ନୂଆଦିଲ୍ଲୀ,୬।୬: ପହଲଗାମ ଆକ୍ରମଣ ପରେ ପ୍ରଥମ ଥର ପାଇଁ, ଶୁକ୍ରବାର ଅର୍ଥାତ ଜୁନ ୬,୨୦୨୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜମ୍ମୁ ଏବଂ କଶ୍ମୀରରେ ପହଞ୍ଚିଛନ୍ତି। ଏଠାରେ ସେ ରିଆସି ଜିଲାରେ ନିର୍ମିତ ଚେନାବ ସେତୁର ଉଦଘାଟନ କରିଥିଲେ। ଏହି ସମୟରେ ପ୍ରଧାନମନ୍ତ୍ରୀ ମୋଦି ତ୍ରିରଙ୍ଗା ଉଡ଼ାଉଥିବାର ଦେଖାଯାଇଥିଲା। ଏହି ସେତୁ ଚେନାବ ନଦୀ ଉପରେ ନିର୍ମିତ ଏବଂ ଏହାକୁ ବିଶ୍ୱର ସର୍ବୋଚ୍ଚ ରେଳ ସେତୁ ବୋଲି ବିବେଚନା କରାଯାଏ। ଏହି ସେତୁ ଉଧମପୁର-ଶ୍ରୀନଗର-ବାରାମୁଲ୍ଲା ରେଳ ସଂଯୋଗ ପ୍ରକଳ୍ପର ଏକ ଗୁରୁତ୍ୱପୂର୍ଣ୍ଣ ଅଂଶ।
ଚେନାବ ସେତୁର ଉଚ୍ଚତା ୩୫୯ ମିଟର (ପ୍ରାୟ ୧,୧୭୮ ଫୁଟ), ଯାହା ଆଇଫେଲ ଟାୱାର ଠାରୁ ଅଧିକ। ଷ୍ଟିଲ ଏବଂ କଂକ୍ରିଟ ରେ ନିର୍ମିତ ଏହି ସେତୁ କେବଳ ଇଞ୍ଜିନିୟରିଂ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ନୁହେଁ, ବରଂ ରେଳ ଦ୍ୱାରା କଶ୍ମୀର ଉପତ୍ୟକାକୁ ଭାରତର ଅନ୍ୟାନ୍ୟ ଅଂଶ ସହିତ ସଂଯୋଗ କରିବା ଦିଗରେ ଏକ ଐତିହାସିକ ପଦକ୍ଷେପ। ଉଦଘାଟନ ପୂର୍ବରୁ, ପ୍ରଧାନମନ୍ତ୍ରୀ ମୋଦି ଚେନାବ ରେଳ ସେତୁର ପରିଦର୍ଶନ କରିଥିଲେ ଏବଂ ନିର୍ମାଣ କାର୍ଯ୍ୟରେ ସାମିଲ ଇଞ୍ଜିନିୟର ଏବଂ ଶ୍ରମିକମାନଙ୍କ ସହିତ ଆଲୋଚନା କରିଥିଲେ, ସେ ଏହି ଅଭୂତପୂର୍ବ ଇଞ୍ଜିନିୟରିଂ ପ୍ରକଳ୍ପର ବୈଷୟିକ ଦିଗଗୁଡ଼ିକ ବିଷୟରେ ପଚାରି ବୁଝିଥିଲେ।
ଏହି ୧,୩୧୫ ମିଟର ଲମ୍ବା ସେତୁ ଭୂମିକମ୍ପ ଏବଂ ପ୍ରବଳ ପବନ ସହ୍ୟ କରିପାରିବ। ଏହି ସେତୁ ଉଧମପୁର-ଶ୍ରୀନଗର-ବାରାମୁଲ୍ଲା ରେଳପଥର ଏକ ଅଂଶ ଏବଂ ଏହାର ଉଦଘାଟନ ଜମ୍ମୁରୁ କଶ୍ମୀର ଉପତ୍ୟକା ପର୍ଯ୍ୟନ୍ତ ରେଳ ସଂଯୋଗରେ ଏକ ବଡ଼ ପରିବର୍ତ୍ତନ ଆଣିବ।
ଏବେ ଆଲୋଚନାର ବିଷୟ ହେଉଛି ଯେ ମୋଦି ଚେନାବ ବ୍ରିଜ ଉପରେ କାହିଁକି ତ୍ରିରଙ୍ଗା ଉଡାଇଲେ। କୁହାଯାଉଛି କି ଏହା ପଛରେ ବଡ଼ କାରଣ ରହିଛି। ଏମିତି କରି ସେ ଦେଶର ଆତ୍ମବିଶ୍ୱାସକୁ ଦୃଢ କରିବା ସହିତ, ଶତ୍ରୁ ଦେଶକୁ କଡ଼ା ବାର୍ତ୍ତା ଦେଇଛନ୍ତି। ଏହି ସମୟରେ ମୋଦିଙ୍କ ସହ ସେଠାରେ ଜମ୍ମୁ-କଶ୍ମୀରର ମୁଖ୍ୟମନ୍ତ୍ରୀ ଓମାର ଅବଦୁଲା ବି ଉପସ୍ଥିତ ଥିଲେ। କୁହାଯାଉଛି କି ମୋଦିଙ୍କ ଏପରି ଦୃଷ୍ଟିକୋଣ ସମସ୍ତଙ୍କ ଦୃଷ୍ଟି ଆକର୍ଷଣ କରୁଛି।
