ନୂଆଦିଲ୍ଲୀ,୧୭।୫: ଲୋକ ସଭା ନିର୍ବାଚନର ଚାରୋଟି ପର୍ଯ୍ୟାୟ ପାଇଁ ମତଦାନ ହୋଇଛି। ଏନଡିଏ ପୁଣିଥରେ କେନ୍ଦ୍ରରେ ସରକାର ଗଠନ କରିବ ବୋଲି ଦାବି କରିଛି ଭାଜପା। ଅନ୍ୟପଟେ ଜୁନ ୨ରେ ଭାଜପାର ବିଦାୟ ନିଶ୍ଚିତ ବୋଲି ବିରୋଧୀ ଦଳ ଦାବି କରୁଛନ୍ତି। ନିକଟରେ ଏକ ସାକ୍ଷାତକାରରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ପଚରାଯାଇଥିଲା, ଯଦି ସଂଖ୍ୟାଗରିଷ୍ଠତା ହାସଲ ନ କରେ ତେବେ ଭାଜପାର କୌଣସି ପ୍ଲାନ୍ ବି ଅଛି କି? ଏହାର ଉତ୍ତରରେ ଅମିତ ଶାହା କହିଛନ୍ତି ଯେ, ପ୍ଲାନ ବି ସେତେବେଳେ କରାଯାଏ ଯେତେବେଳେ ଯେତେବେଳେ ପ୍ଲାନ ଏର ସଫଳତାର ସମ୍ଭାବନା ୬୦ ପ୍ରତିଶତରୁ କମ ହୋଇଥାଏ। ମୋର ସମ୍ପୂର୍ଣ୍ଣ ଆତ୍ମବିଶ୍ୱାସ ରହିଛି ଯେ, ପ୍ରଧାନମନ୍ତ୍ରୀ ମୋଦି ଏକ ବିରାଟ ବିଜୟ ସହ କ୍ଷମତାକୁ ଫେରିବେ।
ଅମିତ ଶାହାଙ୍କୁ ପଚରାଯାଇଥିଲା, ଯଦି ଜୁନ ୪ରେ ଭାଜପା ୨୭୨ର ସଂଖ୍ୟାରେ ପହଞ୍ଚି ନ ପାରେ ତେବେ କଣ ହେବ? ଏହା ଉପରେ ଅମିତ ଶାହା କହିଛନ୍ତି, ମୁଁ ସେପରି କୌଣସି ସମ୍ଭାବନା ଦେଖୁ ନାହିଁ। ୬୦ କୋଟି ହିତାଧିକାରୀଙ୍କ ଏକ ଶକ୍ତିଶାଳୀ ସେନା ପିଏମ ମୋଦିଙ୍କ ସହ ଛିଡା ହୋଇଛି। ଯେଉଁମାନେ ସରକାରୀ ଯୋଜନାରେ ଉପକୃତ ହୋଇଛନ୍ତି ସେମାନେ ଜାଣନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ’ଣ।
ତାଙ୍କ ସରକାରଙ୍କ ସଫଳତା ବିଷୟରେ ଆଲୋଚନା କରି କେନ୍ଦ୍ର ମନ୍ତ୍ରୀ କହିଛନ୍ତି, ଯେଉଁମାନେ ଧାରା ୩୭୦କୁ ପ୍ରଶ୍ନ କରନ୍ତି, ମୁଁ ସେମାନଙ୍କୁ କହିବାକୁ ଚାହେଁ କଶ୍ମୀରରେ ଭୋଟ ପ୍ରତିଶତ ୪୦% ଅତିକ୍ରମ କରିଛି। ଏହାଠାରୁ ବଡ଼ ସଫଳତା ଆଉ କ’ଣ ହୋଇପାରେ। ସମସ୍ତ ମୌଳିକବାଦୀ ଗୋଷ୍ଠୀ ଏବଂ ନେତାମାନେ ଭୋଟ ଦେଉଛନ୍ତି। ସେମାନେ ଗଣତାନ୍ତ୍ରିକ ପ୍ରକ୍ରିୟାର ଏକ ଅଂଶ ହୋଇଛନ୍ତି।
