ଭୁବନେଶ୍ୱର, ୨୦।୯ (ସ୍ପୋଟର୍ସ ବ୍ୟୁରୋ): ଆଦାନି ସ୍ପୋଟର୍ସ ଲାଇନ୍ ମାଲିକାନାରେ ଥିବା ଗୁଜରାଟ ଜାଏଣ୍ଟ୍ସ ଚଳିତ ଲିଜେଣ୍ଡ୍ସ ଲିଗ୍ କ୍ରିକେଟରେ ବିଜୟ ସହ ଅଭିଯାନ ଆରମ୍ଭ କରିଛି। ନିଜର ପ୍ରଥମ ମ୍ୟାଚ୍ରେ ଏହି ଦଳ ଇଣ୍ଡିଆ କ୍ୟାପିଟାଲ୍ସକୁ ପରାସ୍ତ କରିଛି। ଟୁର୍ନାମେଣ୍ଟରେ ଅନ୍ତର୍ଜାତୀୟ କ୍ରିକେଟ୍ କିମ୍ବଦନ୍ତୀମାନେ ପୁଣିଥରେ ପଡ଼ିଆକୁ ଓହ୍ଲାଇଥିବାବେଳେ ଭାରତର ଅନ୍ୟତମ ମହାନ୍ ଓପ୍ନର ବୀରେନ୍ଦ୍ର ସେହ୍ବାଗ୍ ନିଜ ଟିମ୍ ପାଇଁ ରନ୍ ସ୍କୋର୍ କରି ପୁଣିଥରେ ତାଙ୍କ ପ୍ରଶସଂକଙ୍କୁ ପ୍ରଭାବିତ କରିବାକୁ ପ୍ରସ୍ତୁତ ଅଛନ୍ତି। ସେହ୍ବାଗ କହିଛନ୍ତି ଯେ, ”ଏହା ଏକ ଭଲ ଆରମ୍ଭ ଥିଲା। କେଭିନ୍ ଓ’ ବ୍ରାଏନ୍ ଶତକ ହାସଲ କରିଥିବାବେଳେ ଆମ ବୋଲରମାନେ ମଧ୍ୟ ଭଲ ଖେଳିଥିଲେ। କ୍ରିକେଟ୍ ପଡ଼ିଆକୁ ଫେରିବାର ଏହି ସୁଯୋଗ ସହିତ ମୁଁ ବ୍ୟାଟିଂ ମାଧ୍ୟମରେ ପୁଣିଥରେ ମୋର ପ୍ରଶଂସକମାନଙ୍କ ମନୋରଞ୍ଜନ କରିବାକୁ ଚେଷ୍ଟା କରିବି। ଆମ ଦଳ ଭଲ ପ୍ରଦର୍ଶନ ଜାରି ରଖି ଟ୍ରଫି ଜିତିବା ନେଇ ମୁଁ ଆଶାବାଦୀ।“ ଟିମ୍ ସମ୍ପର୍କରେ କୋଚ୍ ଭେଙ୍କଟେଶ ପ୍ରସାଦ କହିଛନ୍ତି, ”ଗୁଜରାଟ ଜାଏଣ୍ଟ୍ସ ସହ ଜଡ଼ିତ ହେବା ମୋ ପାଇଁ ଏକ ସୁଯୋଗ ସଦୃଶ। ଏହି କ୍ରିକେଟରମାନେ କେବଳ କିମ୍ବଦନ୍ତୀ ନୁହନ୍ତି ବରଂ କ୍ରୀଡ଼ାକ୍ଷେତ୍ରରେ ଜଣେ ଜଣେ ମହାନ୍ ଖେଳାଳି। ଗୁଜରାଟ ଜାଏଣ୍ଟ୍ସର ମ୍ୟାଚ୍ ଦେଖୁଥିବା ଓ ଏହାକୁ ଅନୁସରଣ କରୁଥିବା ଦର୍ଶକମାନଙ୍କୁ ମନୋରଞ୍ଜନ ପ୍ରଦାନ କରିବା ଆମର ମୁଖ୍ୟ ଲକ୍ଷ୍ୟ।“
