ନୂଆଦିଲ୍ଲୀ,୬ ।୮: କରୋନା ସଂକ୍ରମଣର ଦ୍ୱତୀୟ ଲହର ବେଳକୁ ବେଳ କମ୍ ହେଉଛି ସତ । ହେଲେ ଏହାର ତୃତୀୟ ଲହରର ସମ୍ଭାବନାକୁ ଦେଖି ଏବେବି ସତର୍କ ରହିବା ଜରୁରୀ ବୋଲି କହିଛି ବିଶ୍ୱ ସ୍ୱାସ୍ଥ୍ୟ ସଂଗଠନ(ଡବ୍ଲୁଏଚ୍ଓ) । ଦ୍ୱିତୀୟ ଲହର କମି କମି ଆସୁଥିବା ବେଳେ ପ୍ରାୟ ପ୍ରତି ରାଜ୍ୟ ସରକାର ସ୍କୁଲ, କଲେଜ ଖୋଲିବା କଥା ଚିନ୍ତା କରି ସାରିଲେଣି । କିଛି ସ୍ଥାନରେ ସ୍କୁଲ କଲେଜ ଖୋଲି ଗଲାଣି । ଅନ୍ୟ ସମସ୍ତ କଟକଣାରେ ବି ସାମାନ୍ୟ ଢିଲା ଦିଆଯାଇଛି । ହେଲେ ଏବେବି କରୋନାର ଭୟ ସମ୍ପୂର୍ଣ୍ଣ ଭାବେ ଯାଇ ନାହିଁ । ତେଣୁ ଏହାକୁ ଦେଖି ଡବ୍ଲୁଏଚ୍ଓର ମୁଖ୍ୟ ବୈଜ୍ଞାନିକ ଡା. ସୌମ୍ୟା ସ୍ୱାମିନାଥନ କହିଛନ୍ତି ଏବେବି ଆମକୁ ସତର୍କ ରହିବାକୁ ପଡିବ । ସାମାନ୍ୟ ଅବହେଳା ପୁଣି ଆମକୁ ଅସୁବିଧାରେ ପକାଇପାରେ । ଅତିକମରେ ଆମକୁ ଆଉ ୬ ମାସ ସାବଧାନ ରହିବାକୁ ହେବ ବୋଲି ସେ କହିଛନ୍ତି । କାରଣ ୬ ମାସ ମଧ୍ୟରେ ଯଦି ଟିକାକରଣ ଆଖି ଦୃଶିଆ ହୋଇଥିବ ତେବେ ଆମେ ସାମାନ୍ୟ ଆଶ୍ୱସ୍ତ ହେବା ବୋଲି ସେ କହିଛନ୍ତି । କରୋନାଠାରୁ ଦୂରେଇ ରହିବାର ଏକମାତ୍ର ଉପାୟ ଟିକାକରଣ ବୋଲି ସେ କହିଥିବା ବେଳେ ସବୁ ଦେଶ ଏହା ଉପରେ ଗୁରୁତ୍ୱ ଦେବାକୁ ଡବ୍ଲୁଏଚ୍ଓ କହିଛି । ସେପ୍ଟେମ୍ବର ଶେଷ ବେଳକୁ ପ୍ରତି ଦେଶରେ ଅତିକମରେ ୧୦ ପ୍ରତିଶତ ଟିକାକରଣ ଜରୁରୀ ବୋଲି ସେ କହିଛନ୍ତି । ଏହାସହ ୨୦୨୨ ବେଳକୁ ଅତିକମରେ ୭୦ ପ୍ରତିଶତ ଟିକାକରଣ ଜରୁରୀ । ନଚେତ୍ ଆମେ କରୋନା ଯୁଦ୍ଧରେ ଜିତିବା କଷ୍ଟ ହୋଇ ପଡିବ ।
