ସିଲହେଟ,୩୦।୧୧: ନ୍ୟୁଜିଲାଣ୍ଡ ଦଳ ବର୍ତ୍ତମାନ ବାଂଲାଦେଶ ଗସ୍ତରେ ଅଛି। ଦୁଇ ଦଳ ମଧ୍ୟରେ ଦୁଇଟି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳାଯାଉଛି। ସିଲହେଟରେ ଖେଳାଯାଉଥିବା ପ୍ରଥମ ଟେଷ୍ଟରେ ବାଂଲାଦେଶ ପ୍ରଥମ ଇନିଂସରେ ୩୧୦ ରନ ସଂଗ୍ରହ କରିଛି। ଏହାର ଜବାବରେ ଦ୍ୱିତୀୟ ଦିନର ଖେଳ ଶେଷ ହେବା ବେଳକୁ ନ୍ୟୁଜିଲାଣ୍ଡ ପ୍ରଥମ ଇନିଂସରେ ୮ ଉଇକେଟ ହରାଇବା ପରେ ୨୬୬ ରନ ସଂଗ୍ରହ କରିଥିଲା। କେନ ୱିଲିୟମସନ ୧୦୪ ରନର ଇନିଂସ ଖେଳିଥିଲେ। ସେ କ୍ରମାଗତ ଚତୁର୍ଥ ଟେଷ୍ଟରେ ଚତୁର୍ଥ ଶତକସ୍କୋର କରିଥିଲେ।
ୱିଲିୟମସନଙ୍କ ଟେଷ୍ଟ କ୍ୟାରିୟରର ଏହା ୨୯ତମ ଶତକ ଥିଲା ଏବଂ ଏହି ପ୍ରସଙ୍ଗରେ ସେ ବିରାଟ କୋହଲି ଏବଂ ମହାନ ଡନ ବ୍ରାଡମ୍ୟାନଙ୍କ ସହ ସମକକ୍ଷ ହୋଇଥିଲେ। ବିରାଟ ମଧ୍ୟ ୨୯ ଶତକ ହାସଲ କରିଥିବାବେଳେ ବ୍ରାଡମ୍ୟାନ ମଧ୍ୟ ୧୯ ଟେଷ୍ଟ ଶତକ ହାସଲ କରିଛନ୍ତି। ୯୫ତମ ଟେଷ୍ଟର ୧୬୫ତମ ଇନିଂସରେ ୱିଲିୟମସନ ଏହା କରିଥିବାବେଳେ କୋହଲି ୧୧୧ ତମ ଟେଷ୍ଟର ୧୮୭ ତମ ଇନିଂସରେ ୧୯ତମ ଶତକ ହାସଲ କରିଛନ୍ତି। ତେବେ ୫୧ଟି ଟେଷ୍ଟର ୭୯ତମ ଇନିଂସରେ ବ୍ରାଡମ୍ୟାନ ୯ ଶତକ ହାସଲ କରିଥିଲେ।
ନ୍ୟୁଜିଲାଣ୍ଡ ପାଇଁ ଟେଷ୍ଟରେ ଅଧିକାଂଶ ଶତକ ସ୍କୋର କରିବାରେ ୱିଲିୟମସନ ଶୀର୍ଷରେ ଅଛନ୍ତି। ଦୁଇ ନମ୍ବରରେ ପୂର୍ବତନ କିୱି ବ୍ୟାଟ୍ସମ୍ୟାନ ରସ ଟେଲର ଅଛନ୍ତି। ସେ ୧୯ ଟି ଟେଷ୍ଟ ଶତକ ହାସଲ କରିଥିଲେ। ଏଥି ସହିତ ମୋଟାମୋଟି ଭାବେ ସେ ୧୭ତମ ସ୍ଥାନରେ ଅଛନ୍ତି। ଟେଷ୍ଟରେ ସର୍ବାଧିକ ଶତକ ହାସଲ କରିବାରେ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ଶୀର୍ଷରେ ଅଛନ୍ତି। ସେ ୫୧ଟି ଶତକ ହାସଲ କରିଥିଲେ।
