରିଥିଲା। ଏହି କାର୍ଯ୍ୟକ୍ରମରେ ଅନୁଷ୍ଠାନର ଛାତ୍ରଛାତ୍ରୀ ଓ ସଦସ୍ୟମାନେ ସାମିଲ ହୋଇ ସ୍ଥାନୀୟ ବସ୍ଷ୍ଟାଣ୍ଡ ପରିସର ସଫା କରିବା ସହ ଜନସାଧାରଣଙ୍କୁ ପ୍ଲାଷ୍ଟିକ ବର୍ଜନ କରିବା ପାଇଁ ସଚେତନ କରିଥିଲେ।
ପଦଯାତ୍ରା ପରେ ମିନି ଷ୍ଟାଡିୟମ ପରିସରରେ ଏକ ସଭାର ଆୟୋଜନ କରାଯାଇଥିଲା। ଏଥିରେ ସ୍ଥାନୀୟ ଅଞ୍ଚଳର ଅନେକ ନେତୃମଣ୍ଡଳୀ ଓ ମାନ୍ୟଗଣ୍ୟ ବ୍ୟକ୍ତି ଯୋଗଦେଇଥିଲେ। ଅତିଥିମାନେ ଆଜିର ସମୟରେ ପରିବେଶ ସନ୍ତୁଳନ ରକ୍ଷା, ଜୈବ ବିବିଧତାର ସୁରକ୍ଷା ଏବଂ ଅଧିକରୁ ଅଧିକ ବୃକ୍ଷରୋପଣ କରିବାର ଆବଶ୍ୟକତା ଉପରେ ନିଜର ଗୁରୁତ୍ୱପୂର୍ଣ୍ଣ ବକ୍ତବ୍ୟ ପ୍ରଦାନ କରିଥିଲେ।
ଏହି ସମାରୋହ ଅବସରରେ ସପ୍ତମରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ମଧ୍ୟରେ ଓଡ଼ିଆ, ହିନ୍ଦୀ ଓ ଇଂରାଜୀ ଭାଷାରେ ପ୍ରବନ୍ଧ ଏବଂ ବକ୍ତୃତା ପ୍ରତିଯୋଗିତା ଅନୁଷ୍ଠିତ ହୋଇଥିଲା। କୃତୀ ପ୍ରତିଯୋଗୀମାନଙ୍କୁ ଟ୍ରଫି, ମାନପତ୍ର ଏବଂ ଆର୍ଥିକ ପୁରସ୍କାର ରାଶି ପ୍ରଦାନ କରାଯାଇଛି।ପ୍ରବନ୍ଧ ପ୍ରତିଯୋଗିତାରେ ଋଷିତା ପ୍ରิୟଦର୍ଶିନୀ ନାଏକ ପ୍ରଥମ ୧,୨୦୦, ଆରାଧ୍ୟା ପାଣିଗ୍ରାହୀ ଦ୍ୱିତୀୟ ୮୦୦ ଓ ଅଶ୍ୱିନୀ ନାଏକ ତୃତୀୟ ୫୦୦ ସ୍ଥାନ ଅଧିକାର କରିଥିବା ବେଳେ ବକ୍ତୃତା ପ୍ରତିଯୋଗିତାରେ ହୃଦାନନ୍ଦ ନାଏକ ପ୍ରଥମ ୧,୨୦୦, ସ୍ୱାତୀ ନାଏକ ଦ୍ୱିତୀୟ ୮୦୦ ଏବଂ ମଳୟ ନାଏକ ତୃତୀୟ ୫୦୦ ସ୍ଥାନ ହାସଲ କରି ଟ୍ରଫି ଓ ମାନପତ୍ର ସହ ପୁରସ୍କୃତ ହୋଇଛନ୍ତି।
କାର୍ଯ୍ୟକ୍ରମର ଶେଷ ଭାଗରେ ଛାତ୍ରଛାତ୍ରୀଙ୍କ ଦ୍ୱାରା ଏକ ମନୋରଞ୍ଜନଧର୍ମୀ ଓ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ‘ଟିମ୍ ପରିବର୍ତ୍ତନ କ୍ଲାସେସ୍’ର ସମସ୍ତ ସଦସ୍ୟ ଏବଂ ସ୍ଥାନୀୟ ସ୍ୱେଚ୍ଛାସେବୀଙ୍କ ମିଳିତ ସହଯୋଗ ଓ ସମର୍ପଣ ଯୋଗୁ ସମଗ୍ର କାର୍ଯ୍ୟକ୍ରମଟି ବେଶ୍ ସଫଳତାର ସହ ସମ୍ପନ୍ନ ହୋଇଛି।
