ଓଡ଼ିଶାର ଜ୍ୟୋତି ସୁନୀତା କୁଲୁ ନିଜ ଦକ୍ଷତା ବଳରେ ଭାରତୀୟ ଦଳର ଅଧିନାୟିକା ହେବାର ଗୌରବ ଅର୍ଜନ କରିଥିଲେ। ଏବେ ଜାତୀୟ ସିନିୟର ମହିଳା ହକିରେ ପଦାର୍ପଣ କରିଛନ୍ତି ଆଉ ଜଣେ ଜ୍ୟୋତି। ସେ ହେଉଛନ୍ତି ଜ୍ୟୋତି ଛତ୍ରୀ। ଜ୍ୟୋତିଙ୍କ ପାଇଁ ଆଗକୁ ବଢ଼ିବାର ଭଲ ସୁଯୋଗ ଆସିଛି। ସେ ଭାରତୀୟ ସିନିୟର ୩୩ ଜଣିଆ କୋର୍ ଦଳରେ ସାମିଲ ହୋଇ ବେଙ୍ଗାଲୁରୁସ୍ଥିତ ସାଇ (ଭାରତୀୟ କ୍ରୀଡ଼ା ପ୍ରାଧିକରଣ) କ୍ୟାମ୍ପରେ ଟ୍ରେନିଂ ନେଉଛନ୍ତି। ଏପ୍ରିଲ ୯ରେ ଆରମ୍ଭ ହୋଇଥିବା ଏହି କ୍ୟାମ୍ପ ମେ’ ୧୩ ପର୍ଯ୍ୟନ୍ତ ଚାଲିବ। ଆଗାମୀ ଅଷ୍ଟ୍ରେଲିଆ ଗସ୍ତ, ଚାଇନାରେ ହେବାକୁଥିବା ଏସିଆନ ଗେମ୍ସ ଆଦି ଟୁର୍ନାମେଣ୍ଟକୁ ଦୃଷ୍ଟିରେ ରଖି ଭାରତୀୟ କୋର୍ ଦଳ ଏହି କ୍ୟାମ୍ପରେ ନିଜକୁ ପ୍ରସ୍ତୁତ କରୁଛି। ୨୦ ବର୍ଷୀୟା ଛତ୍ରୀ ପ୍ରଥମଥରପାଇଁ ସିନିୟର କ୍ୟାମ୍ପରେ ସୁଯୋଗ ପାଇଛନ୍ତି। ସୁନ୍ଦରଗଡ଼ କ୍ରୀଡ଼ା ଛାତ୍ରାବାସର ଜାତୀୟ ହକି କ୍ୟାଡେଟ୍ ହେଉଛନ୍ତି ଛତ୍ରୀ। ପ୍ରତିଭାକୁ ଦୃଷ୍ଟିରେ ରଖି ଛତ୍ରୀଙ୍କୁ ୨୦୨୧ରୁ ଓଡ଼ିଶା ନାଭାଲ ଟାଟା ହକି ଏଚ୍ପିସିରେ ଟ୍ରେନିଂ ଦିଆଯାଉଛି। ସୁନ୍ଦରଗଡ଼ ଜିଲା ରାଉରକେଲାରେ ଜନ୍ମିତ ଜ୍ୟୋତି ୩ ସନ୍ତାନଙ୍କ ମଧ୍ୟରୁ ସର୍ବକନିଷ୍ଠ। ସୁନ୍ଦରଗଡ଼ ଜିଲାର ଅଧିକାଂଶ ଖେଳାଳି ହକି ପ୍ରେମରେ ପଡ଼ିଥାନ୍ତି। ଏଥିରୁ ଜ୍ୟୋତି ମଧ୍ୟ ବାଦ୍ ପଡ଼ିନାହାନ୍ତି। ପରିବାରରେ ହକିପ୍ରତି ପ୍ରବଳ ଆଗ୍ରହ ଥିବାରୁ ସେ ୨୦୧୪ରେ ହକିକୁ ଆପଣେଇ ନିଅନ୍ତି। ଜ୍ୟୋତିଙ୍କ ଭାଇ ମଧ୍ୟ ଜଣେ ହକି ଗୋଲକିପର। ସେ ତାଙ୍କୁ ହକିକୁ କ୍ୟାରିୟର କରିବାକୁ ଉତ୍ସାହିତ କରିଥିଲେ।
