ନୂଆଦିଲ୍ଲୀ,୨୦।୭: ପେପର ଲିକ୍ ମାମଲାକୁ ନେଇ‘କକରୋଚ ଜନତା ପାର୍ଟି’ (CJP) କ୍ରମାଗତ ଭାବେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରୁଛି। ସୋମବାର ସିଜେପି ପକ୍ଷରୁ ସଂସଦ ମାର୍ଚ୍ଚ କରାଯାଇଥିଲା, ଏହି ସମୟରେ ପ୍ରବଳ ହଙ୍ଗାମା ହୋଇଥିଲା। ଏହି ହଙ୍ଗାମା ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଖବର ସାମ୍ନାକୁ ଆସିଛି। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଭେଟିବା ପାଇଁ ପହଞ୍ଚିଛନ୍ତି। ଉଭୟଙ୍କ ମଧ୍ୟରେ ଏହି ସାକ୍ଷାତକାର କେଉଁ ପ୍ରସଙ୍ଗକୁ ନେଇ ହେବ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ପରିବେଶ କର୍ମୀ ସୋନମ ୱାଙ୍ଗଚୁକ ପେପର ଲିକ ମାମଲାକୁ ନେଇ ଭୋକ ହରତାଳରେ ଥିଲେ। ସେ ମଧ୍ୟ ସୋମବାର ନିଜର ହରତାଳ ଶେଷ କରିବାକୁ ଘୋଷଣା କରିଛନ୍ତି। ବର୍ତ୍ତମାନ ଧର୍ମେନ୍ଦ୍ର ପ୍ରଧାନ ନିଜ ପଦରୁ ଇସ୍ତଫା ଦେବେ କି ନାହିଁ, ସେ ନେଇ କୌଣସି ସୂଚନା ମିଳିନାହିଁ। ଗୁରୁତ୍ୱପୂର୍ଣ୍ଣ କଥା ହେଉଛି, ସିଜେପିର ପ୍ରଦର୍ଶନକାରୀମାନେ ସଂସଦ ଭବନର ବେଶ ନିକଟତର ହୋଇଯାଇଥିଲେ। ଏହି ସମୟରେ ପୋଲିସ ଲାଠିଚାର୍ଜ କରିବା ସହ ଅଶ୍ରୁଗ୍ୟାସ ମଧ୍ୟ ପ୍ରୟୋଗ କରିଥିଲା।
ସଂସଦ ମାର୍ଚ୍ଚରେ ସାମିଲ ହେବା ପାଇଁ ଜନ୍ତର-ମନ୍ତର ଯିବାକୁ ଚେଷ୍ଟା କରୁଥିବା ବେଳେ ଅନେକ ପ୍ରଦର୍ଶନକାରୀ ଶାସ୍ତ୍ରୀ ଭବନ ନିକଟରେ ଥିବା ବ୍ୟାରିକେଡ ଭାଙ୍ଗିବାକୁ ପ୍ରୟାସ କରିଥିଲେ। ଏହାପରେ ସୁରକ୍ଷା ବଳ ପ୍ରଦର୍ଶନକାରୀଙ୍କୁ ନିୟନ୍ତ୍ରଣ କରିବା ପାଇଁ ଅଶ୍ରୁଗ୍ୟାସ ପ୍ରୟୋଗ କରିଥିଲେ। ଏହା ସହିତ କିଛି ସ୍ଥାନରେ ଲାଠିଚାର୍ଜ ମଧ୍ୟ ହୋଇଥିଲା। ସେହିପରି ସତର୍କତା ମୂଳକ ପଦକ୍ଷେପ ସ୍ବରୂପ ଜନପଥ, ପଟେଲ ଚୌକ, ରାଜୀବ ଚୌକ, କେନ୍ଦ୍ରୀୟ ସଚିବାଳୟ ଏବଂ ସେବା ତୀର୍ଥ ମେଟ୍ରୋ ଷ୍ଟେଶନରେ ପ୍ରବେଶ ଉପରେ କଟକଣା ଲଗାଯିବା ଏବଂ ଗେଟ୍ ବନ୍ଦ ହୋଇଯିବା କାରଣରୁ ଅନେକ ଯାତ୍ରୀ ମେଟ୍ରୋ ଷ୍ଟେଶନ ଭିତରେ ହିଁ ଫସି ରହିଥିଲେ।
