ରାୟଗଡ଼ା,୯ା୪(ସ୍ବ.ପ୍ର.): ରାୟଗଡ଼ା ଜିଲା ରାଜନୀତିରେ ସମୀକରଣ ବଦଳୁଛି। ଆସନ୍ତା ସାଧାରଣ ନିର୍ବାଚନରେ ୩ ପ୍ରମୁଖ ଦଳ ବିଜେଡ଼ି, କଂଗ୍ରେସ ଓ ଭାଜପା ମଧ୍ୟରେ ଜୋରଦାର ଲଢ଼େଇ ହେବ। ତେବେ ବିଜେଡ଼ିକୁ ଭାଜପା ଓ କଂଗ୍ରେସ କଡ଼ା ଟକ୍କର ଦେବା ସମ୍ଭାବନା ରହିଛି। ତେଣୁ ବିଜେଡ଼ି ନୂଆ ରଣନୀତି ପ୍ରସ୍ତୁତ କରିଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଛି।
ରାୟଗଡ଼ା ଜିଲାର ୩ ନିର୍ବାଚନ ମଣ୍ଡଳୀ ଦାୟିତ୍ୱ ବିଜେଡିର ୩ ପ୍ରମୁଖ ନେତା ବୁଝିବେ। ରାୟଗଡ଼ା ନିର୍ବାଚନ ମଣ୍ଡଳୀରେ ପୂର୍ବତନ ରାଜ୍ୟସଭା ସଦସ୍ୟ ଏନ.ଭାସ୍କର ରାଓଙ୍କ ଦବ୍ଦବା ଅଧିକା ରହିଥିବାରୁ ତାଙ୍କୁ ଦାୟିତ୍ୱ ମିଳିପାରେ ବୋଲି କର୍ମୀ ମହଲରେ ଚର୍ଚ୍ଚା ଜୋର ଧରିଛି। ୨୦୧୯ ନିର୍ବାଚନରେ ରୟଗଡ଼ା ଆସନ ପାଇଁ ପୂର୍ବତନ ବିଧାୟକ ତଥା ପୂର୍ବତନ ମନ୍ତ୍ରୀ ଲାଲବିହାରୀ ହିମିରିକା ବିଜେଡ଼ିରୁ ପ୍ରାର୍ଥୀ ହୋଇ ପରାଜୟ ବରଣ କରିଥିଲେ। କଂଗ୍ରେସ ଓ ଭାଜପା ପଛରେ ପଡ଼ିଥିବା ବେଳେ ସ୍ବାଧୀନ ପ୍ରାର୍ଥୀ ମକରନ୍ଦ ମୁଦୁଲି ନିର୍ବାଚନ ଜିତିଥିଲେ। ବିଧାୟକ ହେବା ପରେ ସେ ପ୍ରଥମେ ପରୋକ୍ଷ ଭାବେ ବିଜେଡ଼ିକୁ ସମର୍ଥନ କରିଥିଲେ । ପରବର୍ତ୍ତୀ ସମୟରେ ତାଙ୍କୁ ବିଜେଡ଼ିର ବିଭିନ୍ନ କାର୍ଯ୍ୟକ୍ରମରେ ଦେଖିବାକୁ ମିଳୁଛି। ତେଣୁ ଏଥର ରାୟଗଡ଼ାରୁ ମକରନ୍ଦ ପ୍ରାର୍ଥୀ ହେବା ନେଇ ମଧ୍ୟ ଚର୍ଚ୍ଚା ଚାଲଛି। ସେହିପରି ରାୟଗଡ଼ା ନିର୍ବାଚନ ମଣ୍ଡଳୀ ପାଇଁ କେତେଜଣ ନୂଆ ଯୁବ ନେତା ମଧ୍ୟ ଆଶାୟୀ ରହିଛନ୍ତି। ଗତ ପଞ୍ଚାୟତ ଓ ପୌର ନିର୍ବାଚନରେ ରାୟଗଡ଼ା ବ୍ଲକ ଓ ରାୟଗଡ଼ା ପୌର ପରିଷଦର ଦାୟିତ୍ୱ ନେଇ ପୁଣି ନିଜ କମାଲ ଦେଖାଇଥିଲେ ଭାସ୍କର ରାଓ। ନିପୁଣ ରାଜନୈତିକ ଚାଲ ଯୋଗୁ ଏକଦା କଂଗ୍ରେସଗଡ଼ ବୋଲାଉଥିବା ଅବିଭକ୍ତ କୋରାପୁଟ ଜିଲାରେ ବିଜେଡ଼ିର ପତିଆରା ସ୍ଥାପନ କରିଥିଲେ ସେ। ତେଣୁ ଭାସ୍କର ଯଦି ରାୟଗଡ଼ା ନିର୍ବାଚନ ମଣ୍ଡଳୀର ଦାୟିତ୍ୱ ନିଅନ୍ତି, ସେ ଏଥର କିଭଳି ଗୋଟିଚାଳନା କରିବେ ଏବଂ ମକରନ୍ଦ ନା ନୂଆ ମୁହଁ ବିଜେଡ଼ିରେ ଦେଖାଯିବ ତାହା ଏବେ ଚର୍ଚ୍ଚା ଚାଲିଛି। ସେପଟେ ଭାସ୍କରଙ୍କ ସହିତ ରାଜନୀତିରେ ବହୁ ବର୍ଷରୁ ଜଡ଼ିତ ରହି ଦଳ ପାଇଁ ନିଜକୁ ଉତ୍ସର୍ଗ କରିଥିବା ବହୁ ଯୁବନେତା ଟିକଟ ଲବିରେ ଅଛନ୍ତି। ଅନ୍ୟପକ୍ଷରେ ଲାଲ ବିହାରୀ ହିମିରିକାଙ୍କୁ ନେଇ ଭାସ୍କର ପୁଣି ଥରେ ଗୋଟି ଚାଳନା କରିପାରନ୍ତି ବୋଲି କର୍ମୀ ମହଲରେ ଚର୍ଚ୍ଚା ଚାଲିଛି।ତେବେ ରାଜନୀତିର ଟିକଟ ଦୌଡ଼ରେ ପୂର୍ବତନ ଜିଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲା, କାଶୀପୁର ବ୍ଲକ ଅଧ୍ୟକ୍ଷ କଣ୍ଠେଶ୍ୱର ମାଝି ଓ କିଛି ନୂଆ ମୁହଁ ମଧ୍ୟ ରହିଛନ୍ତି। ଜିଲାରେ ବିଜେଡ଼ିର ଗୋଷ୍ଠୀ କନ୍ଦଳ ଦଳ ପାଇଁ ପରାଜୟର କାରଣ ହୋଇପାରେ ବୋଲି ମଧ୍ୟ ରାଜନୈତିକ ପର୍ଯ୍ୟବେକ୍ଷକ ମତ ପ୍ରକାଶ କରିଛନ୍ତି। କାରଣ ଗତ ନିର୍ବାଚନରେ ବିଜେଡ଼ି ଏହି ଗୋଷ୍ଠୀ କନ୍ଦଳ କାରଣରୁ ପରାଜୟର ଶିକାର ହୋଇଥିଲା ବୋଲି ପଯର୍ୟବେକ୍ଷକମାନେ କହିଛନ୍ତି। ହେଲେ ବର୍ତମାନ ଦେଖିବାକୁ ବାକି ରହିଲା, ବିଜେଡ଼ି ଏଥର କେଉଁ ସମୀକରଣରେ ରାଜନୀତି ଗୋଟି ଚାଳନା କରୁଛି।
