ଥୁଆମୂଳ ରାମପୁର,୬ା୧୨: କଳାହାଣ୍ଡି ଜିଲାର କଳା ଓ ସଂସ୍କୃତିର ପର୍ବ ‘ଘୁମୁରା’ରେ କଳାହାଣ୍ଡି ତଥା ବାହାର ରାଜ୍ୟର କଳା ପ୍ରଦର୍ଶନ ଓ ପ୍ରତିଭା ପ୍ରଦର୍ଶିତ କାର୍ଯ୍ୟକ୍ରମକୁ ସୂଚାରୁ ରୂପେ ପରିଚାଳନା କରିଆସୁଥିବା ବେଳେ ପ୍ରତିବର୍ଷ ଏହି ଅବସରରେ ଥୁଆମୂଳ ରାମପୁର ବ୍ଲକସ୍ଥିତ ଇନ୍ଦ୍ରାବତୀ ଜଳଭଣ୍ତାର ନିକଟରେ ଥିବା କେନ୍ଦୁଗୁଡ଼ା ଘାଟରେ ଜିଲାସ୍ତରୀୟ କଳାହାଣ୍ଡି ଉତ୍ସବ ଘୁମୁରା ପାଇଁ ନୌଚାଳନା ଓ ତୀରଚାଳନା ପ୍ରତିଯୋଗିତା ଜିଲା କଳା ଓ ସଂସ୍କୃତି ବିଭାଗ ପକ୍ଷରୁ ଉକ୍ତ ପଡ଼ିଆରେ ଆୟୋଜିତ ହୋଇଥାଏ। ହେଲେ ଦୁଃଖ ଓ ପରିତାପର ବିଷୟ ଏହା ଯେ, ଏହି ପଡ଼ିଆର ଉନ୍ନତି ବା ସୌନ୍ଦର୍ଯ୍ୟକରଣ ଦିଗରେ କୌଣସି ପ୍ରକାରରେ ଉନ୍ନତିକରଣ କରିବା ପାଇଁ ଜିଲା ପ୍ରଶାସନ କିମ୍ବା ବ୍ଲକ ପ୍ରଶାସନ ଚିନ୍ତା କରୁ ନ ଥିବା ଘଟଣାକୁ ନେଇ ପରିବେଶପ୍ରେମୀ ତଥା ବରିଷ୍ଠ ନାଗରିକ ଅସନ୍ତୋଷ ପ୍ରକାଶ କରୁଛନ୍ତି। କେବଳ ବର୍ଷକୁ ଥରେ ହିଁ ଏହି ପଡ଼ିଆକୁ ବିଭିନ୍ନ ବିଭାଗୀୟ ଅଧିକାରୀ ଆସି ପ୍ରତିଯୋଗିତା ମାନ ଆୟୋଜନ କରିବାରେ ବ୍ୟସ୍ତ ରହିଥାନ୍ତି। କାର୍ଯ୍ୟକ୍ରମ ଶେଷ ହେଲା ପରେ ପଡ଼ିଆ ପ୍ରତି କାହାର ନଜର ପଡ଼େନି।
ଆସନ୍ତା ଜାନୁଆରୀରେ ହେବାକୁ ଯାଉଛି ଜିଲାସ୍ତରୀୟ କଳାହାଣ୍ଡି ଉତ୍ସବ ଘୁମୁରା ୨୦୨୫। ତେବେ ଜିଲା ପ୍ରଶାସନ ଓ ଜିଲା କଳା ଏବଂ ସଂସ୍କୃତି ବିଭାଗ ଏହାକୁ ଦୃଷ୍ଟିରେ ରଖି ଉକ୍ତ ପଡ଼ିଆର ଉନ୍ନତି ବା ସୌନ୍ଦର୍ଯ୍ୟକରଣ କରିବା ନେଇ ନିଶ୍ଚୟ ଆଗେଇ ଆସିବେ ବୋଲି ବ୍ଲକ ବାସୀ ଆଶା କରିବା ସହ ଦାବି ମଧ୍ୟ କରିଛନ୍ତି।
