ଯୋଡ଼ା/ଚମ୍ପୁଆ,୨୯ ।୪(ଡି.ଏନ.ଏ.) କେନ୍ଦୁଝର ଜିଲା ଚମ୍ପୁଆ ରେଞ୍ଜ ଅଞ୍ଚଳରେ ମୟୂରଭଞ୍ଜ ଜିଲାରୁ ଆସିଥିବା ହାତୀପଲ ଆତଙ୍କ ଖେଳାଇଛନ୍ତି। ଦୁଇ ଦିନ ହେଲା ଏହି ହାତୀପଲ ଚମ୍ପୁଆ ରେଞ୍ଜର ରଜିଆ, ପତଳା,ବର୍ଦ୍ଧନା ପ୍ରଭୃତି ଅଞ୍ଚଳରେ ଉତ୍ପାତ କରୁଛନ୍ତି। ଯାହା ଫଳରେ ଗ୍ରାମବାସୀ ସା ହେଲେ ତାଟିକବାଟ ବନ୍ଦ କରି ଆତଙ୍କିତ ଅବସ୍ଥାରେ ରହୁଛନ୍ତି। ଯଦିଓ ବନ ବିଭାଗ ହାତୀପଲକୁ ଘଉଡ଼ାଉଛି ତଥାପି ସେମାନେ ପୁଣି ଇତସ୍ତଃତ ହୋଇ ନିକଟବର୍ତ୍ତୀ ଗ୍ରାମ ଗୁଡ଼ିକରେ ପଶି ଯାଉଛନ୍ତି।
ହାତୀ ଯାତାୟାତ କରୁଥିବା ରାସ୍ତା ବର୍ତ୍ତମାନ ବିଭିନ୍ନ କାରଣ ବଶତଃ ଅବରୋଧ ହୋଇଛି। ମୁଖ୍ୟତଃ ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟରୁ ଝାଡଖଣ୍ଡ – ଓଡ଼ିଶା ସୀମାନ୍ତ ବର୍ତ୍ତି ଶେରେଣ୍ଡା ରିଜର୍ଭ ଜଙ୍ଗଲକୁ ଅତୀତରେ ଏହିପରି ହାତୀପଲ ଚମ୍ପୁଆ ଅଞ୍ଚଳରେ ଥିବା ବିଭିନ୍ନ ଗ୍ରାମ୍ୟ ଜଙ୍ଗଲ ଓ ମିରିଗ ଶିଙ୍ଗାରେ ଥିବା ବୈତରଣୀ ନଦୀକୁ ପାରି ହୋଇ ଯାତାୟାତ କରୁଥିଲେ। ବର୍ତ୍ତମାନ ବନାଞ୍ଚଳରେ ଜନବସତି ସ୍ଥାପନ,ବଡ଼ ବଡ଼ ପ୍ରକଳ୍ପ, ଖଣି ଖନନ,ଖଣିରେ ଲାଗିଥିବା ଉଚ୍ଚଶକ୍ତି ସମ୍ପନ୍ନ ଆଲୋକ ଏବଂ ଖଣି ଖନନ ପାଇଁ ବ୍ୟବହାର ହେଉଥିବା ବାରୁଦ ବିସ୍ଫୋରଣ ଏହି ହାତୀପଲଙ୍କୁ ବାଟବଣା କରୁଛି। ଏହାଦ୍ବାରା ହାତୀପଲ ଯୋଡ଼ା ଖଣି ଅଞ୍ଚଳ ତଥା ଚମ୍ପୁଆ ରେଞ୍ଜ ଅଧୀନ ଗଁାଗୁଡ଼ିକରେ ଉତ୍ପାତ କରୁଛନ୍ତି।
ବନବିଭାଗ ପକ୍ଷରୁ ମିଳିଥିବା ତଥ୍ୟ ଅନୁଯାୟୀ,ଯୋଡ଼ା ଫରେଷ୍ଟ ସେକ୍ସନର ଖଣ୍ଡବନ୍ଧ ବୈତରଣୀ(କ) ସଂରକ୍ଷିତ ଜଙ୍ଗଲରେ ୯ଟି ହାତୀ ବିଚରଣ କରୁଛନ୍ତି। ଏଥି ମଧ୍ୟରେ ୨ଟି ହାତୀ ଛୁଆ ରହିଛନ୍ତି। ସେହିପରି ବୈତରଣୀ (ଖ) ଜଙ୍ଗଲରେ ୨ଟି ହାତୀ ବିଚରଣ କରୁଛନ୍ତି। ବନବିଭାଗ ସ୍କାଡ୍ ହାତୀମାନଙ୍କର ଗତିବିଧି ଉପରେ ନଜର ରଖିଥିବା ଯୋଡ଼ା ବନପାଳ ଅନିରୁଦ୍ଧ ପଣ୍ଡା କହିଛନ୍ତି। ତେବେ ବଡ଼ ବଡ଼ ଅନ୍ତର୍ଦ୍ଦେଶୀୟ ଖଣି କମ୍ପାନୀମାନେ ଏହି ଅଞ୍ଚଳରେ ଖଣି ଖନନ କରୁଥିବାରୁ ହାତୀପଲ ଜଙ୍ଗଲରେ ନ ରହି ଗ୍ରାମ୍ୟ ଜଙ୍ଗଲରେ ରହୁଛନ୍ତି। କିଛି ଦିନ ପୂର୍ବରୁ ଖଣ୍ଡ ବନ୍ଧର ଏକ ଖଣି ମଧ୍ୟକୁ ହାତୀପଲ ପଶିଯାଇଥିଲା। ଏହି ହାତୀପଲ ଚମ୍ପୁଆ ଅଞ୍ଚଳର ବିଭିନ୍ନ ଗ୍ରାମରେ ବିଚରଣ କରୁଥିବାରୁ ଚାଷୀକୁଳରେ ଆତଙ୍କ ଦେଖା ଦେଇଛି। ଖରା ଦିନିଆ ଧାନ ଓ ପନିପରିବା ଚାଷକୁ ସାବେଳେ ହାତୀପଲ ଖାଇବାକୁ ଆସୁଥିବାରୁ ନିଆଁ ହୁଳା ଓ ବନ ବିଭାଗ ପକ୍ଷରୁ ମିଳିଥିବା ବଡ଼ ଟର୍ଚ୍ଚ ଲାଇଟ୍ ଧରି ଲୋକେ ରାତି ଉଜାଗର ରହି ନିଜର ଫସଲକୁ ଜଗୁଛନ୍ତି। ବନବିଭାଗ ଏବଂ ଖଣି ଲିଜଧାରୀଙ୍କ ମଧ୍ୟରେ ସମନ୍ବୟ ରହୁ ନ ଥିବାରୁ ମନଇଚ୍ଛା ସମୟ ନିର୍ଘଣ୍ଟ ନ କରି ବାନାଞ୍ଚଳରେ ବ୍ୟାପକ ବାରୁଦ ବିସ୍ଫୋରଣ ହେଉଛି। ଯାହାଫଳରେ ହାତୀ ସହିତ ବନାଞ୍ଚଳର ବନ୍ୟଜନ୍ତୁଙ୍କ ଜୀବନ ବିପନ୍ନ ହେଉଛି। ଏ ଦିଗରେ ସରକାର ସ୍ପଷ୍ଟ ନୀତି ନ ଆଣିଲେ ଦୁର୍ଲଭ ବନ୍ୟଜନ୍ତୁ ବିଲୁପ୍ତ ହୋଇ ଯିବେ ବୋଲି ପରିବେଶବିତ୍ ମାନେ କହିଛନ୍ତି।
