ବେଗୁନିଆ, ୨୮।୯(ଡି.ଏନ୍.ଏ): ବେଗୁନିଆ ବ୍ଲକ ଅଞ୍ଚଳରେ ପ୍ରାକୃତିକ ବିପର୍ଯ୍ୟୟ ଓ ବନ୍ୟପ୍ରାଣୀଙ୍କ ଉତ୍ପାତ ଯୋଗୁ ଚାଷୀଙ୍କ ଦୁଃଖ ବଢୁଛି। ଏଥିଯୋଗୁ କିଛିବର୍ଷ ହେଲା ଧାନ ଓ ପନିପରିବା ଫସଲ ନଷ୍ଟ ହେବାରେ ଲାଗିଛି। ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଚାଷୀ ଅସନ୍ତୋଷ ଦେଖାଦେଇଛି। ସରକାରଙ୍କ ପକ୍ଷରୁ ଯେତିକି କ୍ଷତିପୂରଣ ସହାୟତା ମିଳୁଛି ତାହା ଭରଣା କରିପାରୁନାହିଁ। ଫଳରେ ଚାଷରୁ ମୁହଁ ଫେରାଇ ଚାଷୀ ହତାଶ ହୋଇବସୁଛି।
କୃଷି କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ଗତ ୭ବର୍ଷ ମଧ୍ୟରେ ହାତୀ ପଲ ୮ଶହ ଏକର ଧାନ ଓ ୧୫୦ ଏକର ପନିପରିବା ଫସଲ ନଷ୍ଟ କରିଥିବା ପ୍ରାଥମିକ ଆକଳନ କରାଯାଇଥିଲା। ବାର୍ହା ପଲଙ୍କ ଯୋଗୁ ୬୦୦ ଏକର ପାଚିଲା ଧାନ ଫସଲ ହାନି ହୋଇଥିଲା। ହାତୀ ଓ ବାର୍ହା ଆକ୍ରମଣରେ ଏହି ବ୍ଲକର ହଜ ଅଞ୍ଚଳରେ ୨, ଗୋଡ଼ା ଅଞ୍ଚଳରେ ୨ ଏବଂ ଦଲକ ଅଞ୍ଚଳରୁ ଜଣଙ୍କୁ ମିଶାଇ ମୋଟ ୫ଜଣଙ୍କ ଜୀବନ ଯାଇଛି। ସେହିପରି ୪ଜଣରୁ ଊର୍ଦ୍ଧ୍ୱ ବ୍ୟକ୍ତି ଆହତ ହୋଇଛନ୍ତି। ସମ୍ପ୍ରତି ପୁଣି କିଛି ଦିନ ହେଲା ହାତୀ ଓ ବାର୍ହା ପଲ ଉତ୍ପାତ ଯୋଗୁ ବେଗୁନିଆ ବ୍ଲକ ଅଞ୍ଚଳରେ ବ୍ୟାପକ ଫସଲ ହାନି ହୋଇଛି। ଚଳିତ ଖରିଫ ଋତୁରେ ବେଗୁନିଆ ବ୍ଲକ ଅଧୀନ ହଜ୍, ସିକୋ, ହୀରାପୁର, ବୋତଳମା, ଦେଉଳି, ଗୋବିନ୍ଦପୁର ଓ ଶଗଡ଼ଭଙ୍ଗା ପଞ୍ଚାୟତର ୪୦ରୁ ଊଦ୍ଧର୍ବ ଗାଁର ବହୁ ଚାଷୀଙ୍କ ଧାନ ଓ ପରିବା ଫସଲ ନଷ୍ଟ ହୋଇଛି। ଶନିବାର ରାତିରେ ହାତୀପଲ ହଜ ପଞ୍ଚାୟତ ନିଧିପୁର ଓ ମୁକ୍ତାପୁର ଗ୍ରାମର ମାଗୁଣି ଜେନା, କିଶୋର ଜେନା, ଗଦାଧର ଜେନାଙ୍କ ସହିତ କେତେଜଣ ଚାଷୀଙ୍କ ବ୍ୟାପକ ରୁଆ ଧାନ ଫସଲ ନଷ୍ଟ କରିଛନ୍ତି। କ୍ଷତିଗ୍ରସ୍ତ ଚାଷୀମାନେ ବନ ବିଭାଗ ଓ କୃଷି ବିଭାଗ ନିକଟରେ ବାରମ୍ବାର ଅଭିଯୋଗ କରୁଛନ୍ତି। ମାତ୍ର ସୁଫଳ ମିଳୁନାହିଁ। ଅନ୍ୟପକ୍ଷରେ କ୍ଷତିଗ୍ରସ୍ତ ଚାଷୀଙ୍କୁ ବନ ବିଭାଗ ପକ୍ଷରୁ ଏକର ପିଛା ୧୦ରୁ ୧୨ ହଜାର ଟଙ୍କା କ୍ଷତିପୂରଣ ମିଳୁଛି, ମାତ୍ର ତାହା ଚାଷୀଙ୍କ କ୍ଷତି ଭରଣା କରିପାରୁ ନାହିଁ ବୋଲି ଭାଗୀରଥି ଦଳସିଂହରାୟ, କ୍ଷେତ୍ରବାସୀ ପରିଡ଼ା ଏବଂ ବିଶ୍ୱମ୍ବର ମାଝି ପ୍ରମୁଖ ଚାଷୀ କହିଛନ୍ତି। କେତେଜଣ ଚାଷୀଙ୍କ କହିବା ଅନୁଯାୟୀ, ଗତ ୭ବର୍ଷ ହେଲା ଚନ୍ଦକା ଜଙ୍ଗଲରୁ ହାତୀପଲ ଆସି ବେଗୁନିଆ ବ୍ଲକର ନାରଗୋଦା ଗ୍ରାମ୍ୟ ଜଙ୍ଗଲରେ ରହୁଛନ୍ତି। ସେହି ସମୟରେ ୨ରୁ ୩ଟି ହାତୀଙ୍କୁ ଦେଖିବାକୁ ମିଳିଥିଲା। ବର୍ଷକୁ ବର୍ଷ ସେମାନେ ବଂଶ ବିସ୍ତାର କରୁଛନ୍ତି। ଏହି ପଲ ମଧ୍ୟରେ ଏବେ ୪ଟି ଛୁଆ ସହ ୭ଟି ମା’ ହାତୀ ରହିଥିବା ଦେଖିବାକୁ ମିଳିଛି। ସା ହେଲେ ହାତୀପଲ ବିଭିନ୍ନ ଗାର୍ଁରେ ପଶି ସମ୍ପତ୍ତି ନଷ୍ଟ କରିବା ସହ ଜୀବନ ନେଉଛନ୍ତି। ଆଉ କେତେବେଳେ ଚାଷଜମିକୁ ଯାଇ ଫସଲ ଉଜାଡ଼ୁଛନ୍ତି। ଯଦି ସରକାରଙ୍କ ହସ୍ତକ୍ଷେପରେ ବନ ବିଭାଗ ପକ୍ଷରୁ ହାତୀପଲକୁ ଆୟତ୍ତ କରାଯାଇ ଚନ୍ଦକା ଜଙ୍ଗଲକୁ ନିଆଯାଇପାରନ୍ତା, ତାହାହେଲେ ଚାଷୀଙ୍କ ଦୁଃଖ ଲାଘବ ହୁଅନ୍ତା। ସୂଚନାଯୋଗ୍ୟ, ୨୦୧୨ରୁ କ୍ରମାଗତ ଭାବେ ଏହି ବ୍ଲକରେ ପ୍ରାକୃତିକ ବିପର୍ଯ୍ୟୟ ଦାଉ ସାଧୁଛି। ଅଦିନିଆ ବର୍ଷାରେ ଫସଲ ହାନି, ସ୍ବଳ୍ପ ବୃଷ୍ଟିପାତ ଯୋଗୁ ମରୁଡି ପରିସ୍ଥିତି, ରୋଗ ପୋକ ଆଦି କାରଣରୁ ଫସଲ ହାନି ଘଟିଥିଲା। ପୁଣି ଏବେ ବନ୍ୟଜନ୍ତୁଙ୍କ ଉତ୍ପାତ ଚାଷୀଙ୍କ ଅଣ୍ଟା ଦୋହଲାଇ ଦେବା ଆଶଙ୍କା ସୃଷ୍ଟି କରିଛି।
