ଭବାନୀପାଟଣା,୨୮।୪ (ଉତ୍ତମ କୁମାର ଦାଶ): ପୁରାତନ କାଳରେ ଯେତେବେଳେ ଟଙ୍କାର ପ୍ରଚଳନ ନ ଥିଲା ସେତେବେଳେ ମଣିଷ ନିଜର ଦୈନନ୍ଦିନ ଜୀବନର ଚାହିଦା ମେଣ୍ଟାଇବା ପାଇଁ ଦ୍ରବ୍ୟର ଆଦାନ ପ୍ରଦାନ ମାଧ୍ୟମରେ ବିପଣନ କରୁଥିଲା। ଏହି କ୍ରମରେ ନିଜ ପାଖରେ ଥିବା ଦ୍ରବ୍ୟକୁ ଦେଇ ପ୍ରତିବଦଳରେ ଆବଶ୍ୟକ ଜିନିଷ ଅନ୍ୟଠୁ କ୍ରୟ କରୁଥିଲା। ସମୟର ପରିବର୍ତ୍ତନ ସହିତ ଟଙ୍କାର ପ୍ରଚଳନ ହେଲା ଓ ମଣିଷ ସହଜରେ ନିଜ ଦରକାରୀ ଜିନିଷ କ୍ରୟ କରିପାରିଲା। ତେବେ କଳାହାଣ୍ଡି ଜିଲାର ଆଦିବାସୀ ଅଧୁଷିତ ଅଞ୍ଚଳ ଥୁଆମୂଳ ରାମପୁର ବ୍ଲକରେ ଆଜି ବି ଏମିତି ଅନେକ ଗାଁ ଅଛି ଯେଉଁଠି ଆଦିବାସୀ ମହିଳାମାନେ ନଗଦ ଟଙ୍କାର ପ୍ରଚଳନକୁ ନିରୁତ୍ସାହିତ କରନ୍ତି। ଯାହାକି ବେଶ ଚର୍ଚ୍ଚାର ବିଷୟ ପାଲଟିଛି।
କଳାହାଣ୍ଡି ଜିଲାର ଥୁଆମୂଳ ରାମପୁର ବ୍ଲକ ଘଞ୍ଚ ଜଙ୍ଗଲ ମଧ୍ୟରେ ରହିଥିବା ବେଳେ ପ୍ରାୟତଃ ଏଠାରେ ଆଦିବାସୀ ସଂପ୍ରଦାୟର ଲୋକମାନେ ବସବାସ କରନ୍ତି। ଆଉ ସେମାନେ ଜଙ୍ଗଲ ପାହାଡିଆ ଅଞ୍ଚଳରେ କାନ୍ଦୁଳ, ହରଡ, ମୁଗ, ବିରି, କୋଳଥ, ମାଣ୍ଡିଆ ଭଳି ଡାଲି ଜାତୀୟ ଶସ୍ୟ ଚାଷ କରିଥାନ୍ତି। ଆଉ ଏହି ସବୁ ଚାଷରେ ମହିଳାମାନେ ପ୍ରମୂଖ ଭୂମିକା ଗ୍ରହଣ କରୁଥିବାବେଳେ ତାକୁ ବିକ୍ରି କରି ସେମାନେ ନିଜ ଗୁଜୁରାଣ ମେଣ୍ଟାଇଥାନ୍ତି। ଆଉ ଏହାକୁ ବିକ୍ରି କରୁଥିବାବେଳେ ଦେଖିବାକୁ ମିଳିଥାଏ ରୋଚକ ଦୃଶ୍ୟ। ଯଦି କୌଣସି ବ୍ୟକ୍ତି କାନ୍ଦୁଲ ଡାଲି କିମ୍ବା ହରଡ କିଣିବାକୁ ଆସିଥାଏ ତାହେଲେ ତାକୁ ଟଙ୍କା ପ୍ରତିବଦଳରେ ଚାଉଳ ଦେବାକୁ ପଡିଥାଏ। ଗୋଟିଏ ମାଣ କାନ୍ଦୁଳ ନେବାକୁ ହେଲେ ଗ୍ରାହକ ଜଣଙ୍କୁ ତିନି ମାଣ ଚାଉଳ ଦେବାକୁ ପଡିଥାଏ। ଆଉ ଜଣେ ଯଦି ଗୋଟିଏ ବସ୍ତା କାନ୍ଦୁଳ ଡାଲି ନେବାକୁ ଇଚ୍ଛା ପ୍ରକାଶ କରେ ତାହେଲେ ତାକୁ ତିନି ବସ୍ତା ଚାଉଳ ଦେବାକୁ ପଡିଥାଏ। ଆଉ ଗ୍ରାହକ ଯଦି ଟଙ୍କା ନେଇ ଆସେ ତାହେଲେ ତାକୁ ଖାଲି ହାତରେ ଫେରିଯିବାକୁ ପଡିଥାଏ। ଆଉ ତାର ମୁଖ୍ୟ କାରଣ ହେଲା ଆଦିବାସୀ ମହିଳାମାନେ ଘରେ ନଗଦ ଟଙ୍କା ରଖିବାକୁ ନିରାପଦ ମଣି ନ ଥାନ୍ତି । ସେମାନଙ୍କ ଯୁକ୍ତି ହେଲା ଯେ ଯଦି ଘରେ ନଗଦ ଟଙ୍କା ଗଚ୍ଛିତ ରହେ,ତେବେ ଘରର ପୁରୁଷ ମାନେ ଉକ୍ତ ଟଙ୍କାର ଅପବ୍ୟବହାର କରି ବଦଖର୍ଚ୍ଚ କରିବେ। ଅନେକ ଦିନରୁ ଆଦିବାସୀ ମହିଳାମାନଙ୍କ ଏହି ଆଶଙ୍କା ଯୋଗୁ ଗାଁ ଲୋକେ ଘରେ ପଇସା ରଖନ୍ତି ନାହିଁ। ଚାଉଳ ଏବଂ ଅନ୍ୟାନ୍ୟ ଜିନିଷ ପ୍ରତିବଦଳରେ ଘରର ଆବଶ୍ୟକତା ମେଣ୍ଟାଇ ଥାନ୍ତି। ଏଠାକାର ଆଦିବାସୀ ମହିଳାମାନେ କାହିଁ କେଉଁ କାଳରୁ ଏହି ପ୍ରଥା ଚଳାଇ ଆସୁଥିବା ବେଳେ ଏହା ଦ୍ବାରା ଯେ କେବଳ ତାଙ୍କ ଅର୍ଥର ଅପବ୍ୟବହାର କମିଥାଏ ତାହା ନୁହେିଁ, ବରଂ ଘରର ପୁରୁଷ ମାନେ ମଧ୍ୟ ଅପବ୍ୟବହାର ବଦ ଖର୍ଚ୍ଚରୁ ବଞ୍ଚିତ ହୁଅନ୍ତି ବୋଲି ମତ ରଖନ୍ତି ସ୍ଥାନୀୟ ବାସିନ୍ଦା। ଦୀର୍ଘ ବର୍ଷରୁ ଏହି ଭଳି ପ୍ରଥା ଚାଲି ଆସୁଥିବା ବେଳେ ବିଶେଷ କରି ମହିଳାଙ୍କ ଏହିଭଳି ଉଦ୍ୟମ ପରିବାରର ପୁରୁଷ ମାନଙ୍କୁ ଠିକ ରାସ୍ତାକୁ ଆଣିବା ପାଇଁ ଏହା ଏକ ପ୍ରୟାସ ବୋଲି ମତ ରଖନ୍ତି ସ୍ଥାନୀୟ ମହିଳା ଅଗ୍ନୀ ମାଝୀ, ହେରାବତୀ ମାଝୀ। ଅନ୍ୟପକ୍ଷରେ, ଘରେ ଆଦିବାସୀ ମହିଳା ଟଙ୍କା ରଖୁ ନ ଥିବା ବେଳେ ସେମାନେ ମଧ୍ୟ ବଜାରରୁ କୌଣସି ସାମଗ୍ରୀ କିଣିବାକୁ ଗଲେ ଘରେ ରଖୁଥିବା ଚାଉଳ ବିନିମୟରେ ସାମଗ୍ରୀ କିଣୁ ଥିବାର ମଧ୍ୟ ନଜରକୁ ଆସିଥାଏ।
