ନୂଆଦିଲ୍ଲୀ,୨୩ା୭: ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିବା ଜଗଦୀପ ଧନକର ସରକାରୀ କ୍ୱାର୍ଟର୍ସ ପାଇବେ କି ନାହିଁ ଏବେ ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ତେବେ କେନ୍ଦ୍ର ଗୃହ ଏବଂ ନଗର ବ୍ୟାପାର ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି, ଧନକର ଗତ ବର୍ଷ ଏପ୍ରିଲରେ ସଂସଦ ଭବନ କମ୍ପ୍ଲେକ୍ସ ନିକଟ ଚର୍ଚ୍ଚ ରୋଡ୍ରେ ନବନିର୍ମିତ ଉପରାଷ୍ଟ୍ରପତି ଏନକ୍ଲେଭକୁ ସ୍ଥାନାନ୍ତରିତ ହୋଇଥିଲେ।
ଉପରାଷ୍ଟ୍ରପତିଙ୍କ ବାସଭବନ ଏବଂ କାର୍ଯ୍ୟାଳୟ ଥିବା ଏନକ୍ଲେଭ ସେଣ୍ଟ୍ରାଲ ଭିଷ୍ଟା ପୁନଃବିକାଶ ଯୋଜନା ଅଧୀନରେ ନିର୍ମାଣ ହୋଇଥିଲା। ପ୍ରାୟ ୧୫ ମାସ ସେଠାରେ ରହିବା ପରେ ଧନକରଙ୍କୁ ଉପରାଷ୍ଟ୍ରପତି ଏନକ୍ଲେଭକୁ ଖାଲି କରିବାକୁ ପଡ଼ିବ। ଅଧିକାରୀ କହିଛନ୍ତି, ଧନକର ଲୁଟିୟନ୍ସ ଦିଲ୍ଲୀ କିମ୍ବା ଅନ୍ୟ କୌଣସି ଅଞ୍ଚଳରେ ଏକ ଟାଇପ୍ ୮ କ୍ୱାର୍ଟର୍ସ ପ୍ରଦାନ କରାଯିବ। ସାଧାରଣତଃ ବରିଷ୍ଠ କେନ୍ଦ୍ରମନ୍ତ୍ରୀ କିମ୍ବା ଜାତୀୟ ଦଳର ସଭାପତିଙ୍କୁ ଟାଇପ୍-୮ କ୍ୱାର୍ଟର୍ସ ଆବଣ୍ଟିତ କରାଯାଏ।
ସ୍ବାସ୍ଥ୍ୟଗତ କାରଣ ଦର୍ଶାଇ ସୋମବାର ଧନଖର ତାଙ୍କ ପଦରୁ ଇସ୍ତଫା ଦେଇଛନ୍ତି। ସେହି ସମୟରେ କଂଗ୍ରେସ କହିଛି ଯେ, ଧନକରଙ୍କ ଇସ୍ତଫା ପଛରେ ତାଙ୍କ ଦ୍ୱାରା ଉଲ୍ଲେଖ କରାଯାଇଥିବା ସ୍ବାସ୍ଥ୍ୟଗତ କାରଣ ବ୍ୟତୀତ ଆହୁରି ଗଭୀର କାରଣ ଅଛି। ସୋମବାର ରାତିରେ ଧନକରଙ୍କ ଉପରାଷ୍ଟ୍ରପତି ପଦରୁ ହଠାତ୍ ଇସ୍ତଫା ଦେବା ଏହା ସ୍ବାସ୍ଥ୍ୟଗତ ନା ଅନ୍ୟ କିଛି ତାହା କଳ୍ପନାଜଳ୍ପନାକୁ ଆହୁରି ଖୋରାକ୍ ଯୋଗାଇଛି।
ସାଧାରଣତଃ ଜଣେ ଉଚ୍ଚପଦସ୍ଥ ବ୍ୟକ୍ତି ପଦ ଛାଡ଼ିବା ସମୟରେ ତାଙ୍କୁ ପ୍ରଶଂସା କରାଯାଏ, କିନ୍ତୁ ଧନକରଙ୍କ କ୍ଷେତ୍ରରେ, ଶାସକ ମେଣ୍ଟ ପକ୍ଷରୁ ଏପରି କୌଣସି ପ୍ରତିକ୍ରିୟା ଦେଖାଯାଇ ନଥିଲା। ତଥାପି ବିରୋଧୀ ଦଳ ପକ୍ଷରୁ ଧନକରଙ୍କ ବିଷୟରେ ଭଲ କଥା କୁହାଯାଇଥିଲା। ଏହା ଭିନ୍ନ କଥା ଯେ, ଗତ ବର୍ଷ ବିରୋଧୀ ସଦସ୍ୟମାନେ ତାଙ୍କ କଥିତ ପକ୍ଷପାତିତା ପାଇଁ ଧନକରଙ୍କୁ ପଦରୁ ହଟାଇବା ପାଇଁ ଏକ ନୋଟିସରେ ସ୍ବାକ୍ଷର କରିଥିଲେ। ଆପଣଙ୍କୁ କହି ରଖୁଛୁ ଯେ, ଧନକରଙ୍କ ଇସ୍ତଫା ସହିତ, ଦେଶର ଦ୍ୱିତୀୟ ସର୍ବବୃହତ ସାମ୍ବିଧାନିକ ପଦବୀ ପାଇଁ ଏବେ ଏକ ନୂତନ ନିର୍ବାଚନ ହେବାକୁ ଯାଉଛି ଏବଂ ଏହି ପ୍ରକ୍ରିୟା ଅନେକ ରାଜନୈତିକ ସମୀକରଣକୁ ମଧ୍ୟ ପ୍ରଭାବିତ କରିପାରିବ।
