ନୂଆଦିଲ୍ଲୀ,୧୦।୨: ଦିଲ୍ଲୀରେ ଆମ ଆଦମୀ ପାର୍ଟି ନିର୍ବାଚନରେ ପରାସ୍ତ ହେବା ପରେ ଇଣ୍ଡିଆ ମେଣ୍ଟ ସମ୍ପର୍କରେ ଆଲୋଚନା ଆରମ୍ଭ ହୋଇଛି। ଏହି ମେଣ୍ଟରେ ସାମିଲ ଅଧିକାଂଶ ଦଳ ଦିଲ୍ଲୀ ନିର୍ବାଚନରେ ଅରବିନ୍ଦ କେଜରିୱାଲଙ୍କୁ ସମର୍ଥନ କରିଥିଲେ। ଏସପି, ଟିଏମସି, ଆରଜେଡି ସମେତ ଅନେକ ଦଳ କହିଥିଲେ, ଦିଲ୍ଲୀରେ ଆପ ଏକ ଦୃଢ଼ ସ୍ଥିତିରେ ଅଛି ଏବଂ ଭାଜପାକୁ ପରାସ୍ତ କରିପାରିବ। ସେଥିପାଇଁ ଆମେ ତାଙ୍କୁ ଆମର ସମର୍ଥନ ଦେଉଛୁ। ଦିଲ୍ଲୀରେ କେଜ୍ରିଓ୍ବାଲଙ୍କ ପରାଜୟ ପରେ ଏବେ ପ୍ରଶ୍ନ ଉଠାଯାଉଛି ଯେ ଇଣ୍ଡିଆ ମେଣ୍ଟର ଭବିଷ୍ୟତ କ’ଣ ହେବ? କଂଗ୍ରେସ ନେତା ତଥା ରାଜ୍ୟ ସଭା ଏମ୍ପି ରାଜୀବ ଶୁକ୍ଲା ଏହା ଉପରେ ପ୍ରତିକ୍ରିୟା ଦେଇଛନ୍ତି।
ରାଜୀବ ଶୁକ୍ଲା କହିଛନ୍ତି, ଦିଲ୍ଲୀରେ ଆମ ଆଦମୀ ପାର୍ଟିର ପରାଜୟ ସତ୍ତ୍ୱେ, ଇଣ୍ଡିଆ ବ୍ଲକ ଏକଜୁଟ ଅଛି ଏବଂ ଆଗାମୀ ଲୋକସଭା ନିର୍ବାଚନ ଏକାଠି ଲଢ଼ିବ। ଯେତେବେଳେ ଇଣ୍ଡିଆ ବ୍ଲକ ଗଠନ ହୋଇଥିଲା, ସେତେବେଳେ ନିଷ୍ପତ୍ତି ନିଆଯାଇଥିଲା ଯେ ଆମେ ଏକାଠି ଲୋକସଭା ନିର୍ବାଚନ ଲଢ଼ିବୁ। ରାଜ୍ୟ ୟୁନିଟଗୁଡ଼ିକୁ ସ୍ଥାନୀୟ ନିର୍ବାଚନରେ ନିଷ୍ପତ୍ତି ନେବାକୁ ଅନୁମତି ଦିଆଯିବ। ସଂସଦୀୟ ନିର୍ବାଚନ ନିକଟ ହେଲେ ଇଣ୍ଡିଆ ବ୍ଲକ ମଧ୍ୟରେ ପୁଣି ଥରେ ଆଲୋଚନା ଆରମ୍ଭ ହେବ।”
ଶୁକ୍ଲା ଜୋର ଦେଇ କହିଛନ୍ତି, ରାଜ୍ୟ ସ୍ତରରେ ଭିନ୍ନ ଭିନ୍ନ ନିର୍ବାଚନ ରଣନୀତି ସତ୍ତ୍ୱେ ବିରୋଧୀ ଦଳ ଏକଜୁଟ ଅଛନ୍ତି। ଆମକୁ ଦଳଗୁଡ଼ିକର ପରବର୍ତ୍ତୀ ରଣନୀତି ମୂଲ୍ୟାଙ୍କନ କରିବାକୁ ପଡିବ, କିନ୍ତୁ ବିରୋଧୀ ଦଳ ଭିତରେ ଏକତା ଅକ୍ଷୁର୍ଣ୍ଣ ଅଛି ଏବଂ ରହିବ।
ଦିଲ୍ଲୀ ବିଧାନସଭା ନିର୍ବାଚନରେ ଭାଜପାର ବିଜୟ ପରେ, ସମାଜବାଦୀ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଅଖିଳେଶ ଯାଦବ କହିଛନ୍ତି, ପରାଜୟ ଏକ ଶିକ୍ଷା, ଇଣ୍ଡିଆ ବ୍ଲକ ଭବିଷ୍ୟତରେ ଅଧିକ ଶକ୍ତି ପାଇବ। ଅଖିଳେଶ ଯାଦବ ଦିଲ୍ଲୀରେ ଆମ ଆଦମୀ ପାର୍ଟିର ସମର୍ଥନରେ ପ୍ରଚାର ମଧ୍ୟ କରିଥିଲେ। ଏହା ସତ୍ତ୍ୱେ, ଏଏପି କେବଳ ୨୨ଟି ଆସନ ଜିତିଥିଲା, ଯେତେବେଳେ ୨୦୨୦ ନିର୍ବାଚନରେ ଏହା ୬୨ଟି ଆସନ ଜିତିଥିଲା। ଭାଜପା୨୭ ବର୍ଷ ପରେ ଦିଲ୍ଲୀରେ ୪୮ଟି ଆସନ ଜିତି କ୍ଷମତାକୁ ଫେରିଛି।