ଜଣିଆ କୋର୍ ଦଳରେ ସାମିଲ ହୋଇଥିବାରୁ ଜ୍ୟୋତିଙ୍କ ଖୁସି କହିଲେ ନ ସରେ। ”ଏହି କ୍ୟାମ୍ପରେ ଭାରତର ଶ୍ରେଷ୍ଠ ହକି ଖେଳାଳିଙ୍କ ସଂସ୍ପର୍ଶରେ ଆସି ଅନେକ କିଛି ଶିଖିବାକୁ ମିଳୁଛି। ଉଚ୍ଚସ୍ତରରେ ଖେଳିବା ଏବଂ ଭାରତକୁ ପ୍ରତିନିଧିତ୍ୱ କରିବା ଆମ ସମସ୍ତଙ୍କର ସ୍ବପ୍ନ। ତେଣୁ ଏହା ମୋ ପାଇଁ ଏକ ବଡ଼ ସୁଯୋଗ। ମୁଁ ଯେଉଁଠାରେ ବଢ଼ିଛି ସେଠାରେ ହକି ଅତ୍ୟନ୍ତ ଲୋକପ୍ରିୟ। ମୋ ଭାଇ ହକି ଖେଳନ୍ତି ଏବଂ ସେ ମୋତେ ଏହି କ୍ରୀଡ଼ାକୁ କ୍ୟାରିୟର କରିବାକୁ ଉତ୍ସାହିତ କରିଛନ୍ତି। ପାନପୋଷ ଷ୍ଟାଡିୟମ ମୋ ଘରଠାରୁ ଅଳ୍ପ ଦୂରରେ। ମୁଁ ଭାଗ୍ୟବାନ ଯେ ଏହି ରାଜ୍ୟ କ୍ରୀଡ଼ା ଛାତ୍ରାବାସରେ ଭର୍ତ୍ତି ହେବାର ସୁଯୋଗ ପାଇଥିଲି। ସେଠାରୁ ମୁଁ ହକିକୁ ଗୁରୁତ୍ୱର ସହ ନେଇଥିଲି“ ବୋଲି ପ୍ରତିଭାସମ୍ପନ୍ନ ଡିଫେଣ୍ଡର ଜ୍ୟୋତି ପ୍ରକାଶ କରିଛନ୍ତି।
ଜ୍ୟୋତି ଭୁବନେଶ୍ୱରସ୍ଥିତ ଓଡ଼ିଶା ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର କାର୍ଯ୍ୟକ୍ରମରେ ଯୋଗଦେବାପାଇଁ ଯୋଗ୍ୟ ବିବେଚିତ ହୋଇଥିଲେ। ଘରଠାରୁ ଦୂରରେ ରହିବା ତାଙ୍କପାଇଁ ଚ୍ୟାଲେଞ୍ଜ ଥିଲା। ମାତ୍ର ପରିବାର ଏବଂ ଓଡ଼ିଶା ନାଭାଲ ଟାଟା ଏଚ୍ପିସି କୋଚ୍ଙ୍କ ସମର୍ଥନ ଯୋଗୁ ତାହା ସମ୍ଭବ ହୋଇପାରିଥିଲା। ଏଚ୍ପିସିରେ ଯୋଗଦେବା ପରଠାରୁ ସେ ଅନେକ କିଛି ଶିଖିବାକୁ ପାଇଛନ୍ତି ବୋଲି କହିଛନ୍ତି।
