ଲୋଇସିଂହା, ୧୪।୧୦(ଡି.ଏନ.ଏ.) – ବଲାଙ୍ଗୀର ଜିଲା ଲୋଇସିଂହା ଓ ଆଗଲପୁର ବ୍ଲକ ଅଞ୍ଚଳରେ ଖରିଫ ଧାନ ପାକଳ ହୋଇ ଆସିଲାଣି। ଆଉ କିଛିଦିନ ପରେ ଅମଳ ପ୍ରକ୍ରିୟା ଆରମ୍ଭ ହୋଇଯିବ। ହେଲେ ଏହାପୂର୍ବରୁ ବନ୍ୟଜନ୍ତୁ ଉପଦ୍ରବ ଚାଷୀଙ୍କ ଚିନ୍ତା ବଢ଼ାଇ ଦେଇଛି। ବନ୍ୟଜନ୍ତୁ ଦାଉରୁ ଫସଲକୁ ସୁରକ୍ଷା ଦେବା ପାଇଁ ଜଙ୍ଗଲ ସୀମାନ୍ତ ଗାଁର ଚାଷୀମାନେ ଗଛରେ ମଞ୍ଚାବାନ୍ଧି ଜଗି ରହୁଛନ୍ତି । ଲୋଇସିଂହା ରେଞ୍ଜ ଅନ୍ତର୍ଗତ ଛେଲିଆପାଟ ଓ ସିଂଜୁରୀ ସଂରକ୍ଷିତ ଜଙ୍ଗଲରେ ବିଗତ କିଛିଦଶନ୍ଧି ହେଲା ହାତୀ ଆସ୍ଥାନ ଜମାଇଛନ୍ତି। ରାତି ସମୟରେ ହାତୀପଲ ଆସି ଲୋଇସିଂହା ବ୍ଲକ କଦଳୀପାଲି, ଭାଲୁପାଲି, ଭାଲିଆମୁଣ୍ଡା, ଚୌହାନପାଲି, ବାଦିବାହାଲ, ଖୁଣ୍ଟଲିମୁଣ୍ଡା, ଯୋଗୀସର୍ଡା, ନେଗିପାଲି ଓ ଆଗଲପୁର ବ୍ଲକର ବେନ୍ଦ୍ରା, ବକଟି, ପଟୁଆପାଲି, ଡୁମେରପାଲି, ବଙ୍ଗାବହାଲ, କୁଟାସିଂହା, ଡୁଙ୍ଗରିପାଲି, ହରଭଙ୍ଗା, ମୁରଶୁଣ୍ଢି, ରାମପୁର, ଲୁହରାମୁଣ୍ଡା, ଧଉଁରାଦାଦର, ତେନ୍ତୁଲିଖୁଣ୍ଟି, କେଶାଇପାଲି, ଲୁହୁରାମୁଣ୍ଡା, ଡୁଡୁକା, ମହାକୁରପାଲି, ଉପରବାହାଲ ପ୍ରଭୃତି ଅଞ୍ଚଳରେ ପ୍ରତିବର୍ଷ ଧାନ ଫସଲ ଓ ପନିପରିବା ଚାଷ ନଷ୍ଟ କରଥାନ୍ତି। ଏହି ଅଞ୍ଚଳରେ ବିଗତ କିଛିବର୍ଷ ହେଲା ବାର୍ହା ପଲ ମଧ୍ୟ ଫସଲ ଖାଉଥିବା ଅଭିଯୋଗ ହେଉଛି ା ହାତୀର ଗତିବିଧି ଅନୁଧ୍ୟାନ ପାଇଁ ହାତୀସ୍କ୍ବାଡ ଥିଲେ ସୁଦ୍ଧା ସେମାନେ କୌଣସି କାମରେ ଆସୁ ନ ଥିବା କ୍ଷତିଗ୍ରସ୍ତ ଅଞ୍ଚଳର ଚାଷୀମାନେ ଅଭିଯୋଗ କରିଛନ୍ତି ା ସେମାନଙ୍କ ଅଭିଯୋଗ ହେଲା ବହୁ ପରିମାଣରେ ଚାଷ କ୍ଷୟକ୍ଷତି ହେଉଥିବାବେଳେ ଉଚିତ ପରିମାଣରେ ସରକାରୀ ସହାୟତା ମିଳୁନାହିଁ। ଚଳିତବର୍ଷ ହାତୀ ଉପଦ୍ରବ ଦେଖାଦେଇନାହିଁ ା ତେବେ ବର୍ଷଯାକର ପରିଶ୍ରମ ବୃଥା ନ ଯିବା ପାଇଁ ଚାଷୀମାନେ ଗଛରେ ମଞ୍ଚା ବାନ୍ଧି ଜଗି ରହୁଥିବା କେଶାଇପାଲି ଗାଁର ରାମେଶ୍ୱର କଠାର, ଯାଦବ ସାହୁ, ରାଧେଶ୍ୟାମ ହାତୀ ପ୍ରମୁଖ ଚାଷୀ କହିଛନ୍ତି। ନିଜ ପକ୍ଷରୁ ଫସଲ ଜଗୁଥିଲେ ହେଁ ବନବିଭାଗ ଟର୍ଚ୍ଚ ଲାଇଟ ଯୋଗାଉ ନ ଥିବାରୁ ସେମାନେ ଅସନ୍ତୋଷ ବ୍ୟକ୍ତ କରିଛନ୍ତି ା ଏ ସମ୍ପର୍କରେ ସାଲେଭଟା ଫରେଷ୍ଟର ମଧୁସୂଦନ ଗଡୁଆ କହନ୍ତି, ଚଳିତ ବର୍ଷ ଚାଷୀଙ୍କଠାରୁ ବାର୍ହା କିମ୍ବା ହାତୀ ଫସଲ ନଷ୍ଟ କରିଥିବା ଅଭିଯୋଗ ଏ ଯାଏ ଆସିନାହିଁ ା ଅଦ୍ୟାବଧି କାହାକୁ ଟର୍ଚ୍ଚଲାଇଟ କାହାକୁ ଦିଆଯାଇ ନ ଥିବା ସେ କହିଛନ୍ତି।
