ଅହମଦାବାଦ,୧୬ା୧୧: ଦିନିକିଆ କ୍ରିକେଟ ବିଶ୍ୱକପ୍ ଫାଇନାଲରେ ଦ୍ୱିତୀୟ ଥର ଅଷ୍ଟ୍ରେଲିଆକୁ ଭେଟିବ ଭାରତ। ପ୍ରଥମ ଥର ୨୦୦୩ରେ ଉଭୟ ଦଳ ମୁହାଁମୁହିଁ ହୋଇଥିବା ବେଳେ ୨୦ ବର୍ଷ ପରେ ପୁନର୍ବାର ସମାନ ଘଟଣା ଆଉ ଥରେ ଦେଖିବେ ଭାରତୀୟ କ୍ରିକେଟ ଫ୍ୟାନ୍। ନ୍ୟୁଜିଲାଣ୍ଡକୁ ପରାସ୍ତ କରି ପ୍ରଥମ ଦଳ ଭାବେ ଭାରତ ଫାଇନାଲ ଟିକେଟ ହାସଲ କରି ନେଇଥିବା ବେଳେ ଦକ୍ଷିଣ ଆଫ୍ରିକାକୁ ପରାସ୍ତ କରି ଫାଇନାଲରେ ପ୍ରବେଶ କରିଛି ଅଷ୍ଟ୍ରେଲିଆ। ୫ ଥରର ବିଶ୍ୱ ଚାମ୍ପିୟନ ଅଷ୍ଟ୍ରେଲିଆ ସହିତ ମୁକାବିଲା ରହିଥିବା ବେଳେ ୨୦୦୩ ବିଶ୍ୱକପ୍ ଫାଇନାଲ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିବ ଭାରତ।
୨୦୦୩ରେ ଜୋହାନସ୍ବର୍ଗରେ ସୌରଭ ଗାଙ୍ଗୁଲିଙ୍କ ନେତୃତ୍ୱାଧୀନ ଭାରତୀୟ ଦଳକୁ ୧୨୫ ରନ୍ରେ ପରାସ୍ତ କରି ଟାଇଟଲ ହାସଲ କରିଥିଲା ଅଷ୍ଟ୍ରେଲିଆ। ବର୍ତ୍ତମାନ ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତ ନିକଟରେ ଏହାର ପ୍ରତିଶୋଧ ନେବାର ସୁବର୍ଣ୍ଣ ସୁଯୋଗ ରହିଛି। ଚଳିତ ଟୁର୍ନାମେଣ୍ଟରେ ଭାରତ ଗୋଟିଏ ବି ମ୍ୟାଚ୍ରେ ହାରିନାହିଁ। ଅନ୍ୟପକ୍ଷରେ ଲିଗ୍ ମ୍ୟାଚରେ ଦଳ ଅଷ୍ଟ୍ରେଲିଆକୁ ଥରେ ପରାସ୍ତ କରିସାରିଛି। ୨୦୧୧ରେ ଭାରତରେ ଖେଳାଯାଇଥିବା ବିଶ୍ୱକପ୍ର କ୍ୱାର୍ଟର ଫାଇନାଲରେ ଉଭୟ ଦଳ ସାମ୍ନାସାମ୍ନି ହୋଇଥିବା ବେଳେ ଭାରତ ବିଜୟୀ ହୋଇଥିଲା।
ତେବେ ୨୦୧୫ ବିଶ୍ୱକପ୍ ସେମିଫାଇନାଲରେ ଭାରତକୁ ହରାଇଥିଲା ଅଷ୍ଟ୍ରେଲିଆ। ଚଳିତ ବିଶ୍ୱକପ୍ରେ ଉଭୟ ଦଳ ଫାଇନାଲରେ ପ୍ରବେଶ କରିଥିବା ବେଳେ ଭାରତ ନିକଟରେ ପ୍ରତିଶୋଧ ନେବାର ସୁବର୍ଣ୍ଣ ସୁଯୋଗ ରହିଛି। ଦିନିକିଆ ବିଶ୍ୱକପ୍ରେ ଉଭୟ ଦଳ ୧୩ ଥର ସାମ୍ନାସାମ୍ନି ହୋଇଥିବା ବେଳେ ଅଷ୍ଟ୍ରେଲିଆ ୮ ଥର ଓ ଭାରତ ୫ ଥର ବିଜୟୀ ହୋଇଛି। ତେବେ ଘରୋଇ ମାଟିରେ ଭାରତ ଏହି ମ୍ୟାଚ ଖେଳୁଥିବା ବେଳେ ଭାରତର ପଲା ଭାରି ରହିବ। ଏହା ସହିତ ଭାରତୀୟ ବୋଲିଂ ଓ ବ୍ୟାଟିଂ ଆକ୍ରମଣ ବେଶ୍ ସନ୍ତୁଳିତ ମନେହେଉଥିବା ବେଳେ ୨୦ ବର୍ଷ ପରେ ଫାଇନାଲ ପରାଜୟର ପ୍ରତିଶୋଧ ନେବାକୁ ଦଳ ପ୍ରୟାସ କରିବ।
