ନୂଆଦିଲ୍ଲୀ,୧୫।୭: ଜାମାଇକାରେ ଅନୁଷ୍ଠିତ ତୃତୀୟ ଟେଷ୍ଟ ମ୍ୟାଚରେ ଅଷ୍ଟ୍ରେଲିଆର ପିଙ୍କ ବଲ ଜାଦୁଗର ମିଚେଲ ଷ୍ଟାର୍କ ନିଜର ଅସାଧାରଣ ପ୍ରଦର୍ଶନ ଦେଖାଇ ଓ୍ଵେଷ୍ଟ ଇଣ୍ଡିଜକୁ ମାତ୍ର ୨୭ ରନରେ ଅଲଆଉଟ କରି ଟେଷ୍ଟ ଇତିହାସରେ ଦ୍ୱିତୀୟ ନିମ୍ନତମ ସ୍କୋର ରେକର୍ଡ ସୃଷ୍ଟି କରିଛନ୍ତି। ଏହି ମ୍ୟାଚରେ ଅଷ୍ଟ୍ରେଲିଆ ୧୭୬ ରନରେ ବିଜୟୀ ହୋଇ ସିରିଜ ୩-୦ରେ ଜିତି ଫ୍ରାଙ୍କ ଓ୍ଵରେଲ ଟ୍ରଫି ହାସଲ କରିଛି।
ଷ୍ଟାର୍କ ନିଜର ୧୦୦ତମ ଟେଷ୍ଟ ମ୍ୟାଚରେ ୪୦୦ ଟେଷ୍ଟ ଉଇକେଟର ମାଇଲଖୁଣ୍ଟ ଛୁଇଁଥିବା ବେଳେ ଦ୍ୱିତୀୟ ଇନିଂସରେ ୫ ଓଭରରେ ୬ ରନ ଦେଇ ୬ଟି ଉଇକେଟ ନେଇଥିଲେ। ସେ ପ୍ରଥମ ଓଭରରେ ଜନ କ୍ୟାମ୍ପବେଲ, କେଭଲନ ଆଣ୍ଡରସନ ଓ ବ୍ରାଣ୍ଡନ କିଙ୍ଗଙ୍କୁ ଆଉଟ କରି ଦଳକୁ ଦୃଢ଼ ଆରମ୍ଭ ଦେଇଥିଲେ। ଷ୍ଟାର୍କ ମାତ୍ର ୧୫ଟି ବଲରେ ୫ ଉଇକେଟ ନେଇ ଟେଷ୍ଟ ଇତିହାସରେ ନୂଆ ରେକର୍ଡ ସୃଷ୍ଟି କଲେ।
ଅନ୍ୟପକ୍ଷରେ, ସ୍କଟ ବୋଲାଣ୍ଡ ଦ୍ୱିତୀୟ ଇନିଂସରେ ହ୍ୟାଟ୍ରିକ ହାସଲ କରି ଜଷ୍ଟିନ ଗ୍ରୀଭସ, ଶାମାର ଜୋସେଫ ଓ ଜୋମେଲ ଓ୍ଵାରିକାନଙ୍କୁ ଆଉଟ କରିଥିଲେ। ବୋଲାଣ୍ଡ କହିଛନ୍ତି, “ଶେଷ ବଲରେ ମୁଁ ଟିକେ ନର୍ଭସ ଥିଲି, କିନ୍ତୁ ମୁଁ କେବଳ ଭଲ ଜାଗାରେ ବଲ ପକାଇବାକୁ ଚେଷ୍ଟା କରୁଥିଲି।”
ଓ୍ଵେଷ୍ଟ ଇଣ୍ଡିଜ ଦ୍ୱିତୀୟ ଇନିଂସରେ ୨୦୪ ରନର ଲକ୍ଷ୍ୟ ପାଇଥିଲା, କିନ୍ତୁ ଷ୍ଟାର୍କ ଓ ବୋଲାଣ୍ଡଙ୍କ ଆକ୍ରମଣାତ୍ମକ ବୋଲିଂ ସାମ୍ନାରେ ମାତ୍ର ୨୭ ରନରେ ଅଲଆଉଟ ହୋଇଥିଲେ। ଏହା ଟେଷ୍ଟ ଇତିହାସରେ ନ୍ୟୁଜିଲ୍ୟାଣ୍ଡର ୧୯୫୫ରେ ସ୍ଥାପିତ ୨୬ ରନର ନିମ୍ନତମ ସ୍କୋରଠାରୁ ମାତ୍ର ଗୋଟିଏ ରନ ଅଧିକ।
ଓ୍ଵେଷ୍ଟ ଇଣ୍ଡିଜ ଅଧିନାୟକ ରୟଷ୍ଟନ ଚେଜ ସିରିଜରେ ଦଳର ବ୍ୟାଟିଂ ବିଫଳତାକୁ ଦାୟୀ କରି କହିଛନ୍ତି, “ଆମ ବୋଲରମାନେ ଆମକୁ ମ୍ୟାଚରେ ରଖିଥିଲେ, କିନ୍ତୁ ବ୍ୟାଟିଂ ବାରମ୍ବାର ଆମକୁ ନିରାଶ କରିଛି। ଆଗାମୀ ଦିନରେ ଆମକୁ ବ୍ୟାଟିଂରେ ଗୁରୁତର କାମ କରିବାକୁ ପଡ଼ିବ।” ଓ୍ଵେଷ୍ଟ ଇଣ୍ଡିଜର ଆଲଜାରୀ ଜୋସେଫ ୫/୨୭ ଏବଂ ଶାମାର ଜୋସେଫ ୪/୩୪ ନେଇ ସିରିଜରେ ୨୨ ଉଇକେଟ ସହ ଟେଷ୍ଟରେ ୫୦ ଉଇକେଟ ମାଇଲଖୁଣ୍ଟ ଅତିକ୍ରମ କରିଥିଲେ।
ଅଷ୍ଟ୍ରେଲିଆର ପ୍ରଥମ ପସନ୍ଦ ଉଇକେଟ କିପର ଆଲେକ୍ସ କେରୀ ଦ୍ୱିତୀୟ ଦିନରେ ଆଲଜାରୀ ଜୋସେଫଙ୍କ ବଲରେ ହେଲମେଟରେ ଆଘାତ ପାଇ କଙ୍କସନର ଶିକାର ହୋଇଥିଲେ, ଯାହା ପରେ ଜୋଶ ଇଙ୍ଗଲିସ ତାଙ୍କ ସ୍ଥାନ ନେଇଥିଲେ।
ଷ୍ଟାର୍କ ମ୍ୟାଚ ଓ ସିରିଜର ଶ୍ରେଷ୍ଠ ଖେଳାଳି ପୁରସ୍କାର ଗ୍ରହଣ କରି କହିଛନ୍ତି, “ଆମେ ଭାବି ନଥିଲୁ ଯେ ଆଜି ସୂର୍ଯ୍ୟ ଢ଼ଳିବା ପରେ ବଲ ଆମ ପାଖରେ କାମ କରିବ। କିନ୍ତୁ ଆମ ବୋଲିଂ ଆକ୍ରମଣ ପୁରା ସିରିଜରେ ଦମଦାର ପ୍ରଦର୍ଶନ କରିଛି।”
