ନୂଆଦିଲ୍ଲୀ,୨୩।୧: ଦିଲ୍ଲୀ ନିର୍ବାଚନରୁ ପଛକୁ ହଟିଛି କଂଗ୍ରେସ। ଏଠାରେ ଦଳର ପ୍ରମୁଖ ନେତା ରାହୁଲ ଗାନ୍ଧୀଙ୍କ ୩ଟି ପ୍ରସ୍ତାବିତ ରାଲିକୁ ଶେଷ ମୁହୂର୍ତ୍ତରେ ଗୋଟିଏ ପରେ ଗୋଟିଏ ବାତିଲ କରାଯିବା ପରେ କିଛି ଏଭଳି ଚର୍ଚ୍ଚା ରାଜନୈତିକ ମାହୋଲକୁ ସରଗରମ କରିଛି। ରାହୁଲ ଗାନ୍ଧୀଙ୍କ ଏହି ରାଲିଗୁଡ଼ିକୁ ଲଗାତାର ବାତିଲ କରାଯିବା ସମ୍ପର୍କରେ କଂଗ୍ରେସ ପାଖରେ କେବଳ ଗୋଟିଏ ଯୁକ୍ତି ଅଛି। କଂଗ୍ରେସ କହିଛି ଯେ ରାହୁଲ ଅସୁସ୍ଥ ଅଛନ୍ତି ଏବଂ ସ୍ବାସ୍ଥ୍ୟଗତ କାରଣରୁ ସେ ରାଲି କରିପାରିବେ ନାହିଁ।
ପୂର୍ବରୁ ରାହୁଲ ଗାନ୍ଧୀ ଦିଲ୍ଲୀର ସୀଲମପୁର କେବଳ ଗୋଟିଏ ରାଲି କରିଛନ୍ତି। ଏହି ରାଲିରେ ସେ ଅରବିନ୍ଦ କେଜ୍ରିୱାଲଙ୍କୁ କଡ଼ା ଟାର୍ଗେଟ କରିଥିଲେ। ଏହା ପରେ, ନୂଆଦିଲ୍ଲୀ ଆସନ, ସଦର ବଜାର ଏବଂ ମୁସ୍ତାଫାବାଦରେ ରାହୁଲଙ୍କ ରାଲି ଆୟୋଜନ କରାଯାଇଥିଲା, କିନ୍ତୁ ତିନୋଟି ସ୍ଥାନରେ ରାହୁଲଙ୍କ ରାଲି ବାତିଲ କରାଯାଇଛି। ମୁସ୍ତାଫାବାଦ ଏବଂ ସଦର ବଜାରରେ ଶେଷ ମୁହୂର୍ତ୍ତରେ ରାଲି ବାତିଲ ଘୋଷଣା କରାଯାଇଥିଲା। ଉଭୟ ସ୍ଥାନରେ ପୋଷ୍ଟରଠାରୁ ଆରମ୍ଭ କରି ମଞ୍ଚ ପର୍ଯ୍ୟନ୍ତ ସବୁକିଛି ପ୍ରସ୍ତୁତ ଥିଲା।
ତେବେ କଂଗ୍ରେସ ପକ୍ଷରୁ ରାହୁଲଙ୍କ ରାଲି ବାତିଲ କରିବା ପଛରେ ସ୍ବାସ୍ଥ୍ୟ ସମସ୍ୟାକୁ କାରଣ ଦର୍ଶାଯାଇଛି। କିନ୍ତୁ ଦିଲ୍ଲୀ ଦେଶର ରାଜଧାନୀ ହୋଇଥିବା ଯୋଗୁ ଏହାକୁ ନେଇ ପ୍ରଶ୍ନ ଉଠିଛି। ରାହୁଲ ୨ ଦିନ ପୂର୍ବରୁ ବେଲଗାମ ଯାଉଥିଲେ, କିନ୍ତୁ ଯାଇପାରିଲେ ନାହିଁ। ରାହୁଲ ତାଙ୍କ ସ୍ଥାନରେ ପ୍ରିୟଙ୍କା ଗାନ୍ଧୀଙ୍କୁ ସେଠାକୁ ପଠାଇଥିଲେ।
