ଖଇରା,୧୨ା୬(ଡି.ଏନ୍.ଏ.): ସ୍ତ୍ରୀ-ସ୍ବାମୀଙ୍କ ମଧ୍ୟରେ ଝଗଡ଼ା ଉଗ୍ର ରୂପ ନେବାରୁ ସ୍ତ୍ରୀ ଜୀବନ ହାରିଥିବା ବେଳେ ସ୍ବାମୀ ଆତ୍ମହତ୍ୟା ଉଦ୍ୟମ କରି ଏବେ ମେଡିକାଲରେ ଭର୍ତ୍ତି ହୋଇଛନ୍ତି। ଏପରି ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲା ଖଇରା ଥାନା ଅନ୍ତର୍ଗତ ରଇଁତରା ଗାଁରେ। ମୃତ ମହିଳା ଜଣଙ୍କ ହେଲେ ପୂଜା ଜେନା। ସ୍ବାମୀ କୈଳାସ ଜେନାଙ୍କୁ ଗୁରୁତର ଅବସ୍ଥାରେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ, ମାସକ ତଳେ କୈଳାସ ସୋର ଅଞ୍ଚଳର ସତ୍ୟାନନ୍ଦ ଜେନାଙ୍କ ଝିଅ ପୂଜାଙ୍କୁ ବୈଦିକ ରୀତିରେ ବିବାହ କରିଥିଲେ। ବିବାହ ପରଠୁ ଉଭୟଙ୍କ ମଧ୍ୟରେ ବିଭିନ୍ନ କଥାକୁ ନେଇ ପାଟିତୁଣ୍ଡ ଲାଗି ରହୁଥିଲା। ଘଟଣା ସମ୍ପର୍କରେ ପୂଜା ବାପଘର ଲୋକଙ୍କୁ ଜଣାଇଥିଲେ। ରଜକୁ ଆସିଲେ ସମାଧାନ କରିବା ନେଇ ବାପଘର ଲୋକ ଝିଅକୁ କଥା ଦେଇଥିଲେ। ହେଲେ ରଜର ଦୁଇ ଦିନ ପୂର୍ବରୁ ଆଜି ପୂଜା ରଶି ଲଗାଇ ଆତ୍ମହତ୍ୟା କରିଛନ୍ତି। ଏହା ପରେ ତାଙ୍କ ସ୍ବାମୀ କୈଳାସ ଘରେ ଲାଗିଥିବା ବିଦ୍ୟୁତ୍ତାରକୁ ଧରି ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ। ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛନ୍ତି।
