ଖଇରା,୨୨ା୩(ଉତ୍କଳବନ୍ଧୁ ପଣ୍ଡା): ବିଦ୍ୟାଧରପୁର ଡିଭିଜନ ଅନ୍ତର୍ଗତ ଖଇରା ସବଡିଭିଜନର ଆମ୍ବହତା କେନାଲ ପାର୍ଶ୍ୱ ରାସ୍ତା ନିର୍ମାଣ ହେବାର ବର୍ଷେ ମଧ୍ୟରେ ପୁନଃନିର୍ମାଣ କରାଯିବା ନାମରେ ରାସ୍ତାକୁ ୬ମାସ ହେଲା ଖୋଳି ଛାଡ଼ି ଦିଆଯାଇଛି। ଫଳରେ ଯାତ୍ରୀମାନେ ବିପଦସଂକୁଳ ଅବସ୍ଥାରେ ଯାତାୟତ କରୁଛନ୍ତି। ଠିକାଦାରଙ୍କ ଏଭଳି ବେପରୁଆ କାର୍ଯ୍ୟ ପାଇଁ ଦୈନନ୍ଦିନ ଛୋଟବଡ଼ ଦୁର୍ଘଟଣା ଘଟୁଛି। ରାସ୍ତାର ତାଳଗଦି ନିକଟରେ ଆଗରପଡ଼ା ଥାନା ଡଗରପଡ଼ା ଗ୍ରାମର ଅକ୍ଷୟ ଦାସଙ୍କ ମୃତ୍ୟୁ ହେବା ଓ ମହାନ୍ତିପଡ଼ାର ଅନ୍ୟ୨ଜଣ ଯୁବକ ଗୁରୁତର ଆହତ ହୋଇଥିଲେ ହେଁ ବିଭାଗ କିମ୍ବା ଠିକାଦାରଙ୍କ ତରଫରୁ କୌଣସି ତପତ୍ରତା ପ୍ରକାଶ ପାଇଲା ନାହିଁ। ତୁରନ୍ତ ରାସ୍ତାକୁ ସମ୍ପୂର୍ଣ୍ଣ କରିବାକୁ ଖଇରା ବ୍ଲକର କୁପାରୀ, ବାଉଁଶଗଡିଆ, ହରିପୁର, ରଟିଣା, ବର୍ତ୍ତନା ପ୍ରଭୃତି ପଞ୍ଚାୟତର ଜନସାଧାରଣ ଦାବି କରିଛନ୍ତି। ଉକ୍ତ ରାସ୍ତାରେ ବାଲେଶ୍ୱରରୁ କେନ୍ଦୁଝର ଜିଲାର ବିଭିନ୍ନ ସ୍ଥାନକୁ ସ୍ବଳ୍ପ ଖର୍ଚ୍ଚ ତଥା ଅଳ୍ପ ସମୟରେ ପହଞ୍ଚିବାକୁୁ ଦୈନିକ ଶହଶହ ସଂଖ୍ୟାର ଯାତ୍ରୀ ଏହି ରାସ୍ତା ବ୍ୟବହାର କରିଥାନ୍ତି। ରାସ୍ତାକୁ ଉନ୍ନତମାନର କରାଯିବା ଲକ୍ଷ୍ୟରେ ୬କି.ମି.ରୁ ୧୬କି.ମି. ପର୍ଯ୍ୟନ୍ତ ରାସ୍ତାକୁ ପିଚୁ କରିବାକୁ ପାଖାପାଖି ୫କୋଟି ଟଙ୍କା ପ୍ରଦାନ କରାଯାଇଥିଲା।
କାମ ସମ୍ପୂର୍ଣ୍ଣ ହେବା ପୁର୍ବରୁ ବହୁ ସ୍ଥାନରେ ରାସ୍ତା ଦବିବା ଓ ପିଚୁ ଉଠିବା ନେଇ ଯାତ୍ରୀ ତଥା ବିଭିନ୍ନ ପଞ୍ଚାୟତର ଲୋକପ୍ରତିନିଧିମାନେ ରାସ୍ତାରମାନକୁ ନେଇ ପ୍ରଶ୍ନ ଉଠାଇଥିଲେ। ପର୍ଯ୍ୟାପ୍ତ ଅଭିଯୋଗ ତଥା ଡିଭିଜନର ଯନ୍ତ୍ରୀଗଣ ଏ ବିଷୟ ହୃଦୟଙ୍ଗମ କରିବା ପରେ ରାସ୍ତାକୁ ପୁନଃନିର୍ମାଣ ପାଇଁ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଥିଲା। ଠିକାଦାର ଚୁଡାନ୍ତ ବିଲ୍ ଅଟକିବା ଭୟରେ ଅନ୍ୟକିଛି ଉପାୟ ନ ପାଇ ରାସ୍ତାକୁ ପୁନର୍ବାର ନିର୍ମାଣ ପାଇଁ ଖୋଳି ଦେଇଥିଲେ। ହେଲେ ରାସ୍ତା ଖୋଳାଯିବାର ୬ମାସ ବିତି ଯାଇଥିଲେ ହେଁ ସଂପୃକ୍ତ ଠିକାଦାର ରାସ୍ତା ଶେଷ କରିବାର ନାଁଗନ୍ଧ ଧରୁ ନାହାଁନ୍ତି। ଏ ସମ୍ପର୍କରେ ସହକାରୀ ନିର୍ବାହୀ ଯନ୍ତ୍ରୀ ନରହରି ପ୍ରଧାନଙ୍କୁ ଯୋଗାଯୋଗ କରିବାରେ ସେ କାର୍ଯ୍ୟରେ ଯୋଗଦେବା ପୂର୍ବରୁ ପୂର୍ବ ଯନ୍ତ୍ରୀଙ୍କ ସମୟରେ କାମ ହୋଇଥିଲା। ସେ ଆସିବା ପରେ ରାସ୍ତା ନିମ୍ନମାନର ହୋଇଥିବା ଉପଲବ୍ଧି କରି ପୁନଃନିର୍ମାଣ ପାଇଁ ଠିକାଦାରଙ୍କୁ ନିର୍ଦ୍ଦେଶ ଦେଇଛନ୍ତି। ଯଦି ସେ ମାର୍ଚ୍ଚ ମାସ ସୁଦ୍ଧା ସମ୍ପୁର୍ଣ୍ଣ ନ କରନ୍ତି ତାଙ୍କ ଫାଇଲ ବନ୍ଦ କରାଯାଇ ନୂତନ ଠିକାଦାରଙ୍କୁ ଏହା ଦିଆଯିବ ବୋଲି କହିଛନ୍ତି।