କଂଗ୍ରେସର ସମସ୍ତ ବଡ଼ ନେତା ଦିଲ୍ଲୀରେ ରୁହନ୍ତି। ରାହୁଲଙ୍କ ବ୍ୟତୀତ ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ ଏବଂ ମଲ୍ଲିକାର୍ଜୁନ ଖାର୍ଗେ ମଧ୍ୟ ଷ୍ଟାର ପ୍ରଚାରକ। ରାହୁଲ ତାଙ୍କ ସ୍ଥାନରେ ଏମାନଙ୍କ ମଧ୍ୟରୁ ଯେକୌଣସି ଜଣଙ୍କୁ ପଠାଇପାରିଥାନ୍ତେ, କିନ୍ତୁ କଂଗ୍ରେସ ରାଲିକୁ ବାତିଲ କରିବାକୁ ନିଷ୍ପତ୍ତି ନେଲା କାହିଁକି ବୋଲି କୁହାଯାଉଛି। ଗୋଟିଏ ପଟେ ରାହୁଲଙ୍କ ରାଲି ବାତିଲ ହେଉଥିବା ବେଳେ, ହାଇକମାଣ୍ଡର କୌଣସି ବଡ଼ ନେତା ଏପର୍ଯ୍ୟନ୍ତ ଦିଲ୍ଲୀରେ ପ୍ରଚାର କରିନାହାନ୍ତି।
ସେହିପରି, ୨୦୨୧ ମସିହାରେ, ରାହୁଲ ଗାନ୍ଧୀ ଧୀରେ ଧୀରେ ବଙ୍ଗଳାରେ ତାଙ୍କର ସମସ୍ତ ରାଲି ବାତିଲ କରିଥିଲେ। ସେତେବେଳେ, ରାହୁଲ ଗାନ୍ଧୀ ମମତା ବାନାର୍ଜୀଙ୍କୁ ସମର୍ଥନ କରିବା ପାଇଁ ସିଧାସଳଖ ନୁହେଁ ବରଂ ପରଦା ପଛରେ ତାଙ୍କର ରାଲି ବାତିଲ କରିଥିଲେ। ପରେ, ରାହୁଲଙ୍କ ରାଲିକୁ ନେଇ କଂଗ୍ରେସ ବୈଠକରେ ହଙ୍ଗାମା ହୋଇଥିଲା।
ଭାଜପା ଏମ୍ପି ରବି ଶଙ୍କର ପ୍ରସାଦ ରାହୁଲ ଗାନ୍ଧୀଙ୍କ ରାଲିଗୁଡ଼ିକୁ ଲଗାତାର ବାତିଲ କରିବା ଉପରେ ତାଙ୍କୁ ଟାର୍ଗେଟ କରିଛନ୍ତି। ପ୍ରସାଦ କହିଛନ୍ତି ଯେ ରାହୁଲ ଗାନ୍ଧୀ ଏବଂ ଅରବିନ୍ଦ କେଜରିୱାଲଙ୍କ ମଧ୍ୟରେ ଏକ ନୂତନ ମେଣ୍ଟ ପାଇଁ ପ୍ରୟାସ ଚାଲିଛି। ଏହି କାରଣରୁ କଂଗ୍ରେସ ମଇଦାନରେ ନିଷ୍କ୍ରିୟ ହୋଇଯାଇଛି। କଂଗ୍ରେସର ଅଧିକାଂଶ ବଡ଼ ନେତା ନର୍ବାଚନରେ ସକ୍ରିୟ ଭାବରେ ପ୍ରଚାର କରୁନାହାଁନ୍ତି। କଂଗ୍ରେସ ଅରବିନ୍ଦ କେଜରିୱାଲଙ୍କ ବିପକ୍ଷରେ କେବଳ ସନ୍ଦୀପ ଦୀକ୍ଷିତଙ୍କୁ ଛାଡି ଦେଇଛି। ଦୀକ୍ଷିତ ଏକାକୀ ଆମ ଆଦମୀ ପାର୍ଟି ଧିରୋଧରେ ମଇଦାନରେ ଲଢ଼ୁଛନ୍ତି।
ତେବେ ଦିଲ୍ଲୀର ୭୦ ବିଧାନସଭା ଆସନ ପାଇଁ ୫ ଫେବୃଆରୀରେ ମତଦାନ ହେବ। ବଡ଼ ନେତାମାନେ କେବଳ ଫେବୃଆରୀ ୩ ପର୍ଯ୍ୟନ୍ତ ପ୍ରାର୍ଥୀଙ୍କ ସପକ୍ଷରେ ରାଲି କରିପାରିବେ।
